Bhadrawahi Bible
उत्पत्ति 35
याकूबेरू बेतेले जो वापस एजनू
थोड़े दिहाड़ना बाद परमेशरे याकूबे सेइं ज़ोवं, “इट्ठां निस्तां बेतेल नगरे जो च़लो गा, ते तैड़ी रेइयां; ते तैड़ी परमेशरेरे लेई अक वेदी बना, ज़ैनी तीं तैस वक्ते दर्शन दित्तेरू थियूं, ज़ैखन तू अपने ढ्ला एसावेरे डरे सेइं नश्शोरो थियो।” तैखन याकूबे अपने टब्बरे सेइं, ते तैन सेब्भन भी ज़ैना तैस सेइं साथी थिये, ज़ोवं, “तुश्शे दरमियान ज़ैना बखले देबतां केरि मूरतिन, तैन केढतां शारा; ते अपने आपे शुच्चे केरतां अपना धोवरां लिगड़ां लाथ; ते एज्जा, अस इट्ठां निस्तां बेतेल नगरे जो गाम; तैड़ी अवं परमेशरेरे लेई अक वेदी बनेइलो, ज़ैनी दुखेरे दिहाड़े मेरी प्राथना शुनी, ते ज़ैस बत्तां अवं च़लतो थियो, तैस मां तै मीं सेइं साथी राव।” एल्हेरेलेइ तैनेईं ज़ेत्रे बखले देबते ते कन्नां केरे कुण्डल तैन कां थिये, तैना सब याकूबे कां दित्ते, ते तैनी तैना सब बंज़ेरे बुट्टे हैठ दब्बे, ज़ै ठार शेकेमेरे नेड़े।
तैखन तैना अग्रोवं च़ले ते तैन केरे च़ेवरे पासां केरे नगरां केरे रानेबाले लोकन मां परमेशरेरी तरफां एरहो डर पैदा भोव, कि तैनेईं याकूबेरे मट्ठां केरो पीछो न कियो। याकूब ते ज़ैना तैस सेइं साथी थिये, तैना कनान मुल्खेरां लूज नगरे जो च़ले जे। तैस नगरे जो बेतेल1 भी ज़ोतन। तैड़ी तैनी अक वेदी बनाई, ते तैस ठारारू नवं एल-बेतेल2 रख्खू; किजोकि ज़ैखन तै अपने ढ्लाएरे डरे सेइं नेश्शी जेवरो थियो तैखन परमेशर तैस पुड़ तैड़ी बांदो भोवरो थियो। तैखन रिबकारी घाई भी ज़ेसेरू नवं दबोरा थियूं मेरि जेई, ते तैस बेतेलेरे बंज़ेरे बुट्टे हैठ मित्ती दित्ती, ते तैस बंज़ेरे बुट्टेरू नवं अल्लोनबक्कूत3 रख्खू।
फिरी याकूबे पद्दनरामेरां एजनेरां बाद परमेशरे दूइयोवं फेरे दर्शन देइतां तैस बरकत दित्ती। ते परमेशरे तैस सेइं ज़ोवं, “हुन्ना तगर त तेरू नवं याकूब राहोरूए; पन अग्रोवं जो तेरू नवं याकूब न रालू, तींजो इस्राएल ज़ोले।” एन्च़रां परमेशरे तैसेरू नवं इस्राएल रख्खू। फिरी परमेशरे तैस सेइं ज़ोवं, “अवं सर्वशक्तिमान परमेशर आईं। तू फुलस-फलस ते बधस; ते तीं मरां अक कौम बल्के कौमां केरि अक मण्डली पैदा भोल्ही, ते तेरे कौमी मरां राज़े पैदा भोल्हे। ते ज़ै मुल्ख मीं अब्राहम ते इसहाके दित्तोरोए, तैए मुल्ख तीं देताईं, ते तेरे बाद तेरे खानदाने भी देइलो।” तैखन परमेशरे तैस ठारी करां, ज़ैड़ी तैनी याकूबे सेइं गल्लां कियोरी थी, तैन करां निस्तां च़लो जेव। ते ज़ैस ठारी परमेशरे याकूबे सेइं गल्लां कियोरी थी, तैड़ी याकूबे अक घोड़ खड़ो कियो, ते तैस पुड़ पीनेरी च़ढ़तल4 ते तेल उलटाव। ज़ैड़ी परमेशरे याकूबे सेइं गल्लां कियोरी थी, तैनी तैस ठारारू नवं बेतेल रख्खू।
