Bhadrawahi Bible
उत्पत्ति 37
यूसुफ ते तैसेरे ढ्ला
इसहाकेरे मरनेरां बाद याकूब त कनान मुल्खे मां रहतो थियो, ज़ैड़ी तैसेरो बाजी परदेशी बेनतां रहतो थियो। ते याकूबेरे खानदानेरे बारे मां एन्च़रे सेइं आहे: यूसुफ 17 सालां केरो भोइतां अपने ढ्लान सेइं साथी गब्बां च़ारतो थियो; ते तैन मट्ठू अपने बाजी केरि कौन्श बिल्हा, ते जिल्पारे मट्ठन सेइं साथी रेइयां केरतू थियूं; ते तैन केरि बुरैई केरि खबर अपने बाजी देतो थियो। ते इस्राएल अपने सेब्भी मट्ठन करां बेद्धतां यूसुफे सेइं जादे प्यार केरतो थियो, किजोकि तैन तैसेरे बुढापेरू मट्ठू थियूं: ते तैनी तैसेरेलेइ रंग-बिरंगो चोगो बनेवरो थियो। पन ज़ैखन तैसेरे ढ्लाएईं एन हेरू, कि इश्शो बाजी असन सेब्भी ढ्लान करां जादे तैस सेइं प्यार केरते, तैखन तैना तैस सेइं बैर केरने लगे ते तैस सेइं रोड़ेच़ारे गल भी न थिये केरते।
यूसुफेरू सुपनु
एक्सां यूसुफे अक सुपनु लावं, ते तैनी तैन सुपनु अपने ढ्लान सेइं शुनावं तैखन तैना तैस सेइं मना जादे बैर केरने लगे। तैनी तैन सेइं ज़ोवं, “ज़ैन सुपनु मीं लाहेरूए, तैन शुना, असां सब लोक उडारे मां फेक्की बन्धने लगोरेम, ते मेरी फक्की सिद्धी खड़ी भोइ जेई; तैखन तुश्शे फेक्केइं च़ेवरे पासना घेरो दित्तो, ते मेरी फेक्की कां झुकने लेगि।” तैखन तैसेरे ढ्लाएईं तैस सेइं ज़ोवं, “कुन सच़्च़े तू असन पुड़ राज़ केरेलो? या कुन सच़्च़े तू असन पुड़ हुकूमत केरेलो?” एल्हेरेलेइ तैना तैसेरे सुपने ते तैसेरी गल्लां केरि वजाई सेइं मना जादे बैर केरने लगे। फिरी तैनी अक होरू सुपनु लावं, ते तैनी तैन सुपनु अपने ढ्लान सेइं ज़ोवं, “शुना, मीं अक होरू सुपनु लाहेरूए, कि दिहाड़ो ते चाँदनी, ते यारहे तारे मीं कां मथ्थो टेकने लगे।” एन सुपनु तैनी अपने बाजी, ते अपने ढ्लान सेइं शुनावं; तैखन तैसेरे बाजी तैस झ़िड़केइतां ज़ोवं, “एन केरहु सुपनूएं, ज़ैन तीं लाहेरूए? कुन सच़्च़े अवं ते तेरी अम्मा ते तेरे ढ्ला सब गेइतां तीं कां तल्ले झुकतां मथ्थो टेकमेले?” तैसेरे ढ्ला त तैस पुड़ मना जादे ज़लते थिये; पन तैसेरे बाजेईं तैसेरी तैना गल्लां याद रेखी।
एक्सां तैसेरे ढ्ला अपने बाजी केरां गब्बां च़ारने शेकेम सूबे जो च़ले जे। तैखन इस्राएले यूसुफे सेइं ज़ोवं, “तेरे ढ्ला त शेकेमे मां गब्बां च़ारने लगोरेन, एल्हेरेलेइ गा, अवं तीं तैन कां भेज़ताईं।” यूसुफे तैस सेइं ज़ोवं, “ज़रूर बाजी।” याकूबे तैस सेइं ज़ोवं, “गा, अपने ढ्लां केरो ते गब्बां केरो हाल चाल हेरतां एई कि तैना सब ठीक आन, फिरी तैन केरि खबर मीं कां एन्हतां शुना।” ते तैनी तै हेब्रोनेरी वैदी मांजो भेज़ो, ते तै शेकेमे मां अव। ते केन्चे मैन्हें तै मैइदाने मां इरां-उरां च़लतो फिरतो लाव ते तैस पुछ़ू, “तू कुन तोप्पतस?” तैनी ज़ोवं, “अवं त अपने ढ्लान तोप्पने लगोरोईं, महरबानी केरतां मीं सेइं ज़ोथ, कि तैना गब्बां कोड़ि लगोरेन च़ारने?” तैनी मैन्हें ज़ोवं, “तैना त इट्ठां च़ले जेवरेन; ते मीं तैन करां इन ज़ोंते शुनेरूए, ‘एज्जा, अस दोतान सूबे जो च़लम।’” एल्हेरेलेइ यूसुफ अपने ढ्लान पत्ती च़लो जेव, ते तैस तैना दोताने मां मैल्हे।
