Bhadrawahi Bible
निर्गमन 21
गुलामां केरे नियम
फिरी ज़ैना नियम तीं तैन्न समझ़ाने भोल्हे तैना इना आन, “ज़ैखन तुस कोई इब्रि गुलाम घिन्थ त तै शा सालन तगर कम केरतो राए, ते सत्तोवं साले मुफ्त आज़ाद भोइतां च़लो गाए। अगर तै अकैल्लो एवरो भोए, त अकैल्लो च़लो गाए, ते अगर तैसेरी लाड़ी साथी एवरी भोए, त तैस सेइं साथी तैसेरी लाड़ी भी च़ली गाए। अगर तैसेरे मालिके तैस लाड़ी दित्तोरी भोए त तैस सेइं तैसेरां मट्ठां या कुइयां भोवरां भोन, त तैसेरी कौन्श ते बच्चे तैस मालिकेरेन, ते तै अकैल्लो च़लो गाए। फिरी अगर तै नौकर एपनी मेर्ज़ी सेइं ज़ोए, ‘अवं अपने मालिके, ते अपने लाड़ी ते बच्चन सेइं प्यार केरताईं एल्हेरेलेइ अवं आज़ाद भोइतां गानू न चेहीं।’ त तैसेरो मालिक तैस परमेशरे कां ने; फिरी तैस दारे पुड़ या दारे मां गेइतां सुतैरी सेइं तैसेरो कन कोश्शे, तैसेरां बाद तै सदा तैसेरी सेवा केरतो राए।
“अगर कोई एपनी कुइये नौकरानी बन्नेरे लेई बेच़े, त तै नौकरेनरी ज़ेरि छुट्टी न सखे। अगर तैसारो मालिक तैस अपनि कौन्श बनाए, ते फिरी तैस सेइं खुश न भोए, त तै तैस करां अपनि कीमत वापस घिन्तां गाने दे, किजोकि तैस धोखो केरतां तैस होरि मुल्खेरे लोकन जो बेच़नेरो अधिकार न भोल्हो। अगर तैनी तै अपने मट्ठे जो ड्लाहोरी भोए, त तै तैस सेइं कुइयरो ज़ेरो बर्ताव केरे। चाहे तै दूइयोवं कौन्श बनाए, फिरी भी तैसारी रोट्टी, लिगड़ां ते तैस करां दूर न राए। अगर तै इन ट्लेइ गल्लन मरां कमी केरे, त तै आज़ाद भोनेरे रुपेइये देनेरां बगैर मुफते मां च़ली गाए।”
दंगां केरे बारे मां नियम
“ज़ै कोई कोन्ची मैन्हु एरी बाए कि तै मैन्हु मेरि गाए, त तै भी ज़रूर मारो गाए। पन अगर तै तैस मारनेरे लेई न भोए बिशोरो, ते परमेशरेरी मेर्ज़ी सेइं तैसेरे हथ्थे मां एवरो भोए, त एस हालती मां ज़ैस जगाई अवं ठहरेईं तैड़ी जो नेश्शी गाए। पन अगर कोई ज़िद्दी सेइं कोन्ची पुड़ हमलो केरतां तैस धोखे सेइं मारे, त तैस मारनेरे लेई मेरी वेदी करां भी दूर नेइयथ।”
“ज़ै अपनि अम्मा या बाजी मारे-कुट्टे तै ज़रूर मारो गालो।
“ज़ै कोई कोन्ची मैन्हु च़ोरे, चाए तैस नेइतां बेच़ी छ़डे, चाहे तै तैस कां मैल्हे, त तै भी ज़रूर मारो गालो।
“ज़ै अपने बाजी या अम्मा जो लानत दे तै भी ज़रूर मारो गालो।
“अगर मैन्हु लड़ते भोन, ते एक्की होरि जो घोड़ेईं या मुक्केईं बैइतां एरी बान कि तै मरे न बल्के तै बिसतरे पुड़ रेही गाए। ते ज़ैखन तै उठतां सोटरे सहारे सेइं अन्तर बेइर च़लने फिरने लगे, तैखन तै मारनेबालो बेकसूर ठहरेलो; तैस हालती मां तै तैसेरे बिश्शोरे रानेरे वक्तेरो नुकसान भेरि दे, ते तैस रोड़ेच़ारे ठीक केरि दे।
