Bhadrawahi Bible
यशायाह 11
यिशैरे वंशेरो राज़ केरनेरो वक्त
तैखन यिशैरे ढिक्के1 मरां अक डालड़ी निसेली ते तैसेरे ज़िले मरां अक शाख निस्तां फलदार भोल्ही।2 ते यहोवारी आत्मा तैस पुड़ एज्जेली,3 अक्ल ते समझ़री आत्मा, योजना ते शेक्तरी आत्मा, ते ज्ञान ते यहोवारे डरेरी आत्मा।4
ते तैस यहोवारो डर खुशबूअरो ज़ेरो पसंद एज्जेलो। तै तुत्तर हेरतां न्याय न केरेलो ते न अपने कन्नां केरे शुन्नेरे मुताबिक फैसलो केरेलो;5 पन तै कंगालां केरो न्याय धार्मिकताई सेइं, ते धेरतरे हलीम लोकां केरो फैसलो सच़्च़ैई सेइं केरेलो; ते तै धेरती अपने वचनेरे सोटे सेइं मारेलो, ते अपने फुक्की सेइं दुष्टे मिटेई छ़डेलो।6 धार्मिकता तैसेरो कमरबन्ध भोल्ही ते सच़्च़ाई तैसेरे कमरेरो पटको भोल्हो।7
एक्सां गिद गबड़े सेइं साथी रालू, ते ड्लाघ छ़ेड़े सेइं साथी रालो, ते बछ़ड़ू शेरे सेइं साथी ते पलोरो दांत ट्लाईए साथी राले, ते अक निकड़ू मट्ठू तैन केरि अगवाई केरेलू। बछ़ी ते इछ़नी साथी च़रेली ते तैन केरे बच्चे अकोट्ठे बिश्शेले; ते शेर दांतेरो ज़ेरो घास च़रेलो। दुद्ध पीतो बच्चो सप्पेरे मुशोढ्ली पुड़ खैढेलो ते दुद्ध शारने बालू मट्ठू सप्पेरे मुशोढ्ली मां हथ छ़डेलू। मेरे पवित्र पहाड़े8 पुड़ न त कोई दुख देलो ते न कोई नुकसान पुज़ालो; किजोकि धरती यहोवारे ज्ञाने सेइं एरी भेरोली ज़ेन्च़रे समुन्दर पैनी सेइं भेरोते।
इस्राएली लोकां केरू दुबारां अकोट्ठू भोनू
तैस मौके यिशैरू ज़ील9 मुल्खे-मुल्खेरे लोकां केरे लेई अक झण्डेरू ज़ेरू भोल्हु; ते सब रियासतां केरे लोक तैस तोपेले, ते तैसेरी आरामेरी ठार महिमा बाली भोल्ही।10
तैस मौके प्रभु अपनो हथ दूइयोवं फेरे अग्रोवं केरतां ज़ैना बच़ोरेन, ज़ैना तैसेरी प्रजारे लोक रेई जेवरेन, अश्शूर, मिस्र पत्रोस, कूश, एलाम, शिनार, हमात इन मुल्खन मरां, ते भूमध्य सागर जज़ीरन मरां मुल्ले घिन्तां छुटालो। तै गैर कौमां केरे लेई झण्डो खड़ो केरतां इस्राएलेरे तैन लोकन अकोट्ठो केरेलो, ज़ैना कढोरे थिये, तै यहूदारे सेभी खिलारोरे लोकन धेरतरे च़ेवरे पासना अकोट्ठो केरेलो। एप्रैम फिरी जलन न केरेलो, ते यहूदारे तंग केरनेबाले कट्टे गाले; न त एप्रैम यहूदा सेइं जलन केरेलो ते न यहूदा एप्रैमे तंग केरेलो। पन इस्राएल ते यहूदारे लोक अकोट्ठे भोइतां पश्चिमेरे पासे पलिश्ती केरे कंधन पुड़ हमलो केरेले, ते मिलतां पूर्वेरे लोकन लुटेले। तैना एदोमे पुड़ ते मोआबे पुड़ हथ खड़ो केरेले, ते अम्मोनी लोक तैन केरे अधीन भोइ गाले। यहोवा मिस्रेरे समुन्दरे शुकेइतां छ़डेलो, ते फरात दरियाए पुड़ अपनो हथ रेखतां गेर्मी सेइं तैस शुकेइतां छ़डेलो कि तैसेरे सत नाले बनालो, ते लोक बूट लेइतां भी पार भोइ गाले।11 तैसेरे बच़ोरे लोकां केरे लेई अश्शूरे मरां अक एरी सड़क भोल्ही, ज़ेरि मिस्र मुल्खे सेइं च़ले एजनेरे वक्ते इस्राएलेरे लेई भोवरी थी।
Source notes (11)
- Footnote यिशैरे ढिक्के यिशै दाऊद राज़ेरो बाजी थियो, इड़ी दाऊद राज़ेरे बारे मां ज़िक्र भोइ राहोरोए ज़ैन यरूशलेम नगरे मां थियूं।
- Cross-reference प्रेरित. 13:23;यिर्म. 23:5;प्रका. 22:16.
- Footnote एक्की नंव्वे राज़ेरे बारे मां ज़ै दाऊदेरे खानदाने मरां भोल्हो।
- Cross-reference इफि. 1:17;यशा. 42:1;यूह. 14:17.
- Cross-reference यूह. 7:24;8:15-16.
- Cross-reference 2 थिस. 2:8;प्रका. 19:15.
- Cross-reference यशा. 59:17;इफि. 6:14.
- Footnote पवित्र पहाड़े सिय्योन पहाड़े पुड़ भवनेरे पासे
- Footnote यिशैरू ज़ील मतलब अक नंव्वो राज़ो दाऊदेरे खानदाने मरां।
- Cross-reference रोम. 15:12.
- Cross-reference जक. 10:11.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.