Bhadrawahi Bible
निर्गमन 7
तैखन यहोवाए मूसा सेइं ज़ोवं, “शुन अवं तीं फ़िरौनेरे लेई परमेशरेरो ज़ेरो ठहराताईं; ते तेरो ढ्ला हारून तेरो नबी भोल्हो। अवं ज़ैना हुक्म तीं देईं; तैना तू ज़ोइयां; ते तेरो ढ्ला हारून तैन फ़िरौने सेइं ज़ोलो; कि तै इस्राएलन अपने मुल्खे मरां गाने दे। ते अवं अपने निशान ते चमत्कार मिस्र मुल्खे मां बड़े हरेइलो, पन अवं फ़िरौनेरो दिल फिरी भी सखत केरेलो। फिरी भी फ़िरौन तुश्शी न शुनेलो; तैखन अवं मिस्र मुल्खे पुड़ अपनो हथ अग्रोवं केरतां मिस्री लोकन बड़ी सज़ाह देइतां अपने इस्राएली लोक टोलन मां मिस्र मुल्खे मरां केढतां आनेलो। ते अवं ज़ैखन मिस्रे पुड़ हथ च़लेइतां इस्राएली लोकन तैन मरां केढतां आनेलो, तैखन मिस्री लोकन पतो लग्गेलो कि अवं यहोवा आईं।” तैखन मूसा ते हारूने तेन्च़रे कियूं, ज़ेन्च़रे यहोवाए तैन्न हुक्म दित्तोरो थियो। मूसो ते हारून ज़ैखन फ़िरौने सेइं गल्लां लग्गे केरने तैखन मूसो 80 सालां केरो थियो ते हारून 83 सालां केरो थियो।
हारूनेरी चमत्कार केरनेरी सोटी
फिरी यहोवाए मूसे ते हारूने सेइं एन्च़रां ज़ोवं, “ज़ैखन फ़िरौन तुसन ज़ोए कि कोई चमत्कार केरतां हिराथ, कि परमेशरे तुस मीं कां भेज़ोरेथ, तैखन तू हारूने सेइं ज़ोइयां, ‘अपनि सोटी फ़िरौनेरे तुत्तरे अगर छ़ड; ताके तै सप बने।’” तैखन मूसो ते हारून फ़िरौने कां जे; ते तैनेईं यहोवारे हुक्मेरे मुताबिक कियूं; ते हारूने अपनि सोटी फ़िरौने ते तैसेरे अधिकैरी केरे सामने छ़डी ते तै सप बनी। तैखन फ़िरौने भी पंडत ते जैदूगिर कुजाए, ते मिस्रेरे जैदूगिरेइं भी अपने जैदेइं सेइं एन्ने कियूं। तैखन तैनेईं भी एपनी-एपनी सोटी सामने छ़ेडी, ते तैना भी सप बेनि जेई; पन हारूनेरी सोटां तैन केरि सोटी निगली। फिरी भी फ़िरौनेरो दिल एत्रो सखत भोइ जेव, ते ज़ेन्च़रे यहोवाए ज़ोवरू थियूं, तैनी मूसेरी ते हारूनेरी गल मन्नी न चाई।
मिस्री लोकन पुड़ दश आफतां
तैखन यहोवाए, मूसे सेइं ज़ोवं, “फ़िरौनेरो दिल सखत भोइ जेवरोए, तै एन लोकन गाने न दे। एल्हेरेलेइ हुनी कालां झ़ेझ़ां ज़ै सोटी सप बनोरी थी, तैस हथ्थे मां ने, ते फ़िरौन नील दरियाए मरां बेइर निसनेरे वक्ते तगर तैस सेइं मिलनेरे लेई दरियारे बन्ने पुड़ खड़ो रेइयां। फिरी तू तैस सेइं ज़ोइयां, ‘इब्रि केरे परमेशर यहोवाए अवं तीं कां एन ज़ोनेरे लेई भेज़ोरोईं, कि मेरे लोकन गाने दे, ताके तैना सुनसान जगाई मां मेरी आराधना केरन, पन तीं हेजू तगर मेरू ज़ोनू नईं मन्नेरू। यहोवा इन ज़ोते, कि इस सेइं तू ज़ांनेलो कि अवं यहोवा परमेशर आईं; हेर अवं अपने हथ्थेरी सोटी सेइं नील दरियारे पैनी पुड़ बालो ते तैन पानी खून बनेलू। ते ज़ैना मेछ़ली दरियाए मां आन तैना मेरि गैली, तैखन दरियाए मरां मुशक च़लेली, कि तैना मिस्री दरियाएरू पानी न पी बटन।’” फिरी यहोवाए मूसे सेइं ज़ोवं, “हारूने सेइं ज़ो, कि अपनि सोटी नेइतां मिस्रे मां ज़ेत्रू पानी यानी दरिया, नेरहां, डैल, तालाब ज़ेत्रे भी आन तैन पुड़ अपनो हथ रख कि तैन पानी खून बेनि गाए; ते सारे मिस्र मुल्खे मां घोड़ां केरे त लेकड़रे भांडन मां भी खूने खून भोल्हो।”
पेइली आफत-पानी खून बन्नू
मूसे ते हारूने यहोवारे हुक्मेरे मुताबिक कियूं, तैनी अपनि सोटी नेइतां फ़िरौनेरी सेवा केरनेबालां केरे सामने दरियारे पैनी पुड़ बाई ते दरियाएरू पानी खून बेनि जेवं। ते दरियाएरी मेछ़ली मेरि जेई, ते दरियाए मरां मुशक च़लने लगी; ते मिस्री दरियाएरू पानी पी न बटे; ते सारे मिस्र मुल्खे मां खूने खून भोइ जेव। तैखन मिस्रेरे जैदूगिरेइं भी अपने जैदेइं सेइं एन्ने कियूं, पन फ़िरौनेरो दिल सखत भोइ जेव; कि ज़ेन्च़रे यहोवारे ज़ोनेरे मुताबिक तैनी मूसे ते हारूनेरी न शुनी। ते फ़िरौने इस गल्ली पुड़ भी ध्यान न दित्तू ते वापस अपने घरे जो च़लो जेव। ते ज़ैखन मिस्री लोक नील दरियारे आसे पासे पीनेरे पैनेरे लेई खुहां घड़ां; किजोकि तैना दरियाएरू पानी पी न थिये सकते।
ते ज़ैखन यहोवा नील दरियारे पैनी पुड़ बाई ते सत दिहाड़े गुज़री जेवरे थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.