Bhadrawahi Bible
सभोपदेशक 8
अक्लमन्देरे बराबर कौने? ते कोन्ची गल्लरो मतलब कौन केढी सकते? मैन्हेरू तुत्तर तैसेरी अक्लरे वजाई सेइं चमकते, ते तैसेरे तुत्तरेरी सरक तैसेरे तुत्तरे करां दूर भोइ गाचे।
राज़ेरो हुक्म मन
अवं तीं सलाह देताईं कि परमेशरेरी कसम खानेरे वजाई सेइं राज़ेरो हुक्म मेन्नां। राज़ेरे सामनेरां जल्दी केरतां न गेइतां, ते न बुरी गल्ली पुड़ जिद केरां, किजोकि राज़ो ज़ैन चाते तैन्ने केरते। किजोकि राज़ेरी गल्लन मां शक्ति भोचे, ते तैस कौन ज़ोई सकते कि तू एन कुन केरतस? ज़ै हुक्म मन्ते, तै खतरे करां बच़ेलो, ते अक्लमन्द मैन्हेरो मन मौकेरो ते न्यायेरो भेद ज़ानते। किजोकि हर एक्की गल्लरो मौको ते कानून भोते, चाहे मैन्हेरो दुख तैसेरेलेइ बड़ो भारी भोते। तै न ज़ाने कि कुन भोनेबालूए, ते किताली भोल्हु? या तैन कौन ज़ोई सकते? एरहो कोई मैन्हु नईं ज़ेसेरो अपने प्राणे पुड़ बस च़ले कि तैस निसते बार रोकी सके, ते न मौतरे दिहाड़े पुड़ अधिकार भोए, ते न तैस लड़ैई मां छुट्टी मैल्ही सके, ते न दुष्ट लोक, अपने दुष्टेरे वजाई सेइं बेच़ी सकन। ज़ेत्रां कम्मां दुनियाई मां कियां गातन तैना सब ध्याने सेइं हेरतां मीं लेवरन, ते एन भी मीं लाहेरूए कि अक मैन्हु होरी मैन्हु पुड़ अधिकारी बेनतां अपनो नुकसान केरते।
दुष्ट ते धर्मी
फिरी मीं दुष्ट लोक दबते लाहोरेन, ज़ैना पवित्र ठैरी मां एइते गाते थिये, ते ज़ैस नगरे मां तैना एन केरते थिये तैड़ी तैन कोई याद भी न केरे; एन भी सब बेकारे। बुरे कम्मेरी सज़ाहरो हुक्म लूशी न दित्तो गाए; एस्से वजाई सेइं मैन्हेरो मन बुरू कम केरनेरे लालच़े सेइं भरोरो रहते। चाहे पापी 100 बार पाप केरे, ते अपनि उमर भी बधाए, फिर भी मीं निसचोए कि ज़ैना परमेशरे करां डरतन ते तैस सामने बुझ़तां डरे सेइं च़लतन, तैन केरू भलू भोल्हु। पन दुष्टी मैन्हेरू भलू नईं भोनेबालू, ते न तैन केरि ज़िन्दगरी उमर लम्मी भोल्ही, किजोकि तै परमेशरेरो डर न मन्ने।
अक बेकार गल ज़ै इस धेरती पुड़ भोचे, मतलब एरे धर्मी आन कि ज़ैन केरि एरी हालत भोचे, ज़ै दुष्टी केरि भोवरी लोड़चे, ते एरे दुष्टी भी आन ज़ैन केरि एरी हालत भोचे ज़ै धेर्मी केरी भोवरी लोड़ती थी, अवं ज़ोने लगो एन भी बेकारे। तैखन मीं आनन्देरी तारीफ़ की, किजोकि दुनियाई मां मैन्हेरे लेई खाने पीने ते आनन्देरे अलावा होरू किछ भी रोड़ू नईं, किजोकि तैन्ने तैसेरी ज़िन्दगी मां परमेशरे दुनियाई मां रखेरूए, तैसेरी मेहनती सेइं तैस्से सेइं साथी रालू।
ज़ैखन मीं अक्ल हासिल केरनेरे ते सब कम्मां हेरनेरे लेई ज़ैना दुनियाई मां कियां गातन, अपनो मन लाव, कि केन्च़रे मैन्हु रात दिहैड़ी बींझ़े रहतन; तैखन मीं परमेशरेरां सारां कम्मां लहां ज़ैना दुनियाई मां कियां गातन, तैसेरी बुनीयाद मैन्हु तोप्पी न सकन, चाहे मैन्हु तैसेरी तलाशी मां ज़ेत्री भी मेहनत कि न केरे, फिर भी तैसेरो पतो न केरि सकन, ते अगर अक्लमन्द ज़ोए भी कि अवं एस सेमझ़ी सकताईं, पन तै भी तैस सेमझ़ी न सके।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.