Bhadrawahi Bible
एज्रा 10
यहूदी लोक अपने कौन्शन शारतन ज़ैना गैर कौमन मरां थी
ज़ैखन एज्रा परमेशरेरे भवनेरे सामने तल्ले मां झुको, लेरां देइतां प्राथना केरतो ते पापां केरो इकरार केरतो थियो, तैखन इस्राएले मरां मड़द, कौन्शां, ते बच्चां केरि अक बड़ी भीड़ तैस कां अकोट्ठी भोइ, ते तैना लोक ज़ोरे-ज़ोरे लेरां देने लगोरे थिये। तैखन यहीएलेरू मट्ठू शकन्याह ज़ै एलामेरे खानदाने मरां थियो, एज्रा सेइं ज़ोने लगो, “असेईं इस मुल्खेरे गैर कौमां केरि कौन्शां ड्लेइतां परमेशरे सेइं धोखो त कियोरोए, पन इस हालती मां भी इस्राएलेरे लेई अक उमीदे। हुनी असां अपने परमेशरे सेइं ई करार केरम, कि असां अपने प्रभुएरी सलाह ते अपने परमेशरेरे हुक्म शुन्तां थरकने बालां केरे सलाहरे मुताबिक तैन सेभी कौन्शन बच्चन समेत शारम; ते कानूनेरे मुताबिक कम कियूं गाए। तू उठ, किजोकि एन कम तेरूए, ते असां तीं सेइं साथी अहम; एल्हेरेलेइ हिम्मत रेखतां एस कम्मे मां लेग्गी गा।” तैखन एज्रा उठो, ते याजक ते लेवी ते सारे इस्राएली लोकां केरे प्रधान्न कसम दित्ती कि असां शकन्याहेरे सलाहरे मुताबिक कम केरमेले; ते तैनेईं तेन्च़रे कसम खाई।
तैखन एज्रा परमेशरेरे भवनेरे सामने उठो, ते एल्याशीबेरू मट्ठू यहोहानानेरे कमरे मां जेव, ते तैड़ी गेइतां न त रोट्टी खाई, ते न पानी पियूं, किजोकि तै बाबेलेरी गुलैमी मरां एवरे लोकां केरे धोखेबैज़रे वजाई सेइं दुख मनातो राव। तैखन तैनी यहूदा ते यरूशलेमे मां रानेबाले बाबेलेरी गुलैमी मरां एवरे लोकन मां ऐह प्रचार कराव, कि तुसां यरूशलेम नगरे मां अकोट्ठे भोथ; ते ज़ै कोई हाकिमां ते बुज़ुर्गां केरो सलाह न मन्नेलो ते ट्लाई दिहाड़ां केरे अन्तर न एज्जे त तैसेरी सारी जाईदात नाश की गाली ते तै गुलैमी मरां एवरे लोकन मरां कढो गालो।
नंव्वोवं महीनेरे बिहोवं दिहाड़े यहूदा ते बिन्यामीन गोट्लां केरे सारे मैन्हु ट्लाई दिहाड़ां केरे अन्तर यरूशलेम नगरे मां अकोट्ठे भोए; ते सारे लोक परमेशरे भवनेरे चौके मां तैस बारे मां ते बड़ी झ़ड़ी भोनेरे वजाई सेइं थरकने लगे। तैखन एज्रा याजक खड़ो भोइतां, तैन सेइं ज़ोने लगो, “तुसेईं लोकेईं धोखो केरतां गैर कौमां केरि कौन्शन सेइं ड्लाह बनाव, एस सेइं इस्राएलेरो पाप बेधी जेवरोए। एल्हेरेलेइ हुनी अपने दादे-पड़दादां केरे परमेशर यहोवारे सामने अपनो पाप मन्ना, ते तैसेरी मर्ज़ी पूरी केरा, ते इस मुल्खेरे लोकन करां ते गैर कौमां केरि कौन्शन करां अलग भोइ गाथ।”1 तैखन सब लोकेईं बड़े ज़ोरे सेइं ज़ोवं, “ज़ेन्च़रे तीं ज़ोवरूए, तेन्च़रे असां केरमेले। पन मैन्हु बड़ेन, ते झ़ड़ी लगोरीए, ते बेइर खड़े न रेई सखम, ते एन एक्की दूई दिहाड़ेरू कम नईं, किजोकि असेईं एस गल्ली मां बड़ो पाप कियोरोए। सारे लोकां केरे तरफां इश्शे लेई हाकिम च़ुने गान; ते ज़ांतगर इश्शे परमेशरेरो भड़कोरो क्रोध असन करां दूर न भोए, ते एन कम पूरू न भोए, ते इश्शे नगरन मां रानेबाले ज़ेत्रे लोकेईं गैर कौमां केरि कौन्शन सेइं ड्लाह बनेवरोए, तैना पूरे वक्ते पुड़ एज्जन, ते तैन सेइं साथी एक्की नगरेरे बुज़ुर्ग ते न्यायी एज्जन।” एसेरे खलाफ सिर्फ असाहेलेरू मट्ठू योनातान ते तिकवारू मट्ठू यहजयाह खड़े भोए, ते मशुल्लाम ते शब्बतै लेवी लोकेईं तैन केरि मद्दत की।
