Bhadrawahi Bible
निर्गमन 4
मूसेरे लेई आजीब निशान
तैखन मूसे जुवाब दित्तो, “अगर तैना मेरो विश्वास न केरन; ते मेरी गल न शुन्न, ते ज़ोन कि, ‘तीं यहोवा दर्शन नईं दित्तोरू। तैखन अवं कुन ज़ोइलो?’” यहोवा मूसे सेइं ज़ोवं, “तेरे हथ्थे मां एन कुने?” तैनी ज़ोवं, “सोटी।” फिरी परमेशरे ज़ोवं, “एस तल्ले मां छ़ड।” ते ज़ैखन तैनी तै सोटी तल्ले मां छ़डी त तै सप बेनि जेई, ते मूसा तैस करां नश्शो। तैखन यहोवा मूसे सेइं ज़ोवं, “हथ्थे सेइं एसेरू पौंछ़ड़ ट्ला, ताके तैना याकीन केरन कि तैन केरे दादे पड़दादां केरे परमेशर, अब्राहमेरे परमेशर इसहाकेरे परमेशर ते याकूबेरे परमेशरे तीं दर्शन दित्तोरूए।” ज़ैखन तैनी तै हथ्थे सेइं ट्लातो त तै फिरी तैसेरे हथ्थे मां सोटी बनी।
फिरी यहोवा तैस सेइं एन भी ज़ोवं कि, “अपनो हथ छैती पुड़ रख।” तैनी अपनो हथ छैती पुड़ रख्खो; ज़ैखन तैनी हेरू कि तैसेरो हथ कोढ़े सेइं हिंवेरो ज़ेरो छ़ित्तो भोवरोए। तैखन यहोवा ज़ोवं, “तू अपनो हथ फिरी छैती पुड़ रख।” तैनी अपनो हथ छैती पुड़ रख्खो, ज़ैखन तैनी अपनो हथ छैती पुड़ेरां हटव त हेरते कि तै फिरी तैसेरे बाकी जानरो ज़ेरो भोव। फिरी यहोवा ज़ोवं, “अगर इस्राएली लोक तेरी गल्ली पुड़ विश्वास न केरेले त दूइयोवं निशाने पुड़ ज़रूर विश्वास केरेले। अगर तैना एन दूईये चमत्कारन पुड़ विश्वास न केरन ते तेरी गल न शुन्न त तू नील दरियाएरू पानी एन्हतां शुक्कोरे ज़मीनी पुड़ छ़ेडां, ते तैन पानी ज़ैन तू दरियाए मरां आनेलो, शुक्कोरी ज़मीनी पुड़ खून बनेलू।”
तैखन मूसे यहोवा सेइं ज़ोवं, “हेर मेरे प्रभु मेरी ज़बान साफ नईं, न पेइले थी, न ज़ैस वक्ते करां तू मीं सेइं गल्लां केरने लगोरोस, बल्के अवं त रुकी-रुकी गल्लां केरताईं, किजोकि मेरी ज़बान खेवखीए।” तैखन यहोवा तैस सेइं ज़ोवं, “मैन्हेरू आशी केनि बनेवरूए? लट्टे या टोंवने या लहंने बालो या काने केनी बनेवरेन? कुन अव्वें यहोवा एन न केरि। हुनी तू गा, ते तेरे ज़ोनेरे वक्ते अवं एप्पु तीं सेइं साथी रेइलो ते ज़ैन तीं ज़ोनू भोल्हु अवं तीं शिखालतो रालो।” तैखन तैनी ज़ोवं, “हे मेरे प्रभु, अवं तीं कां मिन्नत केरताईं, कोन्ची होरि मैन्हु भेज़।” तैखन यहोवा मूसे जो सरक अई, ते तैनी ज़ोवं, “लेवी गोट्ले मरां हारून तेरो बड्डो ढ्ला नईं? अवं ज़ानताईं कि तैसेरी ज़बान साफे, ते तै तीं सेइं मिलनेरे लेई हुन्ना एज्जी राहोरोए, ते तै तीं लेहितां दिले मां खुशी भोल्हो। एल्हेरेलेइ तू तैस सेइं सब किछ ज़ोइयां; ते एना सब गल्लां तैस शिखैलां, ते अवं तेरी ते तैसेरी ज़बानरी ज़िमेवारी केरताईं; ते अवं तुसन शिखालतो रालो, कि तुसेईं कुन केरनूए। ते तै तेरी तरफां लोकन सेइं गल्लां केरेलो; ते तै तेरू आशी बनेलो; ते तू तैसेरेलेइ परमेशर ठहरेलो। ते तू ई सोटी हथ्थे मां ने, ते एस्से सेइं इना चमत्कारी निशान हिरेयां।”