राहेलरी मौत
फिरी तैना बेतेल नगरे मरां अग्रोवं च़ले जे; ते एप्राता ज़ैन थोड़े ज़ेरे दूर थियूं, कि राहेली बच्चो ज़ांनेरी तकलीफ भोने लगी। ज़ैखन तैस बड़ी जादे तकलीफ भोती थी तैखन घैइयाँ तैस सेइं ज़ोवं, “डर न; इस फेरे भी तीं मट्ठू भोनूए।” तैखन एरू भोवं कि तै मेरि जेई, ते तैसां मरते बार तैस मट्ठेरू नवं बेनोनी5 रख्खू; पन तैसेरे बाजी तैसेरू नवं बिन्यामीन 6रख्खू। ते राहेल मेरि जेई, ते एप्राता, मतलब बैतलहम नगरेरे बत्ती मां तै दब्बो जेई। ते याकूबे तैसेरी कब्री पुड़ अक बड्डो घोड़ खड़ो कियो: राहेलरी कब्रारो तै घोड़ अज़ तगर हेजू भी आहे। फिरी इस्राएले अग्रोवं च़लनू शुरू कियूं, ते एदेर नंव्वेरे बुर्ज़े करां अग्गर गेइतां अपनो डेरो लव।
याकूबेरां मट्ठां
ज़ैखन इस्राएल तैस मुल्खे मां बस्सोरो थियो, तैखन एक्सां एरू भोवं कि रूबेने गेइतां अपने बाजेरी रखैली बिल्हा सेइं कुकर्म कियो; ते इस गल्लरो इस्राएले पतो लग्गो। याकूबेरां 12 मट्ठां भोआं। तैन मरां लिआरां मट्ठां इना थियां: याकूबेरू बड्डू मट्ठू रूबेन, फिरी शिमोन, लेवी, यहूदा, इस्साकार, ते जबूलून। ते राहेलेरां मट्ठां इना थियां: यूसुफ ते बिन्यामीन। ते राहेलरी नौकरानी बिल्हारां मट्ठां इना थियां: दान ते नप्ताली। ते लिआरी नौकरानी जिल्पारां मट्ठां इना थियां: गाद ते आशेर। याकूबेरां इना मट्ठां भोआं, ज़ैना तैस सेइं पद्दनरामे मां पैदा भोआं।
इसहाकेरि मौत
याकूब मम्रेरे किर्यतअर्बा मां ज़ैस जो हेब्रोन ज़ोतन अपने बाजी इसहाके कांजो अव, ज़ैड़ी अब्राहम ते इसहाक परदेशी भोइतां राहोरे थिये। इसहाकेरि उमर 180 साल भोइ। ते इसहाक मेरि जेव, ते तै बुढो भोइतां ते लम्मी उमरारो भोइतां अपने मुओरे दादे-पड़दादन मां गेइतां मिली जेव; ते तैसेरे मट्ठेईं एसाव ते याकूबे तैस मित्ती दित्ती।
Source notes (6)
- Footnote बेतेल बेतेलेरो परमेशर
- Footnote एल-बेतेल मतलब बेतेलेरो परमेशर।
- Footnote अल्लोनबक्कूत मतलब इन बुट्टे हैठ दबनेरे बारे मां हिराते।
- Footnote पीनेरी च़ढ़तल अक पीनेरी च़ढ़तल पीनेरी कोई भी चीज़ भोइ सकतीए इसेरो मकसद पवित्र बनानू आहे।
- Footnote बेनोनी दुखेरू मट्ठू रख्खू।
- Footnote बिन्यामीन मेरे दुखेरू मट्ठू।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.