Bhadrawahi Bible
निर्गमन 31
बसलेल ते ओहोलीआब
फिरी यहोवाए मूसे सेइं ज़ोवं, “शुन, अवं ऊरी नंव्वेरे मैन्हेरू मट्ठू बसलेले, ज़ैन हूरेरू पोट्लड़ूए ते यहूदारे गोट्ले मरांए, नवं घिन्तां कुजाताईं। ते अवं तैस परमेशरेरी आत्मा सेइं ज़ै अक्ल, समझ़, ज्ञान, ते सब किसमां केरे कम्मां केरि समझ़ देनेबाली आत्माए तैस सेइं भरपूर केरताईं, ज़ैस सेइं तै कारिगेरेरां कम्मां अक्ली सेइं केढी-केढी हर किसमेरी बनावटी मां मतलब सोन्नू, चाँदी, ते पितली मां, ते पलैटनेरे लेई मणि कटने मां, ते लेकड़ी पुड़ नक्काशी केरनेरू कम केरे। ते शुन, अवं दानेरे गोट्ले बाले अहीसामाकेरे मट्ठे ओहोलीआबे तैसेरे सुपुर्द केरि देताईं, नईं त ज़ेत्रे अक्लमन्दन तैन सेब्भी केरे दिले मां अवं अक्ल देताईं, ज़ैस ज़ेत्री चीज़ां केरो हुक्म मीं तीं ज़ो दित्तोरोए तैन सेब्भन तैना बनान; मतलब मिलापे बाले तेम्बु, ते गवैहरो सन्दूख, ते तैस पुड़ प्रायश्चित बालू ढकनू, ते तेम्बेरू सारू सामान, ते सामाने समेत मेज़, ते सारे सामाने समेत शुद्ध सोन्नेरे दीवट, ते धूपेरी वेदी। ते सारे सामाने समेत होमवेदी, ते पेइड़न समेत हौदी। ते कढ़ाई कियोरां लिगड़ां, ते हारून याजकेरां कम्मे बालां पवित्र लिगड़ां ते तैसेरे मट्ठां केरां लिगड़ां। ते पवित्र ठारारे लेई अभिषेकेरो तेल, ते खुशबूदार धूप, एन सेब्भन ज़ैना हुक्म मीं तीं दित्तोरन तैन केरे मुताबिक बना।”
थैकरी दिहाड़ी
फिरी यहोवा मूसे सेइं ज़ोवं, “तू इस्राएली लोकन सेइं इन भी ज़ोइयां, ‘कि हमेशा तुस मेरे थैकरी दिहाड़ी मेन्नथ, किजोकि तुश्शी पीढ़ी-पीढ़ी मां मेरे ते तुश्शे लोकां केरे लेई ई निशान ठहरावरोए, ज़ैस सेइं तुस ई गल बुझ़ी सखथ कि यहोवा पवित्र केरनेबालोए। एल्हेरेलेइ तुस थैकरी दिहाड़ी मेन्नथ, किजोकि तै तुश्शे लेई पवित्र ठहरेवरीए, ज़ै तैस अपवित्र केरे तै ज़रूर मारो गालो, ज़ै कोई तैस दिहैड़ी मां किछ कम-काज़ केरे तै मैन्हु अपने लोकन मरां ज़रूर कढो गालो। हर हफते शा दिहाड़े कम-काज़ कियूं गाए, पन सत्तोवं दिहाड़ी पवित्र थैकरी दिहाड़ी ते यहोवारे लेई पवित्रे, एल्हेरेलेइ ज़ै कोई आरामेरी दिहैड़ी मां किछ कम-काज़ केरे तै ज़रूर मारो गालो। एल्हेरेलेइ इस्राएली थैकरी दिहाड़ी मन्ते रान, पन पीढ़ी-पीढ़ी मां तैस हमेशारे करारेरे बारे मां सेमझ़तां मेन्नां केरन। तै मेरे ते इस्राएली लोकां केरे दरमियान हमेशा अक निशान रालो, किजोकि शा दिहाड़न मां यहोवाए अम्बर ते धरती बनेवरीए, ते सत्तोवं दिहाड़े आराम केरतां अपनो दिल ठंडो कियो।’”
घोड़ां केरि दूई तेख्ती
ज़ैखन परमेशर मूसा सेइं सीनै पहाड़े पुड़ एरी गल्लां केरि राहोरो थियो, तैखन परमेशरे तैस अपने हथ्थे सेइं लिखोरी गवाही देने बैली घोड़ां केरि दूईये तेख्ती दित्ती।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.