Bhadrawahi Bible
एज्रा 8
एज्रा अपने सैथन सेइं साथी यरूशलेम नगरे मां पुज़ते
किछ वक्तेरां पेइले ज़ैना लोक अर्तक्षत्रेरे रियासतरे बाबेले मरां मीं सेइं साथी यरूशलेम नगरे मां आए तैन केरे घराना केरे प्रधान थिये, ते तैन केरां नंव्वां इना आन: पीनहासेरे खानदाने मरां गेर्शोम, ईतामारेरे खानदाने मरां दानिय्येल, ते दाऊदेरे खानदाने मरां हत्तूश। शकन्याहेरे खानदाने मरां परोशेरे गोट्ले मरां जकर्याह, ज़ैस सेइं साथी 150 मैन्हु केरि वंशावली भोइ। पहत्मोआबेरे खानदाने मरां जरहयाहेरू मट्ठू एल्यहोएनै, ज़ैस सेइं साथी 200 मड़द थिये। शकन्याहेरे खानदाने मरां यहजीएलेरू मट्ठू ज़ैस सेइं साथी 300 मड़द थिये। आदीनेरे खानदाने मरां योनातानेरू मट्ठू एबेद, ज़ैस सेइं साथी 50 मड़द थिये। एलामेरे खानदाने मरां अतल्याहेरू मट्ठू यशायाह, ज़ैस सेइं साथी 70 मड़द थिये। शपत्याहेरे खानदाने मरां मीकाएलेरू मट्ठू जबद्याह, ज़ैस सेइं साथी 80 मड़द थिये। योआबेरे खानदाने मरां यहीएलेरू मट्ठू ओबद्याह, ज़ैस सेइं साथी 218 मड़द थिये। शलोमीतेरे खानदाने मरां योसिव्याहेरू मट्ठू ज़ैस सेइं साथी 160 मड़द थिये बेबैरे खानदाने मरां बेबैरू मट्ठू जकर्याह, ज़ैस सेइं साथी 28 मड़द थिये। अजगादेरे खानदाने मरां हक्कातानेरू मट्ठू योहानान, ज़ैस सेइं साथी 110 मड़द थिये। अदोनीकामेरे खानदाने मरां ज़ैना बादे मां जे तैन केरां नंव्वां इना आन; एलीपेलेत, यूएल, ते शमायाह, ते तैन सेइं साथी 60 मड़द थिये। ते बिगवैरे खानदाने मरां ऊतै ते जक्कूर थिये, ते तैन सेइं साथी 70 मड़द थिये। तैना मैन्हु मीं तैस दरियाए कां ज़ै अहवा नगरेरे पासे बगते अकोट्ठे किये, तैड़ी असेईं ट्लाई दिहाड़े डेरो लाव, मीं तैड़ी लोक ते याजक भी लाहे, पन लेवी खानदानेरो कोई न मैल्हो। मीं एलीएजेर, अरीएल, शमायाह, एलनातान, यारीब, एलनातान, नातान, जकर्याह ते मशुल्लाम ज़ैना प्रधान थिये, ते योयारीब ते एलनातान ज़ैना अक्लमन्द थिये। कुजेइतां, इद्दो कां भेज़े ज़ै कासिप्या नंव्वेरे ठारारो प्रधान थियो; ते तैन समझ़ावं कि कासिप्या ठारी पुड़ गेइतां इद्दो ते तैसेरे ढ्ला भवनेरे सेवक लोकन सेइं कुन-कुन ज़ोनूए, कि तैना असन कां इश्शे परमेशर यहोवारे भवनेरी सेवा केरनेबालन आन्न। इश्शे परमेशरेरी सिद्धी नज़र ज़ै असन पुड़ भोइ तैसेरे मुताबिक तैना असन कां ईश्शेकेल ज़ैन इस्राएलेरू पड़पोट्लड़ू ते लेवी केरे पोट्लड़े महली एरे खानदाने मरां थियो, ते शेरेब्याह, ते तैसेरां मट्ठन ते ढ्लान, मतलब तैना 18 मैन्हन; ते हशब्याह, ते तैन सेइं साथी मरारी खानदाने मरां यशायाह भी, ते तैसेरे मट्ठन ते ढ्लान, मतलब तैना 12 मैन्हन; ते भवनेरे सेवक लोकन मरां ज़ैना दाऊदे ते हाकिमेईं लेवी लोकां केरि सेवा केरनेरे लेई रखोरे थिये, 220 नतीन लोक आने। तैन सेभी लोकां केरां नंव्वां लिखोरां थियां। तैखन मीं अहवा दरियाएरे बन्ने पुड़ बरत रखनेरो प्रचार एस उमीदी सेइं कियो, कि असां परमेशरेरे सामने दीन भोम; ते तैस