एल्हेरेलेइ बाबेलेरी गुलैमी मरां एवरे लोकेईं तेन्च़रे कियूं। तैखन एज्रा याजक ते पूर्वजां केरे घराना केरे किछ खास मड़द अपने-अपने पूर्वजां केरे घराना केरे मुताबिक तैन सेभी केरां नंव्वां लिखतां अलग किये, ते दशोवं महीनेरे पेइले दिहाड़े तैस गल्लरी जांच केरनेरे लेई बिश्शे। ते पेइले महीनेरे पेइले दिहाड़े तगर तैनेईं तैन सेभी मड़दां केरि जांच पूरी की, ज़ैनेईं गैर कौमां केरि कौन्शां ड्लेइतां एन्होरी थी। याजकां केरे खानदाने मरां एना मैन्हु मैल्हे ज़ैनेईं गैर कौमां केरि कौन्शां ड्लेइतां एन्होरी थी: येशुअरे मट्ठां, योसादाकेरे मट्ठां ते तैसेरे ढ्ला मासेयाह, एलीएजेर, यारीब ते गदल्याह। तैनेईं वाधो कियो, कि असां एपनी गैर इस्राएलेरी कौन्शां शारमेले, ते तैन दोषी ठहरामेले, ते अपने-अपने दोषेरे वजाई सेइं अक-अक हुड़ बलि कियो। इम्मेरे खानदाने मरां हनानी ते जबद्याह हारीमेरे खानदाने मरां मासेयाह, एलिय्याह, शमायाह, यहीएल ते उज्जियाह। पशहूरे खानदाने मरां एल्योएनै, मासेयाह, इश्माएल, नतनेल, योजाबाद ते एलासा।
फिरी लेवी लोकन मरां योजाबाद, शिमी, केलायाह ज़ैस जो कलीता ज़ोतन, पतह्याह, यहूदा ते एलीएजेर। गीतां ज़ोनेबालन मरां एल्याशीब; ते संत्रन मरां शल्लूम, तेलेम ते ऊरी।
बाकी इस्राएलन मरां परोशेरे खानदाने मरां रम्याह, यिज्जियाह, मल्किय्याह, मिय्यामीन, एलीआजर, मल्किय्याह ते बनायाह। एलामेरे खानदाने मरां मत्तन्याह, जकर्याह, यहीएल अब्दी, यरेमोत ते एलिय्याह। ते जत्तू एरे खानदाने मरां एल्योएनै, एल्याशीब, मत्तन्याह, यरेमोत, जाबाद ते अज़ीज़ा। बेबैरे खानदाने मरां यहोहानान, हनन्याह, जब्बै ते अतलै। बानी एरे खानदाने मरां मशुल्लाम, मल्लूक, अदायाह, याशूब, शाल ते यरामोत। पहत्मोआबेरे खानदाने मरां अदना, कलाल, बनायाह, मासेयाह, मत्तन्याह, बसलेल, बिन्नूई ते मनश्शे। हारीमेरे खानदाने मरां एलीएजेर, यिश्शियाह, मल्किय्याह, शमायाह, शिमोन; बिन्यामीन, मल्लूक ते शेमर्याह। हाशूमेरे खानदाने मरां; मत्तनै, मत्तत्ता, जाबाद, एलीपेलेत, यरेमै, मनश्शे ते शिमी। ते बानी एरे खानदाने मरां; मादै, अम्राम, ऊएल; बनायाह, बेदयाह, कलूही; वन्याह, मरेमोत, एल्याशीब; मत्तन्याह, मत्तनै, यासू; बानी, बिन्नूई, शिमी; शेलेम्याह, नातान, अदायाह; मक्नदबै, शाशै, शारै; अजरेल, शेलेम्याह, शेमर्याह; शल्लूम, अमर्याह ते यूसुफ। नबो एरे खानदाने मरां; यीएल, मत्तित्याह, जाबाद, जबीना, यद्दई, योएल ते बनायाह। एन सेभेइं गैर कौमां केरि कौन्शन सेइं ड्लाह बनेवरो थियो, ते बड़े कौन्शां केरे बच्चे भी भोवरे थिये।
Source notes (1)
- Cross-reference लैव्य. 20:22-26.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.