Bhadrawahi Bible
व्यवस्थाविवरण 3
बाशानेरे लोकन सेइं लड़ाई
“तैखन अस मुड़तां बाशान प्रदेशेरे बत्तां उबरे गुस्से; ते तैट्ठेरो ओग नंव्वेरो राज़ो अपनि सैरी सेनाई समेत इश्शो मुकाबलो केरनेरे लेई निस्सी अव, कि एद्रेई मां लड़ाई केरे। तैखन यहोवाए मीं सेइं ज़ोवं, ‘तैस करां न डर; किजोकि अवं तैस सारे सेना ते मुल्खे समेत तेरे हथ्थे मां केरताईं; ते ज़ेरू तीं हेशबोनेरे रानेबाले एमोरी लोकां केरे राज़े सीहोने सेइं कियोरूए तेरहु तैस सेइं भी केरां।’ एन्च़रां इश्शो परमेशर यहोवाए सारी सेनाई सने बाशान प्रदेशेरो राज़ो ओग भी इश्शे हथ्थे मां केरि दित्तो; ते अस तैस इड़ी तगर मारते राए कि तैन मरां कोई भी न बच़ो। तैस्से वक्ते असेईं तैन केरां सारां नगरां नियां, कोई एरू नगर न रेइ जेवं ज़ैन असेईं तैन करां न निव, एन्च़रां अर्गोबेरो सारो मुल्ख, ज़ै बाशाने मां ओगेरे रियासती मां थियो ते तैस मां 60 नगरां थियां, तै इश्शे कब्ज़े मां अव। इना सब नगरां क़िले बालां थियां, ते तैन केरि उच्ची-उच्ची दिवारां, ते फाटक, ते फाटकन अड्डे थिये, ते इन केरे अलावा बगैर दिवारां केरां भी बड़ां नगरां थियां। ते ज़ेरू असेईं हेशबोनेरे राज़े सीहोनेरे नगरन सेइं कियोरू थियूं तेरहु असेईं इन नगरन सेइं भी कियूं, मतलब सब बस्सोरे नगरन कौन्शन ते बच्चन समेत तैना नाश केरि दित्तां। पन सब पैलतू जानबर ते नगरां केरि लूट असेईं अपनि बनाई। एन्च़रां असेईं तैस वक्ते यरदनेरे इस पासे रानेबाले एमोरी लोकां केरे दूईये राज़ां केरे हथ्थे मरां अर्नोनेरे नाले करां लेइतां हेर्मोन पहाड़ तगरेरो मुल्ख नियो। (हेर्मोने जो सीदोनी लोक सिर्योन, ते एमोरी लोक सनीर ज़ोतन।) समथर मुल्खेरे सब नगर, ते सारो गिलाद प्रदेश, ते सल्का, ते एद्रेई तगर ज़ैना ओगेरे रियासतरे नगरां थियां, सारू बाशान इश्शे कब्ज़े मां अवं। ज़ैना रपाई रेइ जेवरे थिये, तैन मरां सिर्फ बाशानेरो राज़ो ओग रेइ जेवरो थियो, तैसेरी पलंघ ज़ै लोंहेरो थियो तै त अम्मोनी केरे रब्बाह नगरे मां पेवरोए, आम मड़देरे हथ्थेरे हिसाबे सेइं तैसेरी लम्बाई नौ हथ ते चौड़ाई च़ेवर हथ्थे।
यरदन दरियारे पूर्वेरी ज़मीन
“तैस वक्ते ज़ै मुल्ख असेईं अपने अधिकारे मां कियो तै ई आहे, मतलब अर्नोनेरे नालेरे बन्नेबाले अरोएर नगरे करां लेइतां सब नगरन सने गिलादेरे पहाड़ी मुल्खेरो अध्धो हिस्सो, ज़ै मीं रूबेनी ते गादी लोकन दित्तो, ते गिलादेरो बच़ोरो हिस्सो, ते सारू बाशान, मतलब अर्गोबेरो सारो मुल्ख ज़ै ओगेरे रियासती मां थियो, इन मीं मनश्शेरे अध्धे गोट्ले दित्तोरूए। (सारू बाशान त ज़ैस जो रपाई लोकां केरो मुल्ख ज़ोतन। ते मनश्शेई याईरे गशूरी लोक ते माकावासी लोकां केरे सरहद्दी तगर अर्गोबेरो सारो मुल्ख नियो, ते बाशानेरे