Bhadrawahi Bible
निर्गमन 26
पवित्र तेम्बु
“फिरी मिलापे बाले तेम्बेरे लेई दश पड़दे बनावाने; एना बट्टोरे सनेरे, नीले, बैंगनी ते लाल रंगेरे कपड़े कढ़ाई केरतां करूबन सेइं साथी बनावेइयां। सब पड़दे एक्की नापरे भोन, हर पड़देरी लम्बाई 28 हथ ते चौड़ाई च़ेवर हथ भोए। पंच़ पड़दे एक्की होरि सेइं ज़ुड़ोरे भोन; ते एन्च़रे होरे पंच़ पड़दे भी एक्की होरि सेइं ज़ुड़ोरे भोन। ते ज़ैड़ी इना दूईये पड़दे ज़ुड़ाए गान तैड़ी दूईये कून्न पुड़ नीले-नीले फंदे लुवेइयां। दूईये पासन पुड़ 50-50 फंदे लुवेइयां कि तैना आमने-सामने भोन। ते सोन्नेरे 50 कुन्डे बनावेइयां, ते पड़दे कुन्डां केरे ज़िरिये सेइं एक्की होरि सेइं ज़ुड़ेइयां कि तेम्बु अकोट्ठो भोइतां अक भोए।
“फिरी मिलापे बाले तेम्बु ढकनेरे लेई छ़ेल्ली केरि ज़ड़ां केरे 11 पड़दे बनावेइयां। हर पड़देरी लमबाई 30 हथ ते चौड़ाई च़ेवर हथ भोए, एन्च़रे 11 पड़दे एक्की नापरे भोन। ते पंच़ पड़दे अलग ते शा पड़दे अलग ज़ुड़ेवेइयां, ते शेइयोवं पड़दे तेम्बेरे सामने मोड़तां दोरो केरां। ते तू 50 फंदे तैस पड़देरे कूने पुड़ ज़ै बेइरां मिलाव गाए ते 50 फंदे होरि पासेरे कूने ज़ै बेइरां मिलाव गाए बनावेइयां। ते पितलरे 50 कुन्डे बनेइयां, ते कुन्डे फंदन मां लुवेइतां कि तेम्बु ज़ोड़नेरे लेई तैना मिलतां अक भोइ गान। ते तेम्बेरे पड़दां केरो टंगोरो हिस्सो, ज़ै अध्धो बच़ोरो रालो, तै मिलापे बाले तेम्बेरे पेत्री पासे टंगोरो राए। ते तेम्बेरे पड़देरी लमबाई मरां अक हथ इरां, ते अक हथ उरां रानेरी ठार ढकनेरे लेई दूईये पासन टंगोरो राए। फिरी तेम्बेरे लेई लाल रंगे सेइं रंगोरी हुड़ां केरि खैड़ेरू अक छ़ूँ बनेइयां, ते तैस पुड़ समुन्दरेरे बछ़ड़ां केरे खेड़ि केरू भी अक छ़ूँ बनावेइयां।
“फिरी मिलापे बालो तेम्बु खड़ो केरनेरे लेई किकरेरी लेकड़रे तखते बनावेइयां। हर एक्की तखतेरी लम्बाई 10 हथ ते चौड़ाई डैढ हथ भोए। हर तखते मां एक्की होरि सेइं ज़ुड़ोरी दूई-दूई चूलां भोन, मिलापे बाले तेम्बेरे सब तखते एस तरीके सेइं बनावेइयां। ते मिलापे बाले तेम्बेरे लेई ज़ैना तखते तू बनावालो तैन मरां 20 तखते दक्षिणरे पासे भोन। ते 20 तखतन हैठ चैंदरी 40 कुर्सी बनावेइयां, मतलब, हर एक्की तखते हैठ तैसेरे चूलां केरे लेई दूई-दूई कुर्सी। ते मिलापे बाले तेम्बेरे होरि पासे, मतलब, उत्तरेरे पासे 20 तखते बनावेइयां। तैन केरे लेई चैंदरी 40 कुर्सी बनावेइयां, मतलब हर