Bhadrawahi Bible
निर्गमन 39
याजकेरू कम केरनेरे लेई लिगड़ां
फिरी तैनेईं नीले, बैंगनी ते लाल रंगेरे बुनोरे कपड़े पवित्र ठारारे सेवारे लेई, ते हारूनेरे लेई भी पवित्र लिगड़ां बनां; ज़ेन्च़रे सेइं यहोवाए मूसे जो हुक्म दित्तोरो थियो।
एपोद बनानो
ते तैनी एपोद सोन्ने ते नीले, बैंगनी ते लाल रंगेरे कपड़ेरो, ते सूक्ष्म बटोरे सनेरो बनाव। ते तैनेईं सोन्नू झ़ुस्सी-झ़ुस्सी तैसेरे पत्तरे बनाए, फिरी पत्तरे केट्टी-केट्टी तार बनाई, ते तारी सेइं नीले, बैंगनी ते लाल रंगेरे कपड़े मां ते सूक्ष्म सनेरे कपड़े मां कढ़ाई कियोरे बनावटी सेइं मिलाए। एपोद ज़ोड़नेरे लेई तैनेईं तैसेरे कंधन पुड़ बन्धन बनाए, तै अपने दूईये पासन ज़ोड़ो जेव। ते तैसेरे कसनेरे लेई ज़ै बुनोरो पटको तैस पुड़ बनो, तै तैसेरे साथी बगैर ज़ोड़ोरो, ते तैसेरी बनावटरे मुताबिक, मतलब सोन्ने, नीले, बैंगनी ते लाल रंगेरे लिगड़ेरो, ते सूक्ष्म बटोरी सनेरे कपड़ेरो बनाव; ज़ैस तरीके यहोवाए मूसे जो हुक्म दित्तोरो थियो।
तैनेईं सुलैमानी मणि केटतां तैन मां इस्राएलेरे मट्ठां केरां नंव्वां केरि ज़ेरि छाप घड़ी गाती थी तेन्च़रां घड़ां, ते सोन्नेरे खानन मां लाए। तैनी तैन एपोदेरे कंधेरे बन्धनन पुड़ लुवावं, ज़ैस सेइं इस्राएली केरे लेई याद करानेरी मणि भोए; ज़ैस तरीके यहोवाए मूसे हुक्म दित्तोरो थियो।
सीनाबन्ध बनानो
तैनी चपरास, एपोदेरी ज़ेरि सोन्नेरी, ते नीले, बैंगनी ते लाल रंगेरे लिगड़ां केरि, ते सूक्ष्म बटोरे सनेरे कपड़े मां बेलबूटेरू कम कियोरू थियूं। चपरास त चकोर बनाई; ते तैनेईं तै दोरही बनाई, ते तै दोरो भोइतां अक ढ्लहिठ लम्मो ते अक ढ्लहिठ बिल्लो बनाव। ते तैनेईं तैस मां च़ेवर बारन मां मणि लाई। पेइली बारी मां माणिक्य, पुखराज, ते लालड़ी लाई जेई; ते दूइयोवं बारी मां मरकत, नीलमणि, ते हीरे, ते ट्लेइयोवं बारी मां लशम, सूर्यकांत ते नीलम; ते च़ेवरोवं बारी मां फीरोजा, सुलैमानी मणि ते यशब लाए; इना सब अलग-अलग सोन्नेरे खानन मां लाए जे। ते ई मणि इस्राएलेरे मट्ठां केरे नंव्वेरे गिनतरे मुताबिक 12 थी; 12 गोट्लन मरां हर एक्केरू नवं ज़ेरि छाप घड़ी गाचे तेरू घड़ू जेव। ते तैनेईं चपरासी पुड़ डोरी केरि ज़ेरि बुनोरी शुद्ध सोन्नेरी शंगल बनेइतां लाई; फिरी तैनेईं सोन्नेरे दूई खाने, ते सोन्नेरी दूई केड़ी बनेइतां दूइयेईं केड़िन चपरासेरे दूईये पासन पुड़ लेई; तैखन तैनेईं सोन्नेरी बुनोरी दूईये शंगलन चपरासेरे च़ोटन पुड़ दूइयेईं केड़िन मां लेई। ते बुनोरी दूईये शंगलां केरे दूईये बाकी पासे तैनेईं दूईये खानन मां लाए, एपोदेरे सामने दूईये कंधन पुड़ बन्धनन पुड़ लवं। ते तैनेईं सोन्नेरी दूई केड़ी बनेइतां चपरासेरे दूईये पासन पुड़ तैसेरी तैस कोरी पुड़, ज़ै एपोदेरे एन्त्रियें हिस्से मां थी, लाई। ते तैनेईं सोन्नेरी दूई होरि केड़ी भी बनेइतां एपोदेरे दूईये कंधां केरे बन्धन पुड़ बुन्हां तैसेरे सामने, ते जम्हां कियोरे ज़ेरे, एपोदेरे बनोरे पटके पुड़ लेई। तैखन तैनेईं चपरास तैसेरी केड़ी केरे ज़िरिये एपोदेरी केड़न मां नीले फीते सेइं एन्च़रे बन्धी, कि तै एपोदेरे कढ़ाई कियोरे पटकेरे बा राए, ते चपरास एपोद करां अलग न भोइ बटे; ज़ेन्च़रे यहोवाए मूसे हुक्म दित्तोरो थियो।
