Bhadrawahi Bible
उत्पत्ति 3
पापेरी शुरुआत
यहोवा परमेशरे ज़ेत्रे जंगली जानबर बनेवरे थिये, तैन सेब्भन मरां सप च़लाक थियो, ते तैने कौन्शी सेइं ज़ोवं, “कुन सच़्च़े, कि परमेशरे ज़ोवरूए कि, ‘तुस इस बागरे कोन्ची बुट्टेरो फल न खेइयथ?’” कौन्शां सप्पे सेइं ज़ोवं, “इस बागरे बुट्टन मरां अस फल खेइ सकतम; पन ज़ै बुट बागरे मझ़ाटे, तैसेरे फलेरे बारे मां परमेशरे ज़ोवरू कि तुस तैस न खेइयथ ते न तैस सेइं हुरथ, नईं त तुस मेरि गाले।” तैखन सप्पे कौन्शी सेइं ज़ोवं, “तुस पक्के न मरेले, बल्के परमेशर एप्पु ज़ानते कि ज़ैस दिहाड़े तुस तैसेरो फल खाएले तैस्से दिहाड़े तुश्शी एछ़्छ़ी खुल्ली गैली1, ते तुस भले ते बुरे ज्ञान हासिल केरतां परमेशरेरे बराबर भोइ गाले।” ते ज़ैखन कौन्शां हेरू कि तैस बुट्टेरो फल खाने मां रोड़ोए, ते हेरने मां मने पसंद एजनेबालोए, ते अक्ल देनेरे लेई काबल भी आहे, तैखन तैसां तैस मरां ट्लोड़तां खव; ते अपने मुन्शे भी दित्तो, ते तैने भी तैस सेइं साथी खव। तैखन तैन दूईयां केरि एछ़्छ़ी खुल्ली जेई, ते तैन्न पतो लग्गो कि तैना नग्गे आन; एल्हेरेलेइ तैनेईं फैगेरे बुट्टेरां पट्लां ज़ोड़ी-ज़ोड़ी लिगड़ां बनां।
पापेरो नितीजो
तैखन यहोवा परमेशर, ज़ै ड्लवझ़रे ठंडे वक्ते बागी मां एइतो थियो, तैसेरी आवाज़ तैनेईं शुनी। तैखन आदम ते तैसेरी कौन्श बागरे बुट्टन मांमेइं यहोवा परमेशरे करां छ़ेप्पी जेआं। तैखन यहोवा परमेशरे आदमे जो हक देइतां पुछ़ू, “तू कोड़ि आस?” तैने जुवाब दित्तो, “अवं तेरी आवाज़ बागी मां शुन्तां डेरि जेव, किजोकि अवं नग्गो थियो; एल्हेरेलेइ छ़ेप्पी जेव।” यहोवा परमेशरे पुछ़ू, “केनी तीं सेइं ज़ोवं कि तू नग्गोस? ज़ैस बुट्टेरो फल खाने जो मीं तीं ठाकोरू थियूं, कुन तीं तैसेरो फल खव?” आदमे जुवाब दित्तो, “ज़ै कौन्श तीं मीं साथी रानेरे लेई दित्तोरीए तैसां तैस बुट्टेरो फल मीं दित्तो, ते मीं खव।” तैखन यहोवा परमेशरे कौन्शी पुछ़ू, “तीं इन कुन कियूं?” कौन्शां जुवाब दित्तो, “सप्पे अवं टपलाई, एल्हेरेलेइ मीं खव।”
तैखन यहोवा परमेशरे सप्पे जो ज़ोवं, “तीं ज़ैन इन कियूं एल्हेरेलेइ तू सब पैलतू जानबरन, ते सब जंगली जानबरन मरां जादे लानतिस; तू पेटेरे भारे च़लेलो, ते ज़िन्दगी भर मित्ती च़टतो रालो; ते अवं तेरे ते इस कौन्शरे दरमियाने, ते तेरे औलादी ते इसेरे औलादरे दरमियाने मां बैर पैदा केरेलो, तै तेरी क्रोड़ी ढ्लेन्च़ेलो, ते तू तैसेरे थूड़ी पुड़ टक देलो।”
फिरी परमेशरे कौन्शी सेइं ज़ोवं, “अवं तेरी पीड़ ते तेरे गल्हे बिशनेरे दुखे खूब बधेइलो; तू तकलीफी सेइं बच्चे ज़र्म देली; ते तेरी खुवैइश तेरे मुन्शेरे पासे भोल्ही, ते तै तीं पुड़ हुकूमत केरेलो।”
ते आदमे सेइं परमेशरे ज़ोवं, “तीं अपने कौन्शरी गल शुनी, ते ज़ैस बुट्टेरे फलेरे बारे मां मीं तीं हुक्म दित्तोरो थियो कि तू तैस न खेइयां, तै तीं खव, एल्हेरेलेइ धरती तेरे वजाई सेइं लानती भोवरीए। तू तैसेरी पैदावार ज़िन्दगी भर दुखे सेइं खालो; ते तै तेरे लेई कंटन बालां झ़ैल्लां उगाली, ते तू उडारेरी पैदावार खालो; ते अपने कुपाएरे पसीनेरि रोट्टी खालो ते आखरी मां मित्ती मां मिली गालो; किजोकि तू तैस्से मरां बनेवरोस, तू मित्ती आस, ते फिरी मित्ती मां मिली गालो।”
आदमे अपने कौन्शरू नवं हव्वा2 रख्खू; किजोकि ज़ेत्रे मैन्हु ज़ींतेन तैन सेब्भी केरि अम्मा तैए। यहोवा परमेशरे आदम ते तैसेरे कौन्शरे लेई चमड़ेरां लिगड़ां बनेइतां तैन्न लुवां।
फिरी यहोवा परमेशरे ज़ोवं, “हेरा, मैन्हु भलू ते बुरेरू ज्ञान हासिल केरतां असन मरां एकेरे बराबर भोइ जेवरोए; एल्हेरेलेइ हुनी एरू न भोए, कि तै हथ अग्रोवं केरतां ज़िन्दगरे बुट्टेरो फल भी ट्लोड़तां खाए ते तै हमेशा ज़ींतो राए।” एल्हेरेलेइ यहोवा परमेशरे तै अदनेरे बागी मरां केढी छ़डो, कि तै तैस धेरती पुड़ ज़मीनदारी केरे ज़ैस मरां तै बनेवरो थियो। एल्हेरेलेइ आदम तैने केढी छ़डो ते ज़िन्दगरे बुट्टेरे बत्तरो पहरो देनेरे लेई अदनेरे बागरे पूर्वेरे पासे करूब ते च़ेवरे पासे फिरने बाली अग्गरी तलवार भी रख्खी।
Source notes (2)
- Footnote एछ़्छ़ी खुल्ली गैली मतलब समझ़नू
- Footnote हव्वा इब्रानी भाषाई मां हव्वारो मतलब ज़िन्दगीए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.