Bhadrawahi Bible
उत्पत्ति 5
आदमेरी खानदानी
आदमेरी खानदानी ई आहे। ज़ैखन परमेशरे इन्सानेरी रच़ना की तैखन तैने अपने रूपे मां तै बनाव। तैने नर ते नारी बनेइतां इन्सानां केरि रच़ना की ते तैन्न बरकत दित्ती, ते तैन केरे रच़नेरे दिहाड़े तैन केरू नवं आदम रख्खू। ज़ैखन आदम 130 सालां केरो भोव, तैखन तैसेरे ज़िरिये तैसेरी बराबरी मां तैसेरू ज़ेरू अक मट्ठू पैदा भोवं। तैने तैसेरू नवं शेत रख्खू। ते शेतेरे ज़रमनेरां पत्ती आदम 800 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां आदमेरी सारी उमर 930 साल भोइ, तैल्ला पत्ती तै मेरि जेव।
ज़ैखन शेत 105 सालां केरो भोव, त तैखन एनोश पैदा भोव। एनोशेरे ज़रमनेरां पत्ती शेत 807 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां शेतेरी सारी उमर 912 साल भोइ; तैल्ला पत्ती तै मेरि जेव।
ज़ैखन एनोश 90 सालां केरो भोव, तैखन तैसेरो केनान पैदा भोव। केनानेरे ज़रमनेरां पत्ती एनोश 815 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां एनोशनेरि सारी उमर 905 साल भोइ; तैल्ला पत्ती तै मेरि जेव।
ज़ैखन केनान 70 सालां केरो भोव, तैखन महललेलेरू1 ज़र्म भोवं। महललेलेरे ज़रमनेरां पत्ती केनान 840 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां केनानेरि सारी उमर 910 साल भोइ; तैल्ला पत्ती तै मेरि जेव।
ज़ैखन महललेल 65 सालां केरो भोव, तैखन तैसेरो येरेद पैदा भोव। येरेदेरे ज़रमनेरां पत्ती महललेल 830 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां महललेलेरि सारी उमर 895 साल भोइ; तैल्ला पत्ती तै मेरि जेव।
ज़ैखन येरेद 162 सालां केरो भोव, तैखन तैसेरो हनोक पैदा भोव। हनोकेरे ज़रमनेरां पत्ती येरेद 800 साल ज़ींतो राव, ते तैस होरां भी मट्ठां कुइयां भोआं। एन्च़रां येरेदेरि सारी उमर 962 साल भोइ; तैल्ला पत्ती तै मेरि जेव।
ज़ैखन हनोक 65 सालां केरो भोव, तैखन तैसेरो मतूशेलह पैदा भोव। मतूशेलहेरे ज़रमनेरां पत्ती हनोक 300 सालन तगर परमेशरे सेइं साथी-साथी च़लतो राव, ते तैसेरां होरां भी मट्ठां कुइयां पैदा भोआं। एन्च़रां हनोकेरी सारी उमर 365 साल भोइ। हनोक परमेशरे सेइं साथी-साथी च़लतो थियो; फिरी तै लोप भोइ जेव किजोकि परमेशरे तै नेवरो थियो।
ज़ैखन मतूशेलह 187 सालां केरो भोव, तैखन तैसेरो लेमेक पैदा भोव। लेमेकेरे ज़रमनेरां पत्ती मतूशेलह 782 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां मतूशेलहेरी सारी उमर 969 साल भोइ; तैल्ला पत्ती तै मेरि जेव।
ज़ैखन लेमेक 182 सालां केरो भोव, तैखन तैसेरू अक मट्ठू पैदा भोवं। तैने इन ज़ोइतां तैसेरू नवं नूह रख्खू, कि “यहोवा ज़ैने धेरती जो लानत दित्ती, तैसेरे बारे मां इन मट्ठू इश्शे कम्मेरू, ते तैस बड़े मेहनती मां ज़ै अस केरतम, असन आराम देलू।” नूहेरे ज़रमनेरां पत्ती लेमेक 595 साल ज़ींतो राव, ते तैसेरां होरां भी मट्ठां कुइयां पैदा भोआं। एन्च़रां लेमेकेरी सारी उमर 777 साल भोइ; तैल्ला पत्ती तै मेरि जेव।
ज़ैखन नूह 500 सालां केरो थियो; तैखन तैसेरे कौन्शी अक मट्ठू भोवं, ते तैनेईं तैसेरू नवं शेम रख्खू। फिरी तैन अक होरू मट्ठू भोवं, ते तैनेईं तैसेरू नवं हाम रख्खू। फिरी तैन ट्लेइयोवं मट्ठू भोवं ते तैनेईं तैसेरू नवं येपेत रख्खू।
Source notes (1)
- Footnote महललेल मतलब परमेशरेरी बडीयाई।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.