यूसुफेरू गुलाम भोनेरे लेई बेच़ू गानू
ज़ेरो तैनेईं तै दूरेरां एइतो लाव, त तैस नेड़े एजने करां पेइले तैस मारनेरी साज़िश की। ते तैना एप्पु मांमेइं ज़ोने लगे, “हेरा, तै सुपनु लहंने बालो एवरोए। एल्हेरेलेइ एज्जा, अस एस मैरतां एक्की गत्ते मां छ़ेडी देम, ते एन ज़ोमेले, कि केन्चे जंगली जानबरे तै मारोरोए, ते फिरी हेरमेले कि तैसेरे सुपनेरो कुन फल भोल्हो।” एन शुन्तां रूबेने तैस एन केरे हथ्थे करां बच़ांनेरे इरादे सेइं ज़ोवं, “अस एस सच़्च़े जाना न मारम।” फिरी रूबेने तैन सेइं ज़ोवं, “खून न केरथ, तैस जंगले मां इस गत्ते मां छ़डम, ते तैस पुड़ हथ खड़ो न केरम।” तै तैस तैन करां छुटेइतां अपने बाजी कां पुज़ानो चातो थियो। एल्हेरेलेइ एरू भोवं कि ज़ैखन यूसुफ अपने ढ्लान कां पुज़्ज़ो त तैखन तैनेईं तैसेरो रंग-बिरंगो चोगो, ज़ै तैनी लेवरो थियो, खोलव। ते यूसुफ छ़ुइतां गत्ते मांजो शैरी छ़डो। ते तैन गत शुकोरू थियूं ते तैस मां किछ पानी न थियूं।
फिरी तैना रोट्टी खाने बिश्शी जे; ते हेरने लगे, कि इश्माएली केरो अक जथो ऊँटन पुड़ खुशबूदार चीज़ां, बलसान, ते गन्धरस लेद्दतां, गिलाद मुल्खेरां मिस्रे जो च़लोरो थियो। तैखन यहूदाए अपने ढ्लान सेइं ज़ोवं, “अपनो ढ्ला मारने सेइं असन कुन फैइदो भोल्हो? एज्जा, असां तैस इश्माएली लोकन जो बेच़ी छ़डम, ते अपनो हथ तैस पुड़ खड़ो न केरम, किजोकि तै इश्शो ढ्ला ते इश्शी हड्डी ते मासे।” ते तैसेरे ढ्लाएईं तैसेरी गल मन्नी। तैखन मिद्यानी बुपारी तैस पासेरां च़लते-च़लते तैन कां नेड़े पुज़्ज़े। ते यूसुफ तैसेरे ढ्लाएईं तैस गत्ते मरां बेइर कढो, ते इश्माएली बुपारी लोकन जो चैंदरे 20 सिकन1 मां बेच़ी दित्तो; ते तैनेईं यूसुफ मिस्र मुल्खे जो नियो। रूबेने वापस एइतां कुन हेरू कि यूसुफ गत्ते मां नईं; एल्हेरेलेइ तैनी दुखे मां अपना लिगड़ां छ़िन्दां। ते अपने ढ्लान कां वापस एइतां ज़ोने लगो, “मट्ठू त तैड़ी नईं; हुनी अवं कोरहां गेईं?” तैखन तैनेईं यूसुफेरो चोगो आनो, ते अक थाव्वो मैरतां तैसेरे खूने मां तै चोगो डोबो। ते तैनेईं तै रंगदार चोगो अपने बाजी कांजो एन्हतां ई बिस्तार भेज़ो, “ई असन मैल्होरोए, ते हेर ते पिशान कि ई तेरे मट्ठेरो चोगोए या नईं।” याकूबे तै पिशानो, ते ज़ोवं, “हाँ ई मेरे मट्ठेरो चोगोए कोन्ची जंगली जानबरे तै मारोरोए, सच़्च़े यूसुफ मैरी छ़डोरोए।” तैखन याकूबे दुखे मां अपना लिगड़ां छ़िन्दां ते अपने मझ़े टाट पलैट्टू, ते अपने मट्ठेरे लेई काई दिहाड़न तगर मातम केरतो राव। ते तैसेरे सेब्भी मट्ठे कुइयेईं तैस तसल्ली देनेरी कोशिश की, पन तैस तसल्ली न भोइ, ते तै एन ज़ोतो राव, “अवं त अपने मट्ठेरे लेई लेरां देंतो अधलोके मां पुज़्ज़ी गानोईं।” एल्हेरेलेइ, तैसेरो बाजी तैसेरेलेइ लेरां देंतो राव। तैल्लां पत्ती मिद्यानी लोकेईं यूसुफ मिस्रे मां नेइतां पोतीपरे जो बेच़ी छ़डो, ज़ै फ़िरौनेरो अक हाकिम, ते मेहलेरे पहरेदारां केरो प्रधान थियो।
Source notes (1)
- Footnote चैंदरे 20 सिकन तैस वक्ते 220 ग्राम चाँदी एक्की जुवान गुलामेरी कीमत थी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.