एक्की तखते हैठ दूई-दूई कुर्सी भोन। ते मिलापे बाले तेम्बेरे पेत्रीं पासे, मतलब पश्चिमेरे पासेरे लेई शा तखते बनावेइयां। ते दूई तखते पेत्रीएं मिलापे बाले तेम्बेरे पासेरे लेई बनावेइयां। ते एना बुना दूई-दूई हिस्से भोन, दूईये हिस्से बेइयें पासे तगर हर एक्की कड़े मां मिलाए गान; दूईये तखतां केरू रूप एरू भोए, एना त दूईये कूनां केरे लेई भोन। ते 8 तखते भोन, ते तैन केरि चैंदरी 16 कुर्सी भोन; मतलब हर एक्की तखते हैठ दूई-दूई कुर्सी भोन।”
“फिरी किकरेरी लेकड़री लरां बनावेइयां, मतलब मिलापे बाले तेम्बेरे एक्की पासेरे तखतां केरे लेई पंच़, ते मिलापे बाले तेम्बेरे होरि पासेरे तखतां केरे लेई पंच़ लरां, ते मिलापे बाले तेम्बेरो ज़ै हिस्सो पश्चिमेरे पासे पेत्रीएं हिस्से मां भोए, तैसेरेलेइ पंच़ लरां बनावेइयां। मझ़ेटीं लर ज़ै तखतां केरे मझ़ाटे भोल्ही, तै तेम्बु केरे एक्की पासेरां होरि पासे तगर पुज़्ज़े। फिरी तखते सोन्ने सेइं मढ़वेइयां, ते तैन केरे कड़े ज़ैना बेंडां केरे घरां केरू कम देले, तैना भी सोन्ने सेइं बनावेइयां, ते लरां भी सोन्ने सेइं मढ़ेइयां। ते मिलापे बालो तेम्बु एन्च़रे सेइं बनावेइयां ज़ेन्च़रे तीं इस पहाड़े पुड़ हिरेवरूए।”
पवित्र तेम्बेरो एन्त्रियों हिस्सो
“फिरी नीले, बैंगनी ते लाल रंगेरे ते सनेरे कपड़ेरो अक मझ़ाटेरो पड़दो बनावेइयां, तै कढ़ाईयरू कम कियोरे करूबन सेइं साथी बने। ते तै सोन्ने सेइं पलैटोरे किकरेरे च़ेवर खम्भन पुड़ टंगनो, एसेरे कुन्डे सोन्नेरे भोन, ते इना चैंदरी च़ेवर कुर्सीन पुड़ खड़ी रान। ते मझ़ेटीं पड़दे कुण्डन हैठ टेंगतां तैसेरी आड़ी मां गवैहरो सन्दूखे भी नेड़े ऐनथ, ते तै मझ़ेटियों पड़दो तुश्शे लेई पवित्र ठारी मां पवित्र ठारी करां अलग कियोरो राए। फिरी परमपवित्र जगाई मां गवैहरे सन्दूखे पुड़ प्रायश्चितेरे ढकने रेखथ। ते तैस पड़देरे बेइरींए मिलापे बाले तेम्बेरे उत्तरेरे पासे मेज़ रेखथ, ते तैसेरे दक्षिणेरे पासे मेज़ेरे सामने दीवट रेखथ।”
पवित्र तेम्बेरू खास दार
“फिरी तेम्बेरे दारेरे लेई नीले, बैंगनी ते लाल रंगेरे बट्टोरी सूक्ष्म सनेरे कपड़ां केरू कढ़ेईयेरू कम कियोरू भोए अक पड़दो बनावेइयां। ते इस पड़देरे लेई किकरेरे पंच़ खम्भे बनावेइयां, ते तैन सोन्ने सेइं पलैट्टां, तैन केरि केड़ी सोन्नेरी भोन, ते तैन केरे लेई पितलरी पंच़ कुर्सी ढैलतां बनावेइयां।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.