Bhadrawahi Bible
उत्पत्ति 29
याकूबेरू राहेली सेइं मिलनू
फिरी याकूबे अपनि बत ट्लाई, ते तै पूर्वेरे लोकां केरे पद्दनराम मुल्खे मां अव। फिरी तैनी हेरू, कि मैइदाने मां अक खुहे, ते तैड़ी गब्बां केरि ट्लाई केन्नी थी; किजोकि तैस्से मरां गब्बन पानी पियावं गातू थियूं, ते तैस खुहे पुड़ भारी घोड़ रखोरो थियो। ते ज़ैखन सब केन्नी तैड़ी अकोट्ठी भोइ गैती थी, तैखन पुहाल तैस घोड़े खुहे पुड़ेरां बुछ़ोतां गब्बन पानी पियाते थिये, ते फिरी घोड़ खुहे पुड़ तेन्च़रे रखते थिये। तैखन याकूबे पुहालन पुछ़ू, “हे मेरे ढ्लाव, तुस कोड़ि रहतथ?” तैनेईं ज़ोवं, “अस हारानेरे राने बालेम।” तैखन तैनी तैन पुछ़ू, “कुन तुस नाहोरेरे पोट्लड़े लाबाने ज़ानतथ?” तैनेईं ज़ोवं, “हाँ, अस तैस ज़ानतम।” फिरी तैनी तैन पुछ़ू, “कुन तै ठीके?” तैनेईं ज़ोवं, “हाँ, तै ठीके, ते हेर, तैसेरी कुई राहेल गब्बन एन्हतां इरां एवरीए।” तैनी ज़ोवं, “हेरा, हेजू त दिहाड़ी बड़ीए, गब्बां अकोट्ठां केरनेरो वक्त हेजू नईं; एल्हेरेलेइ गब्बन पानी पियेइतां फिरी नेइतां च़ारा।” पन तैनेईं ज़ोवं, “अस हुन्ना एरू न केरि सकम, ज़ैखन सब केन्नी अकोट्ठी भोचन तैखन घोड़ खुहे पुड़ेरां खड़ो कियो गाते, ते तैखन अस गब्बन पानी पियातम।”
तैन केरि ऐह गलबात भोइ राहोरी थी, कि राहेल अपने बाजी केरे गब्बन पानी पियाने अई ज़ै तैन च़ारती थी। अपने मम लाबानेरी कुई राहेल ते तैसेरां गब्बां हेरतां याकूबे नेड़े गेइतां खुहेरो ढकनेरो घोड़ बुछ़ोतां अपने मम लाबानेरे गब्बन पानी पियावं। तैखन याकूबे राहेली फुम्मड़ी दित्ती, ते उच्ची आवाज़ी सेइं लेरां दित्ती। ते याकूबे राहेली सेइं ज़ोवं, कि अवं तेरो बुबेर ढ्ला आईं, मतलब रिबकारू मट्ठू आईं। तैखन तैसां देवड़तां अपने बाजी सेइं ज़ोवं। अपने भनैज़्ज़े याकूबेरो पतो लेगतां लाबान तैस सेइं मिलने लेई दौड़ो, ते तैस गले लेइतां फुम्मड़ी दित्ती, फिरी तै अपने घरे आनो। ते याकूबे लाबाने सेइं अपनो सब हाल बियान कियो। तैखन लाबाने याकूबे सेइं ज़ोवं, “तू त सच़्च़े मेरी हड्डी ते मास आस।” ते याकूब अक महीनो तैस सेइं साथी राव।
तैखन लाबाने याकूबे सेइं ज़ोवं, “रिश्तेदार भोनेरे वजाई सेइं मुखत सेवा करानी मेरे लेई जाइज़ नईं। एल्हेरेलेइ ज़ो, अवं तीं सेवारे बदले कुन देईं?” लाबानेरी दूई कुइयां थी, ज़ैन मां बड्डे कुइयरू नवं लिआ ते निकड़रू नवं राहेल थियूं। लिआरी त एछ़्छ़ी कमज़ोर थी, पन राहेल हेरनी खूबसूरत ते रोड़ी थी।
याकूबेरी राहेलरे लेई सत सालां केरि सेवा
