Bhadrawahi Bible
उत्पत्ति 39
पोतीपरेरे घरे यूसुफ
ज़ैखन यूसुफ मिस्र मुल्खे मां पुज़व जेव, तैखन पोतीपर नंव्वेरो अक मिस्री, ज़ै फ़िरौन राज़ेरो हाकिम थियो, ते मेहलेरे पहरेदारां केरो प्रधान थियो, तै इश्माएली केरे हथेइं ज़ै तैड़ी पुझ़ेवरो थियो तैनी तै घिन्नो। यूसुफ अपने मिस्री मालिकेरे घरे मां रहतो थियो, ते यहोवा तैस सेइं साथी थियो; एल्हेरेलेइ तै कामयाब मैन्हु भोइ जेव। ते यूसुफेरे मालिके हेरू, कि यहोवा तैस सेइं साथीए, ते तै ज़ैन कम केरते तैस यहोवा तैसेरे हथ्थे कामयाब केरि देते। तैखन तैसेरे मालिकेरी सिद्धी नज़र तैस पुड़ भोइ, ते तै तैसेरी सेवा केरनेरे लेई च़ुनो जेव; फिरी तैनी यूसुफ अपने घरेरो अधिकारी बनेइतां अपनु सब किछ तैसेरे हथ्थे मां सौंफी दित्तू। ज़ैखन तैनी तै अपने घरेरो ते एपनी सैरी जेईदातरो अधिकारी बनाव, तैखन करां यहोवाए यूसुफेरे वजाई सेइं तैस मिस्री मैन्हेरे घरे बरकत देने लगो; ते कुन घरे मां ते कुन मैइदाने मां, तैसेरू ज़ैन किछ थियूं, सेब्भन पुड़ यहोवा बरकत देने लगो। एल्हेरेलेइ तैनी रोट्टरां अलावा अपनु सब किछ यूसुफेरे हथ्थे मां सौंफी दित्तू,
यूसुफ हेरनो रोड़ो ते बड़ो खूबसूरत थियो। इन गल्लां केरे बाद एरू भोवं, कि तैसेरे मालिकेरी कौन्शां यूसुफेरे पासे तक्कू ते ज़ोवं, “मीं सेइं साथी झ़ुल्ल।” पन तैनी इन्कार केरतां अपने मालिकेरी कौन्शी सेइं ज़ोवं, “शुन, ज़ैन किछ इस घरे मां मेरे हथ्थे मांए; तैस मेरो मालिक किछ न ज़ाने, ते तैनी अपनु सब किछ मेरे हथ्थे मां सौंफेरूए। इस घरे मां मीं करां बड्डो कोई नईं; ते तैनी तेरे अलावा ज़ै तू तैसेरी कौन्शस, किछ नईं रखेरू; एल्हेरेलेइ भला, अवं एत्रो बड्डो पाप केरतां परमेशरेरो पापी किजो बेनि?” ते एरू भोवं कि तै रोज़ यूसुफे सेइं गल्लां केरती राई, पन तैनी तैसेरी गल न मन्नी कि तैस सेइं साथी झ़ुल्ले या तैस साथी राए। एक्सां एरू भोवं कि यूसुफ अपनु कम काज़ केरने घरे मां जेव, ते घरेरे नौकरन मरां कोई भी घरे न थियो। तैखन तैस कौन्शां तैसेरू लिगड़ ट्लेइतां ज़ोवं, “मीं सेइं साथी झ़ुल्ल,” पन तै अपनो चोगो तैसारे हथ्थे मां छ़ेडतां बेइरोवं नेश्शी जेव। एन हेरतां कि तै अपनु लिगड़ मेरे हथ्थे मां छ़ेडतां बेइरोवं नेश्शी जेव, तैस कौन्शां अपने घरेरे नौकरन कुजेइतां ज़ोवं, “हेरा, तै अक इब्रानी मैन्हु इश्शे कां एल्हेरेलेइ रखोरोए कि इश्शी बेइज़्ज़ती केरे, तै त मीं सेइं साथी झ़ुलनेरे मतलबे सेइं अन्तर एवरो थियो, ते मीं ज़ोरे सेइं चिन्डां मैरी। ते मेरी चिन्डां केरि शौर शुन्तां तैनी अपनो चोगो भी मेरे हथ्थे मां छ़ेडतां नेश्शी जेव।” ते तैसां तैसेरो चोगो अपने मालिकेरे घरे एजने तगर एप्पु कां रख्खो। ज़ैखन तैसेरो मुन्श घरे अव, तैखन तैसां अपने घरे बाले सेइं सैरी गल्लां ज़ोई, “तै इब्रानी नौकर, ज़ै तीं एप्पु कां रखोरोए, तै मेरी बेइज़्ज़ती केरनेरे लेई मीं कां एवरो थियो। ते ज़ैखन अवं ज़ोरे सेइं चिन्डां लगी मारने, त तैखन तै अपनो चोगो भी मीं कां छ़ेडतां बेइरोवं नेश्शी जेव।” तैनी एपनी कौन्शरी इना गल्लां शुन्तां कि तेरे नौकरे मीं सेइं एरू-एरू कम कियोरूए, यूसुफेरे मालिके बड़ी सरक अई।
यूसुफ कैदखाने मां छ़डनो
ते यूसुफेरे मालिके तै ट्लेइतां कैदखाने मां छ़डो, ज़ैड़ी राज़ेरे कैदी बन्द थिये; ते तै तैस कैदखाने मां राव। पन यहोवा यूसुफे सेइं साथी-साथी राव, ते तैस पुड़ दया की, ते कैदखानेरे दरोगारी सिद्धी नज़र तैस पुड़ राई। एल्हेरेलेइ कैदखानेरे दरोगा तैना सब कैदी ज़ैना कैदखाने मां थिये, यूसुफेरे हथ्थे सौंफी दित्ते; ते तैना ज़ैन-ज़ैन कम तैड़ी केरते थिये, तैन तैसेरे हुक्मे सेइं भोतू थियूं। यूसुफेरी ज़िमेदैरी मां ज़ैन किछ थियूं तैस मरां कैदखानेरे दरोगा कोई भी चीज़ हेरनी न थी पेती; किजोकि यहोवा यूसुफे सेइं साथी थियो; ते तै ज़ैन किछ केरतो थियो, यहोवा तैस कामयाबी देतो थियो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.