मूसेरू मिस्र मुल्खे जो वापस एजनू
एक्सां मूसा अपने शेरहे यित्रो कां वापस एइतां ज़ोने लग्गो, “महरबानी केरतां मीं अज़ाज़त दे, कि अवं मिस्रे मां अपने ढ्लान कां गेईं, ते हेरी कि तैना ठीक आन या नईं।” यित्रोए मूसे सेइं ज़ोवं, “खुशी सेइं गा।” एरू भोवरू थियूं, ज़ैखन मूसा मिद्यान मुल्खे मां थियो तैखन यहोवा तैस सेइं ज़ोवं, “मिस्रे जो वापस गा, किजोकि ज़ैना लोक तीं मारने चाते थिये तैना मेरि जेवरेन।” तैखन मूसे परमेशरेरी सोटी अपने हथ्थे मां नी, ते एपनी कौन्शी ते अपने मट्ठन साथी नेइतां तैन एक्की गधे पुड़ च़ेढ़तां मिस्रे जो च़लो जेव।
यहोवाए मूसे सेइं ज़ोवं, “ज़ैखन तू मिस्र मुल्खे मां पुज़स तैखन हेरा ज़ैना चमत्कार केरनेरी शक्ति मीं तीं दित्तोरी थी, तैना सब फ़िरौनेरे सामने केरां; पन मीं तैसेरो दिल सखत केरनोए, कि तै मेरे लोकन गाने न देलो। तैखन तू फ़िरौने सेइं ज़ोइयां कि यहोवा एन ज़ोते, कि इस्राएल मेरे बड्डे मट्ठेरे ज़ेरोए। ते मीं तीं ज़ोई छ़डोरूए कि मेरे मट्ठे मेरी सेवा केरनेरे लेई गाने दे, पन तीं हुन्ना तगर गाने न दित्ते; एल्हेरेलेइ अवं तेरे बड्डे मट्ठे मारेलो”
तैखन एरू भोवं कि बत्ती मां एक्की धर्मशाली मां यहोवारी मूसे सेइं मुलाकात भोइ; ते तैनी तै मारनो चाव। तैखन मूसेरी कौन्शां सिप्पोरा अक तिख्खो घोड़ आनो ते अपने मट्ठेरो खतनो केरतां मूसेरे पव्वन1 पुड़ शारू ते ज़ोवं, “तू मेरे लेई खूनी मुन्श भोव।” तैखन यहोवा तै छ़ेडी दित्तो; बस तैसां ज़ोवं, “खतनेरे हिसाबे सेइं तू मेरो खूनी मुन्श आस।”
मूसा ते हारूनेरी मुलाकात
ते यहोवा हारूने सेइं ज़ोवं, “जंगले मां गेइतां मूसे सेइं मुलाकात केर।” तै जेव ते परमेशरेरे पहाड़े पुड़ तैस सेइं मुलाकात की ते तैस फुम्मड़ी दित्ती। ते मूसे हारूने सेइं ज़ोवं कि यहोवा मीं सेइं कुन-कुन गल्लां ज़ोइतां अवं भेज़ोरोईं ते कुन-कुन चमत्कार हिरानेरे लेई तैनी हुक्म दित्तोरोए। तैखन मूसा ते हारूने गेइतां सारे इस्राएली बुज़ुर्ग एक्की ठैरी अकोट्ठे कमाए। ते हारूने सब गल्लां ज़ैना यहोवा मूसे सेइं ज़ोवरी थी, तैन सेइं ज़ोई, ते लोकां केरे सामने चमत्कार भी हिराए। तैखन लोकेईं तैन केरू याकीन कियूं; ते एन शुन्तां यहोवा इस्राएली लोकां केरि खबर घिन्नी ते तैन केरे दुखन पुड़ नज़र दित्ती, ते तैनेईं झुकतां यहोवारी आराधना की।
Source notes (1)
- Footnote पव्वन इन मूसेरे गुप्तांगेरे बारे मां ज़ोते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.