नगरां केरू नवं अपने नव्वें पुड़ हब्बोत्याईर1 रख्खू, ते तैन्ने नवं अज़ तगर ज़ोतन।) ते मीं गिलाद मुल्ख माकीरे दित्तो, ते रूबेनी लोकन ते गादी लोकन मीं गिलादे करां लेइतां अर्नोनेरे नाले तगरेरो मुल्ख दित्तो, मतलब तैस नालेरे मझ़ाटे तैन केरि हद बनाई, ते यब्बोक दरियाए तगर ज़ै अम्मोनी लोकां केरि हद्दे; ते किन्नेरेत करां लेइतां पिसगारे ढलानेरे बुनीयें अराबारे समुन्दरे तगर, ज़ैस जो खारो समुन्दर ज़ोतन, अराबा ते यरदनेरे पूर्वेरे पासेरो सारो मुल्ख भी मीं तैन्ने दित्तोरोए।
“तैस वक्ते मीं तुसन ई हुक्म दित्तो, ‘तुश्शे परमेशर यहोवाए तुसन ई मुल्ख दित्तोरोए कि तैस अपने अधिकारे मां रखा; तुस सब जंगी हथियार-बन्द भोइतां अपने ढ्ला इस्राएली लोकां केरे अग्री-अग्री पार च़ला। पन तुश्शी कौन्शां, ते बाल-बच्चे, ते जानबर, ज़ैन अवं ज़ानताईं कि बड़े आन, तैना सब तुश्शे नगरन मां ज़ैना मीं तुसन दित्तोरेन रेइ गान। ते ज़ैखन यहोवा तुश्शे ढ्लान तेरहो आराम दे ज़ेरो कि तैनी तुसन दित्तोरोए, ते तैना तैस मुल्खेरे अधिकारी भोइ गान ज़ै तुश्शो परमेशर यहोवाए तैन्न यरदने पार देते; तैखन तुस भी अपने-अपने अधिकारेरे ज़मीनी पुड़ ज़ै अवं तुसन दित्तोरीए वापस देइलो।’ फिरी मीं तैस्से वक्ते यहोशू हुक्म दित्तो, ‘तीं अपनि एछ़्छ़न सेइं लाहेरूए कि तेरे परमेशर यहोवाए इन दूईये राज़न सेइं कुन-कुन कियोरूए; तेरहु यहोवा तैन सब रियासतन सेइं केरेलो ज़ैन मां तू पार भोइतां गालो। तैन करां न डेरां; किजोकि ज़ै तुश्शे तरफां लड़ने बालोए तै तुश्शो परमेशर यहोवाए।’
मूसे कनान मुल्खे मां दाखल भोनू मनाह
“तैस्से वक्ते मीं यहोवा कां बड़े छंदे केरतां बिनती की, ‘हे प्रभु यहोवा, तू अपने दासे अपनि महिमा ते ज़ोरे बालो हथ हिराने लगोरोस; सुर्गे मां ते धेरती पुड़ एरहो कौन देबतोए ज़ै तेरां ज़ेरां कम्मां ते महान कम्मां केरि सके? एल्हेरेलेइ मीं पार गाने दे कि यरदने पार तैस रोड़े मुल्खे मतलब तैस रोड़े पहाड़ ते लबानोने भी हेरी सेखी।’ पन यहोवा तुश्शे वजाई सेइं मीं सेइं क्रोधे भोइ जेव, ते मेरी न शुनी; पन यहोवा मीं सेइं ज़ोवं, ‘बस केर; इस बारे मां फिरी कधे मीं सेइं गल्लां न केरां। पिसगा पहाड़ेरी च़ोटी पुड़ च़ढ़, ते पूर्व, पश्चिम, उत्तर, दक्षिण, च़ेवरे पासन नज़र केरतां तैस मुल्खे हेर; किजोकि तू इस यरदनेरे पार न गेइ सकेलो। ते यहोशू हुक्म दे, ते तैस हिम्मत देइतां मज़बूत केर; किजोकि इन लोकन अग्री-अग्री तैए पार गालो, ते ज़ै मुल्ख तू लाहेलो तैए तैन केरो अपनो हिस्सो केरतां देइलो।’ तैखन अस बेतपोरेरे सामने वैदी मां रुकोरे राए।
Source notes (1)
- Footnote हब्बोत्याईर याईरेरां ड्लाव्वां
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.