करां अपने ते अपने बाल-बच्चां केरे लेई ते अपने सब चीज़ां केरे लेई आसान सफर मगम। किजोकि अवं बत्तरे दुश्मन करां बच़नेरे लेई सिपाही केरू दल ते सुवार राज़े करां मगने करां शरमातो थियो, किजोकि असेईं राज़े सेइं इन ज़ोवरू थियूं, “इश्शो परमेशर अपने सेभी तोप्पने बालन पुड़, भलैइयरे लेई सिद्धी नज़र रखते, ते ज़ैना तैस करां दूर भोतन, तैसेरी शक्ति ते क्रोध तैन केरे खलाफे।” एस्से बारे मां असेईं बरत रेखतां अपने परमेशरे कां प्राथना की, ते तैनी इश्शी प्राथना शुनी। तैखन मीं तैन खास याजकन मरां 12 ज़ने, मतलब शेरेब्याह, हशब्याह ते तैन केरे 10 भियाल अलग केरतां, ज़ैन सोन्नू चाँदी ते भांडां, राज़े ते तैसेरे मंत्री ते तैसेरे हाकिम ते ज़ेत्रे इस्राएली लोक हाज़र थिये, तैनेईं इश्शे परमेशरेरे भवनेरे लेई च़ढ़तल दित्तोरी थी, तैन तुलतां तैन दित्तू। मीं तैन केरे हवाले 22000 किल्लो चाँदी, ते 3500 किल्लो चैंदरां भांडां, 3500 किल्लो सोन्नू, हज़ार दर्कमोनेरे सोन्नेरे 20 कुटोरे, ते सोन्नेरे ज़ेरे चमकने बालां पितलरां दूई भांडां तुलतां दित्तां। मीं तैन सेइं ज़ोवं, “तुसां त यहोवारे लेई पवित्र आथ, ते इना भांडां भी पवित्र आन; ते इन सोन्नू-चाँदी च़ढ़तलरू आहे, ज़ैन तुश्शे पूर्वजां केरे परमेशर यहोवारे लेई खुशी सेइं दित्तोरोए। एल्हेरेलेइ इन चीज़ां केरि पहरदारी केरा, ते हुना तगर तुसेईं एन यरूशलेम नगरे मां प्रधान याजकन ते लेवी लोकन कां ते इस्राएलेरे पूर्वजां केरे प्रधानां केरे सामने यहोवारे भवनेरी कोठी मां तुलतां न देथ, तांतगर एन केरि हिफाज़त केरते राथ।” तैखन याजकेईं ते लेवी लोकेईं चाँदी, ते सोन्नू ते भांडां तुलतां नियां कि तैना यरूशलेम नगरे मां इश्शे परमेशरेरे भवने मां पुज़ान। पेइले महीनेरे बारोवं दिहाड़े असेईं अहवा दरियाए करां यरूशलेम नगरे जो सफर शुरू कियूं, ते इश्शे परमेशरेरी दयारी नज़र असन पुड़ राई; ते तैनी असां बत्ते मारनेबाले दुश्मन्न करां बच़ाए। आखरकार असां यरूशलेम नगरे मां पुज़्ज़े ते तैड़ी ट्लाई दिहाड़े राए। फिरी च़ेवरोवं दिहाड़े तैन सोन्नू-चाँदी ते भांडां इश्शे परमेशरेरे भवने मां ऊरिय्याहेरे मट्ठे मरेमोत याजकेरे हथ्थे मां तुलतां दित्तां। तैस सेइं साथी पीनहासेरू मट्ठू एलीआजर थियूं, ते तैन सेइं साथी येशुअरू मट्ठू योजाबाद लेवी ते बिन्नूई एरू मट्ठू नोअद्याह लेवी थिये। ते तैना सब चीज़ां केरि गिनती की ते तुलतां तैन केरो वज़न तैखने लिखतां रख्खो।
ज़ैना बाबेलेरी गुलैमी मरां वापस एवरे थिये, तैनेईं इस्राएलेरे परमेशरे कां होमबलि च़ाढ़ी; मतलब सारे इस्राएली लोकां केरे लेई 12 बछ़ड़ां, 96 हुड़, ते 77 गबड़ां, पापबलि देनेरे लेई 12 थाव्वे, इना सब यहोवारे लेई होमबलि थी। तैखन तैनेईं राज़ेरो हुक्म बड्डे दरियाएरे पार तैट्ठेरे अधिकैरन ते हाकिमन दित्तो; ते तैनेईं इस्राएली लोकां केरे परमेशरेरे भवनेरे कम्मे मां मद्दत की।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.