बाकी याजकां केरां लिगड़ां बनाना
फिरी एपोदेरो चोगो पूरे नीले रंगेरो बनाव गाए। ते तैसेरी बनावट एरी भोइ कि तैसेरे मझ़ाटे बख्तरेरे सुराखेरे बराबर अक सुराख बनो, ते सुराखेरे च़ेवरे पासन अक कोर बनाई, कि तै छ़िन्दोई न बटे। ते तैनेईं तैसेरे बुनीयें घेरे मां नीले, बैंगनी ते लाल रंगेरे कपड़ेरे अनार बनाए। ते तैनेईं खालिस सोन्नेरी घेन्टी भी बनेइतां चोगेरे बुनीयें घेरेरे च़ेवरे पासन अनारां केरे मझ़ामेई लेई; मतलब चोगेरे बुनीयें घेरेरे च़ेवरे पासन अक सोन्नेरी घैंटी, ते अक अनार फिरी अक सोन्नेरि घैंटी, ते अक अनार लाव जेव कि तैन लेइतां सेवा केरे; ज़ेन्च़रे यहोवाए मूसे हुक्म दित्तोरो थियो।
फिरी तैनेईं हारून, ते तैसेरे मट्ठां केरे लेई बुनोरी सूक्ष्म सनेरे कपड़ेरे अंगरखे, ते सूक्ष्म सनेरां लिगड़ां केरि पगड़ी, ते सूक्ष्म सनेरे लिगड़ेरी रोड़ी टोपी, ते सूक्ष्म बटोरी सनेरां लिगड़ां केरो जाँघियो, ते सूक्ष्म बटोरी सनेरां लिगड़ां केरि ते नीले, बैंगनी ते लाल रंगेरी कढ़ाईयरे कम्मेरी पगड़ी; इन सेब्भन ज़ेन्च़रे यहोवाए मूसे जो हुक्म दित्तोरो थियो तेन्च़रे बनाव।
फिरी तैनेईं पवित्र ताजेरी पटरी खालिस सोन्नेरी बनाई; ते ज़ेन्च़रे छापी मां तेरही ज़ेरि तैस मां इना लफज़ घड़े जे, मतलब “यहोवारे लेई पवित्र भोए।” ते तैनेईं तैस मां नीलो फीतो लव, ज़ैस सेइं तै बा पेगड़ी पुड़ राए, ज़ेन्च़रे यहोवाए मूसे हुक्म दित्तो थियो।
कम्मां पूरां भोना
एन्च़रां मिलापे बाले तेम्बेरू सब कम पूरू भोवं, ते ज़ैस-ज़ैस कम्मेरो हुक्म यहोवाए मूसे जो दित्तोरो थियो, इस्राएली लोकेईं तैसेरे मुताबिक कियूं।
तैखन तैना सैरी चीज़ां मूसे कां नेइतां आए, मतलब घेन्टी, तखते, लरां, खम्भे, कुर्सी सारे सामाने सने तेम्बु; ते लाल रंग सेइं रंगोरी हुड़ां केरि खैड़ी केरू छ़ुंहूं, ते समुन्दरी बछ़ड़ां केरि खाड़ी केरू छ़ुंहूं, ते मझ़ाटेरो पड़दो; डण्डन सने गवैहरो सन्दूख, ते प्रायश्चितेरू ढकनू; सारे सामाने समेत मेज़, ते च़ैढ़ोरी रोट्टी; सारे सामाने सने दीवट ते तैसेरी सजावटरो दीयो ते लौ देनेरे लेई तेल; सोन्नेरि वेदी, ते अभिषेकेरो तेल ते खुशबूदार धूप ते तेम्बेरे दारेरो पड़दो; पितलरी झंझरी, डण्डे ते सारे सामाने सने पितलरी वेदी; ते पेइड़न समेत हौदी; खम्भन ते कुर्सन सने अंगनेरे पड़दे, ते अंगनेरे दारेरे पड़दे, ते डोरी, ते खुन्डे ते मिलापे बाले तेम्बेरे रानेरी ठारारे लेई सेवारू सारू सामान; पवित्र ठारी मां सेवा केरनेरे लेई बुनोरां लिगड़ां, ते हारून याजकेरां पवित्र लिगड़ां, ते तैसेरे मट्ठां केरां लिगड़ां ज़ैन लेइतां तैनेईं याजकेरू कम केरनू थियूं। मतलब ज़ै-ज़ै हुक्म यहोवाए मूसे जो दित्तोरो थियो तैसेरे मुताबिक इस्राएली लोकेईं सब कम कियूं। तैखन मूसे सारे कम्मेरी हेरजाच केरतां तक्कू कि तैनेईं यहोवारे हुक्मेरे मुताबिक सब किछ कियोरूए। ते मूसे तैन आशिर्वाद दित्तो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.