Bhadrawahi Bible
उत्पत्ति 17
अब्राम ते करारेरो निशान
ज़ैखन अब्राम 99 सालां केरो भोइ जेव, तैखन यहोवा तैस दर्शन देइतां ज़ोवं, “अवं सर्वशक्तिमान परमेशर1 आईं; मेरी हज़ूरी मां च़ल ते सिद्ध भोतो गा। अवं तीं सेइं करार केरेलो, ते तेरे खानदाने बड़ू जादे बधेइलो।” तैखन अब्राम तुत्तरेरे भारे ज़मीनी पुड़ झुको ते आराधना की ते परमेशर तैस सेइं इनां गल्लां केरतां जेवं, “हेर, मेरो करार, तीं सेइं साथी बनोरो रालो, एल्हेरेलेइ तू बड़े कौमां केरे टोली केरो बाजी भोइ गालो। एल्हेरेलेइ अज़्ज़ेरां बाद तेरू नवं अब्राम2 न रालू पन तेरू नवं अब्राहम3 भोल्हु; किजोकि मीं तू कौमां केरो बुज़ुर्ग बनेवरोस। अवं तीं बड़े जादे फलदार बनालो, ते तीं कौमां केरो बाजी बनालो, ते तेरे खानदाने मां राज़े पैदा भोल्हे। ते अवं तीं सेइं, ते तेरे बादे मां पीढ़ी-पीढ़ी तगर तेरे खानदाने सेइं भी इस गल्लरो जुगे-जुगे तगर करार केरताईं, कि अवं तेरो ते तेरे बाद तेरे खानदानेरो भी परमेशर भोइलो। ते अवं तीं, ते तेरे बाद तेरे खानदाने भी, ई सारो कनान मुल्ख, ज़ैस मां तू परदेशी भोइतां रहतस, एन्च़रां देइलो कि तै जुगे-जुगेरे लेई तैन केरि अपनि ज़मीन भोल्ही, ते अवं तैन केरो परमेशर भोइलो।”
फिरी परमेशरे अब्राहमे सेइं ज़ोवं, “तू भी मीं सेइं साथी कियोरे करारे मेन्नां; तू ते तेरे बाद तेरू खानदान भी अपने-अपने पीढ़ी मां तैस मन्ते रान। मीं सेइं ज़ै कियोरो करार, तीं ते तेरे बादे तेरे खानदाने मन्नो पेनोए, तै ईए: कि तुसन मरां हर एक्की नरेरो खतनो भोए। तुस अपने-अपने चेमड़रो खतनो करेइयथ: ज़ै करार मेरे ते तुश्शे दरमियाने, तैसेरो निशान ईए भोल्हो। पीढ़ी-पीढ़ी मां सिर्फ तेरे खानदानेरे लोक नईं पन ज़ैना तेरे घरे मां पैदा भोवरे भोन, चाहे परदेशी कीमत देइतां घिन्ने गान, एरां सब मट्ठां भी ज़ैखन अठ दिहाड़े केरां भोन, तैखन तैन केरो खतनो कियो गाए। ज़ैना तेरे घरे मां पैदा भोन, या रुपेइये देइतां घिन्नोरे भोन, तैसेरो खतनो ज़रूर कियो गाए; एन्च़रां मेरो करार, ज़ेसेरो निशान तुश्शी जानी मां भोल्हो तै जुगे-जुगे रालो। ज़ै मड़द बगैर खतने राए, मतलब ज़ेसेरी चेमड़रो खतनो न भोए, तै अपने लोकन मरां अलग कियो गाए4, किजोकि तैने मीं सेइं कियोरो करार ट्लोड़ोरोए।”
वाधो कियोरू मट्ठू इसहाक
फिरी परमेशरे अब्राहमे सेइं ज़ोवं, “तेरी ज़ै कौन्श सारै आहे, तैस जो तू हुनी सारै5 न ज़ोइयां, तैसेरू नवं सारा6 भोल्हु। अवं तैस बरकत देइलो, ते तीं तैसेरे ज़िरिये अक मट्ठू देइलो; ते अवं तैस एरी बरकत देइलो, कि तै कौमां-कौमां केरि अम्मा भोइ गाली; ते तैसेरे खानदाने मां रियासतां-रियासतां केरे राज़े पैदा भोल्हे।” तैखन अब्राहम तुत्तरेरे भारे तल्ले मां झुको ते हस्सो, ते मने-मने मां ज़ोने लगो, “कुन 100 सालेरे मड़दे भी औलाद भोल्ही ते कुन सारा ज़ै 90 सालां केरीए तै मट्ठू ज़ाली?” ते अब्राहमे परमेशरे सेइं ज़ोवं, “इश्माएल तेरी नज़री मां बनोरो राए! इन्ने सुधूए।” तैखन परमेशरे ज़ोवं, “ज़रूर तेरी कौन्श सारारू तीं सेइं अक मट्ठू पैदा भोल्हु; ते तू तैसेरू नवं इसहाक रेखां; ते अवं तैस सेइं एरहो करार केरेलो ज़ै तैसेरे बाद तैसेरे खानदानेरे लेई जुगे-जुगेरो करार भोल्हो। इश्माएलेरे बारे मां भी मीं तेरी बिनती शुनोरीए; अवं तैस भी बरकत देइलो, ते तैस फलदार बनेइलो ते बड़े जादे बधेइलो; तैस सेइं 12 प्रधान पैदा भोल्हे, ते अवं तैस मरां अक बड्डी कौम बनेइलो। पन अवं अपनो करार इसहाके सेइं साथी केरेलो ज़ै सारा सेइं एग्री साल ठीक वक्ते पुड़ पैदा भोल्हो।”
तैखन परमेशरे अब्राहमे सेइं गल्लां केरनि बन्द की ते तैस करां उबरो च़लो जेव। तैखन अब्राहमे अपनु मट्ठू इश्माएल आनू ते तैसेरे घरे मां ज़ेत्रे पैदा भोवरे थिये, ते ज़ेत्रे तैने रुपेइयेइं सेइं घिन्नोरे थिये, मतलब तैसेरे घरे मां ज़ेत्रे मड़द थिये, सेब्भी केरो तैस्से दिहाड़े परमेशरेरे वचनेरे मुताबिक तैन केरि चेमड़रो खतनो कियो। ज़ैखन अब्राहमेरो चेमड़रो खतनो भोव तैखन तैसेरी उमर 99 साल थी। ते ज़ैखन तैसेरे मट्ठे इश्माएलेरे चेमड़रो खतनो भोव तैखन तैसेरी उमर 13 साल थी। अब्राहम ते तैसेरू मट्ठू इश्माएल दूईयां केरो खतनो एक्सां भोव। ते तैसेरे घरे मां ज़ेत्रे मड़द थिये ज़ैना घरे मां पैदा भोए, ते कने ज़ैना परदेशी लोकन करां घिन्नोरे थिये, सेब्भी केरो खतनो तैस सेइं साथी भोव।
Source notes (6)
- Footnote सर्वशक्तिमान परमेशर इब्रानी भाषाई मां सर्वशक्तिमान परमेशरे जो एलशदाई ज़ोतन।
- Footnote अब्राम सेब्भना बड्डो बुज़ुर्ग।
- Footnote अब्राहम कौमां केरो सेब्भना बुज़ुर्ग।
- Footnote अलग कियो गाए तै अग्रोवं जो मेरो न ज़ोवं गालो।
- Footnote सारै मतलब मेरी रानी
- Footnote सारा इसेरो मतलब रानी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.