Bhadrawahi Bible
गलातियों 4
अवं मिसाल देइतां ज़ोताईं, कि बारस ज़ांतगर बच्चोए, अगर तै सेब्भी चीज़ां केरो मालिके, फिरी भी तैस त कने गुलामे मां कोई फर्क नईं। पन बाजी केरे ठहरावरे वक्ते तगर सुमालने बालां ते भैन्डैरी केरे हेरगेशी मां रहते। तेन्च़रे अस भी ज़ैखन बच्चां केरे ज़ेरे थिये, त दुनियारे रीति रूवाज़ां ते कानूनेरे गुलाम थिये। पन ज़ैखन ठीक वक्त अव, त परमेशरे अपनु मट्ठू दुनियाई मां भेज़ू, ज़ैस एक्की कुआन्शां ज़र्म दित्तू, तैन यहूदन मां ज़र्मू ते तैनी कानून मन्नो। ताके तैन छुटाए ज़ैना मूसेरे कानूनेरे अधीन थिये, ते असन तैसेरे बच्चे भोनेरो अधिकार मैल्हे। ते तुस ज़ैना बच्चेथ, एल्हेरेलेइ परमेशरेरे मट्ठेरी आत्मा इश्शे दिले मां भेज़ोरीए, ज़ै आत्मा, “हे बैपू, हे बाजी,” ज़ोती। एल्हेरेलेइ हुनी तू गुलाम नईं, पन परमेशरेरो बच्चोस, ते ज़ैखन परमेशरेरो बच्चोस, त तीं तैन सब मैल्हेलू ज़ेसेरो वाधो परमेशरे अपने बच्चन देनेरो वाधो कियोरोए।
कलीसियारे केरे लेई पौलुसेरी फिक्र
ज़ैखन तुस परमेशरे न थिये ज़ानते, त तुसन तैन केरे गुलाम थिये, ज़ैना हकीकति मां ईश्वर अथ्थी नईं। पन हुनी तुश्शो रिश्तो परमेशरे सेइं आहे, ते तुसेईं तै ज़ानो बल्के परमेशरे अस कबूल किये, ते तैन कमज़ोर ते निक्केमी पेइली गल्लां केरे पासे किजो गातथ, कुन तुस तैन केरे दुबारां गुलाम भोने चातथ? मीं शुनेरूए कि तुस गैर कौमां केरे विश्वासी, यहूदी केरे दिहाड़न ते महीन्न ते खास वक्ते ते सालां केरे तिहारन मन्तथ, इन सोचतां कि परमेशर खुश भोते। अवं तुश्शू एन केरनेरे वजाई सेइं परेशान आईं, कि एरू न भोए, कि ज़ै मेहनत मीं तुश्शे लेई कियोरीए तै बेफैइदी भोए।
हे ढ्लाव ते बेइनव, अवं तुसन कां बिनती केरताईं, तुस अपने आपे यहूदी केरे कानूने करां आज़ाद केरा, किजोकि मीं अपनो आप आज़ाद कियोरोए ज़ेन्च़रे तुस गैर कौमरे लोक पेइले आज़ाद थिये, तुस पेइले मेरे सामने बड़े रोड़े थी। तुसन याद भोल्हु, ज़ैखन अवं पेइली बार खुशखबरी शुनाने तुसन कां अव त अवं बिमार थियो। ते मेरी जिसमानी हालत ज़ै तुश्शे अज़मैइशरी वजा थी, तुसेईं अवं घटिया न समझ़ो ते तुसेईं दूर न कढो बल्के एन्च़रे कबूल कियो ज़ेन्च़रे परमेशरेरो दूत या यीशु मसीह एप्पू। ते तुश्शी तै खुशी मनानी कोरहां जेई? अवं सच़्च़े ज़ोई बटताईं, तुस मेरे लेई सब किछ बलिदान केरनेरे लेई तियार थिये, इड़ी तगर कि एपनी एछ़्छ़ी भी। ते कुन तुसन सेइं सच़ ज़ोनेरे वजाई सेइं अवं तुश्शो बैरी भोवरोईं। तैना झूठे उस्ताद तुसन दोस्त बनानो त