याकूब राहेली सेइं प्यार केरतो थियो, एल्हेरेलेइ तैनी लाबाने सेइं ज़ोवं, “अवं तेरी निकड़ी कुई राहेलरे लेई सत साल तेरी सेवा केरेलो।” लाबाने ज़ोवं, “तै बखले मड़दे जो देनेरे बजाहे तींजो देनी रोड़ीए; एल्हेरेलेइ तू मीं कां रा।” आखर याकूबे राहेलरे लेई सत साल सेवा की; ते तैना तैस राहेलरे प्यारे सेइं थोड़े ज़ेरे दिहाड़ां केरे बराबर लग्गे।
धोखे सेइं राहेलरी ठारी लिआ देनी
एक्सां याकूबे लाबाने सेइं ज़ोवं, “अपनि कुई मेरी कौन्श भोनेरे लेई मीं दे, ते अवं तैस कां गेइलो, किजोकि मेरो सेवा केरनेरो वक्त पूरो भोइ जेवरोए।” ते लाबाने तैस ठारारे सब लोक कुजेइतां अकोट्ठे किये, ते अक धाम दित्ती। ड्लवझ़रे मौके तैनी अपनि कुई लिआ याकूबे कां एन्हतां दित्ती, ते तै तैस कां जेव। लाबाने अपनि कुई लिआरी नौकरानी बन्नेरे लेई अपनि नौकरानी जिल्पा दित्ती। झ़ेझ़ां पतो लग्गो कि ई त लिआ आहे, एल्हेरेलेइ तैनी लाबाने सेइं ज़ोवं, “इन तीं मीं सेइं कुन कियोरूए? मीं तीं सेइं साथी रेइतां ज़ै तेरी सेवा की, त कुन राहेलरे लेई नईं कियोरी? फिरी तीं मीं सेइं एरहो धोखो किजो कियो?” लाबाने ज़ोवं, “इश्शे इड़ी ई रुवाज़ नईं, कि बड्डी कुइये करां पेइले निकड़ी कुइयरो ड्लाह बनाव गाए।
याकूबे जो राहेल भी देनी
“एस सेइं साथी ड्लाहेरी खुशी मनानेरो हफतो त पूरो केर; फिरी दूइयोवं भी तीं तैस सेवारे लेई मैल्हेली ज़ै तू मीं सेइं साथी रेइतां होरे सत साल केरेलो।” याकूबे तैन्ने कियूं, ते लिआरो हफतो पूरो कियो; तैखन लाबाने तैस अपनि कुई राहेल भी दित्ती, कि तै तैसेरी कौन्श बने। लाबाने अपनि कुई राहेलरी नौकरानी बन्नेरे लेई अपनि नौकरानी बिल्हा दित्ती। तैखन याकूब राहेली कां जेव, ते तैसेरो प्यार लिआ करां जादे राहेली सेइं भोव, ते तैनी लाबाने सेइं साथी रेइतां सत साल होरि सेवा की।
याकूबेरी औलाद
ज़ैखन यहोवा परमेशरे हेरू कि लिआ ट्लारी न भोइ, तैखन तैनी तैसारू गर्भ खोल्लू ते राहेल बेऔलाद रेइ जेई। ते लिआ दोज़ींती भोइ, ते तैस अक मट्ठू भोवं, ते तैसां तैसेरू नवं रूबेन रख्खू, किजोकि तैसां ज़ोवं कि “यहोवा परमेशरे मेरे दुखे पुड़ नज़र कियोरीए, हुनी मेरो मुन्श मीं सेइं प्यार केरेलो।” तै फिरी दोज़ींती भोइ ते तैस अक होरू मट्ठू भोवं; तैसां तैसेरू नवं शिमोन रख्खू किजोकि तैसां ज़ोवं, “एन शुन्तां कि अवं ट्लारी न थी, यहोवा मीं अक होरू मट्ठू दित्तू।” तै फिरी दोज़ींती भोइ ते तैस अक होरू मट्ठू पैदा भोवं; ते तैसां ज़ोवं, “हुनी त इस फेरे मेरो मुन्श मीं सेइं मिलेलो, किजोकि तैस सेइं मेरां ट्लाई मट्ठां भोआं।” एल्हेरेलेइ तैसां तैसेरू नवं लेवी रख्खू। ते तै फिरी दोज़ींती भोइ ते तैस होरू मट्ठू भोवं; ते तैसां ज़ोवं, “हुनी त इस फेरे अवं यहोवारू शुक्र केरेली।” एल्हेरेलेइ तैसां तैसेरू नवं यहूदा रख्खू; तैखन तैसारू गर्भ बन्द भोइ जेवं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.