Bhadrawahi Bible
उत्पत्ति 25
अब्राहमेरू बाकी खानदान
फिरी अब्राहमे अक होरि कौन्श बनाई ज़ेसेरू नवं कतूरा थियूं। तैस सेइं जिम्रान, योक्षान, मदना, मिद्यान, यिशबाक, ते शूह पैदा भोए। योक्षाने सेइं शेबा ते ददान पैदा भोए; ते ददानेरे खानदाने मां अश्शूरी, लतूशी, ते लुम्मी लोक भोए। मिद्यानेरां मट्ठां इनां थियां: एपा, एपेर, हनोक, अबीदा, ते एल्दा भोआं, इना सब कतूरारी औलाद भोइ। इसहाके त अब्राहमे अपनु सब किछ दित्तू। पन अपनि रखैलां केरे मट्ठन, किछ-किछ देइतां अपने ज़ींते दम्में अपने मट्ठे इसहाके करां पूर्व मुल्खे मां भेज़ी दित्ते।
अब्राहमेरी मौत
अब्राहमेरी सारी उमर 175 साल भोइ। अब्राहम बुढो भोनेरे वजाई सेइं मतलब पूरे बुढापेरी हालती मां तैने प्राण दित्ते; ते तै अपने मरोरे लोकन मां मिली जेव। तैसेरे मट्ठे इसहाक ते इश्माएले, हित्ती सोहरेरे मट्ठे एप्रोनेरे मम्रेरे सामने बाली ज़मीनी मां, ज़ै मकपेलारी कुढ थी, तैस मां तैस मित्ती दित्ती; मतलब ज़ै ज़मीन अब्राहमे हित्ती लोकन करां घिन्नोरी थी; तैस्से मां अब्राहम दब्बो जेव ज़ैड़ी पेइली तैसेरी कौन्श सारा दब्बोरी थी। अब्राहमेरे मरनेरां बाद परमेशरे तैसेरे मट्ठे इसहाके बरकत दित्ती ज़ै लहैरोई नंव्वेरे खुहे कां रहतो थियो।
इश्माएलेरि खानदानी
अब्राहमेरे मट्ठे इश्माएलेरि खानदानी ई आहे ज़ैन सारारे मिस्री नौकरैनी हाजिरा सेइं पैदा भोवं। इश्माएलेरे मट्ठां केरां नंव्वां ते खानदानी ई आहे: मतलब इश्माएलेरू बड्डू मट्ठू नबायोत, फिरी केदार, अदबएल, मिबसाम, मिश्मा, दूमा, मस्सा, हदद, तेमा, यतूर, नापीश ते केदमा। इश्माएलेरां मट्ठां इन्ना भोआं, ते इनां केरे नंव्वां केरे मुताबिक इन केरे ड्लाव्वन, ते डेरां केरां नंव्वां भी पेआं; ते इन्ना 12 अपने-अपने कुलां केरे प्रधान भोए। इश्माएलेरि सारी उमर 137 साल भोइ; तैखन तैने प्राण दित्ते, ते तै अपने पूर्वजां केरो ज़ेरो दब्बो जेव। ते तैसेरू खानदान हवीला करां शूरे तगर बेस्सी जेवं, ज़ैन मिस्रेरे सामने अश्शूरेरे बत्ती मांए; ते तैना अब्राहमेरे बाकी खानदाने सेइं दुश्मनी सेइं रहते थिये।1
याकूब ते एसावेरू ज़र्म