चातन, पन रोड़ी नीती सेइं नईं; बल्के तुसन अलग केरने चातन, कि तुस तैन केरे चेले बना। जोशे मां भोनू रोड़ूए, कि रोड़ी गल्लन मां हर वक्त दोस्त बनानेरी कोशिश की गाए, सिर्फ तैस वक्ते नईं ज़ैखन अवं तुसन सेइं साथी रहताईं। हे मेरे बच्चव, ज़ांतगर तुसन मां मसीहेरू रूप न बने, तांतगर अवं तुश्शे लेई ज़र्म देने बैली कुआन्शे ज़ेरे तकलीफी मां रहताई। अवं त चाताईं कि हुनी तुसन कां एइतां मिट्ठी ज़बाना गल केरि, किजोकि मेरी समझ़ी मां न एज्जे कि अवं तुसन सेइं कुन केरि।
सारा ते हाजिरारी मिसाल
तुस ज़ैना मूसेरे कानूनेरे अधीन भोने चातथ, मीं ज़ोतथ, कुन कानूनेरी गल्लां शुन्नेरे लेई तियार नईं? तैस मां इन लिखेरूए, कि अब्राहमेरां दूई मट्ठां थियां; अक गुलाम कुआन्शरू, ते अक ज़ै आज़ाद थी तैसेरू। पन ज़ैन गुलाम कुआन्शरू भोव, तैन आम बच्चां केरू ज़ेरू ज़र्मू, ते ज़ैन आज़ाद कुआन्शरू भोव, तैन परमेशरेरे वाधेरे मुताबिक ज़र्मू। इना दूई कुआन्शां परमेशरेरे दूई करारां केरे रूपे मां कम केरतिन। पेइली कुआन्श हाजिरा सीनै पहाड़े हिराती ज़ैड़ी लोकन कानून मैल्हो, ज़ैन तैन गुलाम बनातू थियूं। हाजिरा मन्ना अरबेरू सीनै पहाड़ेरी ज़ेरिए, ज़ेसेरी तुलना मौजूद यरूशलेमे सेइं केरोतीए, किजोकि तैन अज़ अपने बच्चन यानी अपने लोकन समेत गुलैमी मांए। पन बेइयूं यरूशलेम अब्राहमेरे कुआन्श सारारू ज़ेरूए, ते तैसेरे बच्चे गुलाम नईं। इन यरूशलेम इश्शे लेई इश्शे अम्मरू ज़ेरूए ज़ैसां विश्वास कियो। किजोकि पवित्रशास्त्र ज़ोते,
“हे बाँझ, तीं ज़ैसां कधे बच्चे नईं ज़ावरे, खुशी भो,
तीं ज़ैस बच्चो ज़ानेरी तकलीफ नईं भोवरी; आवाज़ उच्ची केर ते जयजयकार केर,
किजोकि शैरोरारी औलाद सुहागनी करां भी जादे।”
हे ढ्लाव ते बेइनव, तुस अब्राहमेरे मट्ठे इसहाकेरे ज़ेरे आथ, ज़ैन परमेशरेरे वाधेरे मुताबिक ज़र्मू, अस भी परमेशरेरे वाधेरे मुताबिक तैसेरे बच्चे बने। ते ज़ेन्च़रे तैस वक्ते ज़ै बच्चो आम बच्चां केरो ज़ेरो ज़र्मोरो थियो, तैस सतातो थियो ज़ै परमेशरेरे आत्मारे मुताबिक ज़र्मोरो थियो, तेन्च़रे अज़ भी अस तैन करां सताव झ़ैल्लतम ज़ैना कानून मेनतां परमेशरेरे सामने धर्मी भोनू चातन। पन पवित्रशास्त्र कुन ज़ोते? “गुलाम कुआन्शी ते तैसेरे मट्ठे कढ, किजोकि गुलाम कुआन्शरू मट्ठू आज़ाद कौन्शरे मट्ठे साथी बारस न भोल्हु।” एल्हेरेलेइ हे ढ्लाव ते बेइनव, अस गुलाम कुआन्शरे बच्चे नईं, ज़ै कानूने, बल्के आज़ाद कौन्शरां बच्चेम, ज़ै विश्वासे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.