Bhadrawahi Bible
निर्गमन 19
सीनै पहाड़े पुड़ यहोवारू दर्शन
इस्राएली लोकन मिस्र मुल्खेरां निसोरे ज़ैस दिहाड़े ट्लाई महीने बीती जेवरे थिये, तैस दिहाड़े तैना सीनैरे जंगले मां आए। ते ज़ैखन तैना रपीदीमेरां सफर केरतां सीनैरे जंगले मां आए, तैखन तैनेईं जंगले मां डेरे लाए, ते तैड़ी पहाड़े पुड़ इस्राएली लोकेईं डेरे लाए। तैखन मूसो पहाड़े पुड़ परमेशरे कां गानेरे लेई च़लो जेव, ते यहोवाए पहाड़े पुड़ेरां तैस जो आवाज़ देइतां ज़ोवं, “याकूबेरे घराने सेइं इन ज़ो, ते इस्राएली लोकन मेरू इन वचन शुना। तुसेईं एप्पु लाहेरूए कि मीं मिस्री लोकन सेइं कुन-कुन कियोरूए, तुस मन्ना कि उकाब च़ुड़ोलोवेरे ज़ेरे फंघन पुड़ च़ैढ़तां एप्पु कां आनोरेथ। एल्हेरेलेइ हुनी अगर तुस सच़्च़े मेरी गल मन्नेले, ते मेरे करारे मन्नेले, त सब कौमन मां तुस मेरी अपनि मलकीत रानेथ, किजोकि सारी ज़मीन मेरीए। ते तुस मेरे लेई याजकां केरू राज़ भोल्हे ते पवित्र लोक ठहरेले। ज़ैना गल्लां तुसेईं इस्राएली लोकन सेइं ज़ोनिन तैना इना आन।”
तैखन मूसे एइतां लोकां केरे बुज़ुर्ग कुजेइतां, तैन केरे सामने तैना सब गल्लां ज़ैना ज़ोनेरो हुक्म यहोवाए तैस दित्तोरो थियो, तैन समझ़ेई। ते सब लोक मिलतां ज़ोने लगे, “ज़ैन किछ यहोवाए ज़ोवरूए तैन सब अस रोज़ केरमेले।” लोकां केरि एना गल्लां मूसे यहोवा कां पुज़ेई। तैखन यहोवाए मूसे सेइं ज़ोवं, “शुन अवं एल्हेरेलेइ बिदलारारे आंधरे मां रेइतां तीं कां एइताईं, एल्हेरेलेइ कि ज़ैखन अवं तीं सेइं गल्लां केरि, तैखन तैना लोक शुन्न, ते हमेशा तेरू याकीन केरन।” ते मूसे यहोवाए सेइं लोकां केरि गल्लां बियान की। तैखन यहोवा फिरी मूसे सेइं ज़ोवं, “लोकन कां गेइतां तैन अज़ ते कालां पवित्र केर, ते तैना अपना लिगड़ां धोई छ़डन। ते तैना ट्लेइयोवं दिहाड़ी जो तियार भोइ गान, किजोकि तैस दिहाड़े यहोवा सेब्भी लोकां केरे हेरते सीनै पहाड़े पुड़ एजनोए। एल्हेरेलेइ तू लोकां केरे लेई च़ेवरे पासन बाड़ दे, ते तैन्न सेइं ज़ोइयां, ‘तुस खबरदार राथ कि पहाड़े पुड़ न गेइयथ, या तैसेरी सरहद्दी सेइं भी न हुरथ, ते ज़ै कोई पहाड़े सेइं हुरेलो, त ज़रूर मारो गालो। तैस सेइं कोई हथ न लाए, ज़ै तैस सेइं हुरेलो त तैस जो घोड़ेईं देइयथ, या तीरे सेइं कोश्शो गालो, चाहे जानबर भोए या मैन्हु, तै ज़ींतो न रालो।’ ज़ैखन बेड़ि आवाज़ी बालो नरशिंगेरो शब्द ठड्डी तगर शुनोलो, तैखन लोक पहाड़े कां एज्जन।”
तैखन मूसे पहाड़े पुड़ेरां ओस्तां लोकन कां गेइतां तैना पवित्र किये, ते तैनेईं अपना लिगड़ां धोई छ़डां। ते तैनेईं लोकन सेइं ज़ोवं, “ट्लेइयोवं दिहाड़े तगर तियार भोइ गाथ, कौन्शी कां न गेइयथ।”
ज़ैखन ट्लेइयोवं दिहाड़ी आई, तैखन झ़ेझ़ भोंते अम्बर गुड़ने ते झ़पने लग्गू, ते पहाड़े पुड़ काली बिदलार पेई जेई; फिरी नरशिंगेरी बड़ी आवाज़ आई, ते डेरन मां ज़ेत्रे लोक थिये सब डेरतां थरकने लगे। तैखन मूसे लोक परमेशरे सेइं मिलनेरे लेई डेरन मरां कढे, ते तैना पहाड़े करां बुन खड़े भोए। ते यहोवा ज़ै अग्गी मां भोइतां सीनै पहाड़े पुड़ एवरो थियो, एस वजाई सेइं सारू पहाड़ तूए सेइं भेरोई जेवं; ते तैसेरो तूँ भेट्ठरो ज़ेरो निसने लगोरो थियो, ते सारू पहाड़ बड़ू हिलने लगोरू थियूं।1 ते ज़ैखन नरशिंगेरी आवाज़ बड़ी जादे ते बद्धती जेई, तैखन मूसे ज़ोवं, ते परमेशरे आवाज़ शुन्तां जुवाब दित्तो। ते यहोवा सीनै पहाड़ेरे च़ोटी पुड़ ओस्सो, ते मूसो पहाड़ेरे च़ोटी पुड़ कुजव, ते मूसो उबरो च़ेढ़ी जेव। तैखन यहोवाए मूसे सेइं ज़ोवं, “उन्ढे ओस्तां लोकन खबरदारी दे, कधे एरू न भोए, कि तैना बाड़ ट्लोड़तां यहोवा तकनेरे लेई एज्जन, ते तैन मरां बड़े मेरि गान। ते याजक ज़ैना यहोवा कां नेड़े एज्जा केरतन, तैना भी अपनो आप पवित्र केरन, कधी एरू न भोए कि यहोवा तैन पुड़ हमलो केरे।” मूसे यहोवाए जुवाब दित्तो, “तैना लोक सीनै पहाड़े पुड़ न च़ेढ़ी सखन, तीं त एप्पु असन इन ज़ोइतां खबरदार कियोरेन कि पहाड़ेरे च़ेवरे पासन बाड़ बेन्धतां तैस पवित्र रखा।” यहोवा तैस सेइं ज़ोवं, “हुनी तू उन्ढे ओस्तां हारूने साथी आन, पन याजक ते सारे लोक कधी यहोवा कां बाड़ ट्लोड़तां न एज्जन, कधी एरू न भोए कि तै तैन पुड़ हमलो केरे।” ते एन गल्लां मूसे ओस्तां लोकन शुनेई।
Source notes (1)
- Footnote सारू पहाड़ बड़ू हिलने लगोरू थियूं। सारे लोक बड़े डेरि जेवरे थिये।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.