अब्राहमेरे मट्ठे इसहाकेरि खानदानी ईए: अब्राहमेरो इसहाक पैदा भोव; ज़ैखन इसहाक 40 सालां केरो थियो त तैनी रिबका सेइं ड्लाह बनाव, तै पद्दनरामेरे रानेबाले, अरामी बतूएलेरी कुई थी, ते अरामी लाबानेरे बेइन थी। इसहाकेरि कौन्श त बेऔलाद थी, एल्हेरेलेइ तैने तैसेरेलेइ यहोवा कां बिनती की; ते यहोवा तैसेरी बिनती शुनी, एन्च़रां तैसेरी कौन्श रिबका दोज़ींती भोइ। मट्ठां तैसारे पेटे मां एक्की होरि लतेईं बाने लग्गां। तैखन तैसां ज़ोवं, “मेरी एरी हालत राहेली त अवं केन्च़रे ज़ींती राहेली?” ते तै यहोवारी मर्ज़ी पुछ़ने जेई।
तैखन यहोवा तैस सेइं ज़ोवं,
“तेरे पेटे मां दूई कौमन,
ते तेरे पेट मरां निसते दूई
रियासतरे लोक अलग-अलग भोल्हे,
ते एक्की रियासतरे लोक होरि करां
जादे ताकतबर भोल्हे ते बड्डू
मट्ठू निकड़ेरी सेवा केरेलू।”
ज़ैखन तैस मट्ठां पैदा भोनेरो वक्त अव, तैखन पतो च़लो, कि तैसेरे पेटे मां दूई बच्चेन। पेइलो ज़ै ज़र्मो तै लाल निस्सो, ते तैसेरी सारी जान कम्बलेरी ज़ेरि बालन बाली थी; एल्हेरेलेइ तैसेरू नवं एसाव2 रख्खू। फिरी तैसेरो ढ्ला अपने हथ्थे सेइं एसावेरी थूड़ी ट्लेइतां ज़र्मो; ते तैसेरू नवं याकूब रख्खू जेवं। ज़ैखन रिबका तैन्न ज़र्म दित्तू तैखन इसहाक 60 सालां केरो थियो।
एसाव अपने बड्डे भोनेरू हक बेच़ते
फिरी तैना मट्ठां बेडोने लग्गां ते एसाव त जंगले मां रानेबाले भोइतां माहिर शिकारी भोइ जेव, पन याकूब सिद्धो सादो मैन्हु थियो, ते डेरन मां रहतो थियो। इसहाक एसावेरे शिकारेरू मास खातो थियो, एल्हेरेलेइ तै तैस सेइं प्यार केरतो थियो; पन रिबका याकूबे सेइं प्यार केरती थी।
एक्सां याकूब खानेरे लेई किछ दाल बनेई राहोरो थियो; ते एसाव जंगले मरां थकोरो अव। तैखन एसावे याकूबे सेइं ज़ोवं, “ऊ ज़ै लाल चीज़े, तैस्से लाल चीज़ी मरां मीं किछ खाने जो दे, किजोकि अवं थकोरो आईं।” इस्से वजाई सेइं तैसेरू नवं एदोम भी पेव। याकूबे ज़ोवं, “अपने बड्डे भोनेरू हक अज़ मेरे हथ्थे बेच़ी दे।” एसावे ज़ोवं, “हेर, अवं त हुन्ना मरने पुड़ आईं एल्हेरेलेइ बड्डे भोनेरे हक्के सेइं मेरो कुन फैइदो भोल्हो?” याकूबे ज़ोवं, “मीं सेइं हुन्ना कसम खा,” ते तैने तैस सेइं कसम खई, ते अपनु बड्डेरू हक याकूबेरे हथ्थे बेच़ी छ़डू। इस गल्ली पुड़ याकूबे एसावे रोट्टी ते मस्सरां केरि बनेवरी दाल दित्ती; ते तैने खवं पीवं, तैखन तै उठतां च़लो जेव। एन्च़रां एसावे अपनु बड्डू भोनेरू हक घटिया समझ़ू।
Source notes (2)
- Footnote तैना अपने सारे रिश्तेदारां पूर्वेरे मुल्खे मां रहते थिये।
- Footnote एसाव मतलब बड़े बालन बालो मैन्हु, तैसेरी जान लाल भोनेरे वजाई सेइं तैस जो एदोम भी ज़ोतन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.