Bhadrawahi Bible
यशायाह 13
बाबेलेरे खलाफ एलान
बाबेलेरे बारे मां नबूवत ज़ै आमोसेरे मट्ठे यशायाह दर्शने मां परमेशरे करां मैल्होरी थी। पहाड़ेरी नेग्गी च़ोटी पुड़ अक झण्डो खड़ो केरा, हथ्थे सेइं इशारो केरा ते सिपेहिन जो उच्ची आवाज़ी मां ज़ोथ, कि तैना प्रधानां केरे फाटकन मां दाखल भोन1। मीं यहोवा एप्पु अपने सब पवित्र कियोरन जो हुक्म दित्तोरोए, ते अपने बहादर जंगलेरे लेई कुजेवरेन, ज़ैना मेरे प्रतापेरे वजाई सेइं खुश आन।
शुना पहाड़े पुड़ बड़ी शौर भोने लगोरीए, ज़ेन्च़रे कि सेनारी हलचल भोए, रियासतां-रियासतां केरि अकोट्ठी कियोरी कौमां हलचल मच़ाने लेवरिन। सेना केरो यहोवा जंगरे लेई अपनि सेना अकोट्ठी केरि राहोरोए। तैना दूर मुल्खेरां ते अम्बरेरे होरि पासेरां एवरेन, हाँ यहोवा अपने क्रोधेरे हथियारन समेत सारे मुल्खे नाश केरनेरे लेई एवरोए।
अफ़सोस-अफ़सोस केरा, किजोकि यहोवारी न्यायेरी दिहाड़ी नेड़े; तै सर्वशक्तिमान परमेशरेरी तरफां मन्ना कि सत्यानाश केरने एवरोए। एस वजाई सेइं सेभी केरे हथ ढिल्ले भोइ गाले, ते हर एक्की मैन्हे हिम्मत हारोरीए, ते लोक डेरि गाले। तैन दुख ते तकलीफ भोल्ही; तैन बच्चो ज़ाने बाली कौन्शरी ज़ेरि तकलीफ भोल्ही। तैना हैरान भोइतां एक्की होरि तकेले; तैन केरां तुत्तरां फुकोई गालां।2
हेरा, यहोवारी दिहाड़ी सरक ते क्रोधे ते बगैर दयाई सेइं एइतीए कि तै धेरती उज़ाड़े ते पापी लोकन तैस मरां नाश केरे। किजोकि अम्बरेरे ज़ेत्रे भी तारेन ते बड्डे-बड्डे नक्षत्र अपनि लौ न देले, ते दिहाड़ो निस्ते-निस्ते आंधरू भोइ गालू, ते चाँदनी भी अपनि लौ न देली।3 अवं दुनियारे लोकन तैन केरि बुरैइारे वजाई सेइं ते ज़ालमन तैन केरे पापां केरि सज़ाह देलो, ते घमण्डी लोकां केरू घमण्ड ट्लोड़तां छ़डेलो, ते ज़ुलम केरनेबालां केरू भी घमण्ड खतम केरतां छ़डेलो। अवं मैन्हु कुन्दने करां, ते ओपीरेरे सोन्ने करां भी जादे माघो केरेलो। एल्हेरेलेइ अवं अम्बर हिलेइलो, ते ज़मीन भी एपनी जगाई पुड़ हिल्ली गाली एन सेना केरे यहोवा परमेशरेरे सरक ते भड़कोरे क्रोधेरे दिहाड़े भोल्हु। ते तैना ज़ेन्च़रे निशानोरे हिरन; या पुहाले बगैर भैड्डां केरे ज़ेरे सब अपने लोकां केरे पासे फिरेले ते अपने-अपने मुल्खे जो नेश्शी गाले। ज़ै कोई ट्लेइयोई गालो, तैस मझ़मेइं च़िरतां छ़डेले, ते ज़ैना ढेपोई गाले, तैना तलवारी सेइं मारे गाले। तैन केरे बाल बच्चे मारे गाले; ते तैन केरां घरां लुट्टां गालां, ते तैन केरि कौन्शन सेइं कुकर्म कियो गालो।
यहोवा ज़ोते हेरा, अवं तैन केरे खलाफ मादी लोकन भड़केइलो ज़ैना न त चाँदी तोपेले ते न सोन्नेरू लालच़ केरेले। तैना तीरन सेइं जुवानन मारेले, तैना न त बच्चन पुड़ तरस केरेले, ते न मट्ठन पुड़ तरस खाएले। बाबेल ज़ै सारे रियासतन करां खूबसूरते, ते ज़ेसेरे शोभाई पुड़ कसदी लोक फुलतन, तैन नगर एन्च़रे भोइ गालू ज़ेन्च़रे सदोम ते गमोरा, ज़ैखन परमेशरे तैना नगरां नाश कियां।4 तैन बाबेल नगर भी फिरी कधी आबाद न भोल्हु, ते पीढ़ी-पीढ़ी तगर तैस मां कोई न बसेलो; अरबी लोक भी तैस मां डेरे खड़े न केरेले, ते न कोई पुहाल अपने जानबर तैस मां बिशालेलो। तैड़ी जंगली जानबर बिश्शेले, ते बुल्लू तैन केरे घरन मां राले, तैड़ी शुतुर्मुर्ग बस्सेले, ते जंगली थाव्वे तैड़ी छालां मारेले।5 तैस नगरेरे राज़ भवने मां हुँडार, ते तैसेरे घरन मां गिद्दां बाशेलां, तैसेरे नाश भोनेरो वक्त नेड़े एवरोए, ते तैसेरे दिहाड़े हुनी जादे न राए।
Source notes (5)
- Footnote दाखल भोन मतलब बाबेलेरे घमण्डी नगरे मां।
- Cross-reference 1 थिस. 5:3.
- Cross-reference मत. 24:29;मरक. 13:24;प्रका. 6:12-13.
- Cross-reference उत्प. 19:23-29.
- Cross-reference प्रका. 18:2.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.