“अगर कोई तैसेरे नौकर या नौकरैनी सोटी सेइं एरी बाहे कि तै तैसेरे बाने सेइं मेरि गाए, तैखन त तैस ज़रूर सज़ाह दित्ती गाए। पन अगर तै एक्की दूई दिहाड़े ज़ींतो राए, त तैसेरे मालिके सज़ाह न दित्ती गाए, किजोकि तै नौकर तैसेरू अपनु धने।
“अगर मैन्हु एप्पु मांमेइं मारपीट केरतां कोन्ची दोज़ींती कौन्शी चोट पुज़ान, कि तैसारो बच्चो निस्सी गाए, पन होरो कोई नुकसान न भोए, त बाने बाले तेत्री सज़ाह दित्ती गाए, ज़ेत्री तैस कौन्शरो मुन्श पंचायतरे सामने ज़ोए। पन अगर तैस होरो नुकसान पुज़्ज़े, त जानरे बदले जान, ते अछ़रे बदले अछ़, ते दंतेरे बदले दंत, ते हथ्थेरे बदले हथ, ते पव्वेरे बदले पव। ते दागेरे बदले दाग, ते ज़खमेरे बदले ज़खम, ते मारारे बदले मारारी सज़ाह भोल्ही।
“ज़ैखन कोई अपने नौकर या नौकरानी एछ़्छ़ी पुड़ एरी बाहे कि अछ़ निस्सी गाए, त तै तैसेरी अछ़रे बदले आज़ाद केरतां गाने दे। ते अगर तै अपने नौकर या नौकरैनी बैइतां तैसारो दंत ट्लोड़ी छ़डे, त तै तैसेरे दंतेरे बदले तैस आज़ाद केरतां गाने दे।
जानबरां केरे बारे मां नियम
“अगर दांत कोन्ची मड़दे या कौन्शी शिंगे सेइं एन्च़रे मारे कि तै मेरि गाए, त तै दांत त ज़रूर घोड़ेईं सेइं मारो गालो, ते तैसेरू मास न खाव गाए; पन दांतेरो मालिक बेकसूर रालो। पन अगर तैस दांते पेइलेरी देंती शिंगे सेइं मारनेरी आदत भोए, ते तैसेरे मालिके ज़ोइतां भी तैनी तै दांत बंधोरो न भोए, ते तै कोन्ची मड़दे या कौन्शी मैरी छ़डे, त तैस दांते पुड़ घोड़ेईं दित्ती गान, ते तैसेरो मालिक भी मारो गाए। अगर तैस मारोरे मैन्हेरे बदले कोई कीमत मग्गी गाए, त ज़ेत्रू तै एपनी जानरे बदले मां मग्गे, तेत्रू दित्तू गाए। चाए दांते कोई मट्ठू या कुई मारोरी भोए, फिरी भी इस्से नियमेरे मुताबिक तैसेरे मालिके सेइं बर्ताव कियो गाए। अगर दांत केन्चेरे नौकर या नौकरानी शिंगे सेइं बावरी भोए, त दांतेरो मालिक तैस नौकरेरे मालिके 30 शेकेल रूपा1 दे, ते तैस दांते घोड़ेईं दित्ती गान।
“अगर कोई मैन्हु खढो घेड़तां तैस बन्द न केरे, ते तैस मां केन्चेरो दांत या गधो बिछ़ड़ी गाए। त ज़ेसेरो तै खढो भोए त तैस करां तै नुकसान पूरो केरे, तै जानबरेरे मालिकेरो नुकसान भेरि दे, ते ज़ेसेरो खढो भोए मरोरो जानबर तैसेरो भोए।
“अगर केन्चेरो दांत केन्चेरे दांते ज़खम बनाए, कि तै मेरि गाए, त तैना दूईये मैन्हु ज़ींते दांते बेच़तां तैसेरी कीमत एप्पु मांमेइं अध्धी-अध्धी बेन्टी छ़डन, ते मरोरे दांते भी एन्च़रे बंटन। अगर ई गल सब लोक ज़ानतन कि तैस दांतेरी पेइली देंती मारनेरी आदत थी, पन तैसेरे मालिके तै बेन्धतां नईं रखोरो, त ज़रूर तैस दांतेरे बदले दांत दे, पन मरोरो दांत तैसेरो भोए।
Source notes (1)
- Footnote 30 शेकेल रूपा लगभग 342 ग्राम।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.