Bhadrawahi Bible
व्यवस्थाविवरण 8
परमेशरेरू शुक्र केरनू
“ज़ै-ज़ै हुक्म अवं अज़ तीं शुनाताईं तैन सेब्भन पुड़ च़लनेरी एतिहात केरां, एल्हेरेलेइ कि तुस ज़ींते राथ ते बद्धते राथ, ते ज़ैस मुल्खेरे बारे मां यहोवाए तुश्शे दादे-पड़दादन सेइं कसम खेवरीए तैस मां गेइतां तैसेरे अधिकारी भोइ गाथ। ते याद रख कि तेरो परमेशर यहोवा तैन 40 सालन मां तू सारे सुनसान ठारारे बत्ती मांमेइं एल्हेरेलेइ आनोरोस, कि तै तीं नम्र बनाए, ते तेरी अज़मैइश केरतां इन ज़ाने कि तेरे मने मां कुन-कुने, कि तू तैसेरे हुक्मन मन्नेलो या नईं। तैनी तू नम्र बनाव, ते नियन्नो भी रख्खो, फिरी तै मन्नो, ज़ैस न तू ते न तेरे सियाने ज़ानते थिये, तैन्ने तीं खुवाव; एल्हेरेलेइ कि तै तीं शिखाले कि मैन्हु सिर्फ रोट्टी सेइं ज़ींतो न राए, पन ज़ैना-ज़ैना वचन यहोवारे ज़बाना निसतन तैन्ने सेइं तै ज़ींतो रहते। इन 40 सालन मां तेरां लिगड़ां पुरानां न भोआं, ते तेरे जानी पुड़ेरां भी न बिछ़ड़ां, ते न तेरे पव शोजे। फिरी अपने मने मां ई त खियाल केर, कि ज़ेरो कोई अपने मट्ठे हदैइत देते तेन्च़रे तेरो परमेशर यहोवा तीं हदैइत देते। एल्हेरेलेइ अपने परमेशर यहोवारो हुक्मन मन ते तैसेरे बत्तन पुड़ च़लनू, ते तैसेरो डर मनतो रानू। किजोकि तेरो परमेशर यहोवा तीं एक्की रोड़े मुल्खे मां नेही राहोरोए, ज़ै पैनेरे दरियां केरो, ते वैदी ते पहाड़न मरां निसोरे डुग्घे-डुग्घे पैनेरे चश्मां केरो मुल्खे। ई एरहो मुल्खे ज़ैस मां गेहुं, जौ, दाछ़, फैगू, ते अनार आन; ई एरहो मुल्खे ज़ैस मां ज़ैतूनेरो तेल ते माछ़ी भोते। तैस मुल्खे मां अन्न माघू न भोल्हु, ते न तैस मां तीं कोन्ची चीज़री घटी भोल्ही; तैस मुल्खेरे पहाड़न मां लोंहे, ते तैट्ठेरे पहाड़न मरां तू ट्लाम घेड़तां केढी सकेलो। ते तू पेट भेरतां खाएलो, ते तैस रोड़े मुल्खेरे वजाई सेइं ज़ै तेरो परमेशर यहोवा तीं देलो तैस धन मन्नेलो।”
परमेशरेरे कम्मन न बिसरथ
“एल्हेरेलेइ खबरदार रानू, कोन्च एरू न भोए कि अपने परमेशर यहोवाए बिसरतां तैसेरो ज़ै-ज़ै हुक्म, नियम, ते विधि, अवं अज़ तीं शुनाताईं तैन केरू मन्नू शारस; एरू न भोए कि ज़ैखन तू खेइतां रेज़्ज़ी गास, ते रोड़ां-रोड़ां घरां बनेइतां तैन मां राने लग्गस, ते तेरां गोरू, गब्बां हछां भोन, ते तेरू सोन्नू, चाँदी, ते तेरू हर किसमेरू धन बद्धतू गाए, तैखन तेरे मने मां घमण्ड एज्जी गाए, ते तू अपने परमेशर यहोवाए बिसरी गास, ज़ैने तू गुलैमरे घरे मतलब मिस्र मुल्खे मरां केढतां आनोरोस, ते तैस बड्डे, ते डराने बाले सुनसान ठैरी मेइं आनोरोस, ज़ैड़ी बड़े ज़ेरहे बाले सप ते बिच़्च़ू आन, ते बगैर पैनेरे शुकोरे मुल्खे मां तैनी तेरे लेई चकमकेरी चट्टानी मरां पानी कढू, ते तीं सुनसान ठैरी मां मन्नो खुवाव, ज़ैस तुश्शे सियाने ज़ानते भी न थिये, एल्हेरेलेइ कि तै तीं हलीम बनाए, ते तेरी अज़मैइश केरतां आखरी मां तेरू भलू केरे। ते कोन्च एरू न भोए कि तू सोचने लग्गस, कि ई जाईदात मेरे ताकती ते मेरे अपने ताकती सेइं मीं हासिल कियोरीए। पन तू अपने परमेशर यहोवा याद रेखां, किजोकि तैए ज़ै तीं जाईदात हासिल केरनेरी ताकत एल्हेरेलेइ देते, कि ज़ै करार तैनी तेरे सियानन सेइं कसम खेइतां कियोरो थियो तैस पूरो केरे, ज़ेरू अज़ बांदू आहे। अगर तू अपने परमेशर यहोवा बिसरतां होरि देबतन पत्ती गालो, ते तैन केरि सेवा केरेलो ते तैन कां झुकेलो, त अवं अज़ तुसन ज़ोताईं कि इस मां कोई शक नईं तुस नाश भोइ गाले। ज़ैन कौमन यहोवा तुश्शे सामनेरां खतम केरने पुड़ आहे, तैन्ना केरे ज़ेरे तुस भी अपने परमेशर यहोवारू वचन न मन्नेरे वजाई सेइं नाश भोइ गाले।”
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.