Bhadrawahi Bible
व्यवस्थाविवरण 19
खून केरनेबालां केरे लेई छ़पनेरी ठार
“ज़ैखन तेरो परमेशर यहोवा तैन कौमन नाश केरे ज़ैन केरो मुल्ख तै तीं देते, ते तू तैन केरे मुल्खेरो अधिकारी भोइतां तैन केरे नगरन ते घरन मां राने लग्गस, तैखन अपने मुल्खेरे दरमियाने मां ज़ेसेरो अधिकारी तेरो परमेशर यहोवा तीं केरते ट्लाई नगरन अपने लेई अलग केरां। ते तू अपने लेई बत भी तियार केरां1, ते अपने मुल्खेरे ट्लाई हिस्से केरां, ज़ै तेरो परमेशर यहोवा तीं देते, ताके हर अक खूनी तैड़ी जो नश्शे। ते ज़ै खूनी तैड़ी जो नेशतां अपनि जान बच़ाए, तै एन्च़रां भोए; मतलब तै कोन्ची सेइं बगैर पेइले बैर रख्खे या तै बगैर ज़ैनी बुझ़तां मैरी छ़डोरो भोए। ज़ेन्च़रे कोई कोन्ची सेइं साथी कैड़ु कटने जंगले मां गाए, ते बुट कटनेरे लेई मैक्कु खड़ो केरे, ते मैक्कु डण्डे मरां छुटतां तैस ढ्लाए एन्च़रे बज़्ज़े कि तै मेरि गाए त तै तैन नगरन मरां कोन्ची मां नेशतां ज़ींतो राए; एरू न भोए कि दूर बत्तरे वजाई सेइं खूनेरो बदलो नेनेबालो अपने बड़े सरकी सेइं तैसेरो पीछो केरतां तैस ट्लाए, ते तैस मारे, हालांकि तै मौतरी सज़ाहरे काबल नईं, किजोकि तै तैस सेइं बैर न थियो रखतो। एल्हेरेलेइ अवं तीं ई हुक्म देताईं, कि अपने लेई ट्लाई नगर अलग केरतां रेखां।
“अगर तेरो परमेशर यहोवा तैस कसमरे मुताबिक ज़ै तैनी तेरे सियानन सेइं खेवरी थी, तेरी हद बेद्धतां तै सारो मुल्ख तीं दे, ज़ेसेरे देनेरो वाधो तैनी तेरे सियानन कियोरो थियो अगर तू इन सब हुक्मन मन्ने मां एतिहात केरस, ज़ैना अवं अज़ तीं शुनाताईं, ते अपने परमेशर यहोवा सेइं प्यार केरस ते हमेशा तैसेरे बत्तन पुड़ च़लतो रास त इन ट्लाई नगरन करां जादे होरां भी ट्लाई नगर अलग केरां, एल्हेरेलेइ कि तेरे तैस मुल्खे मां ज़ै तेरो परमेशर यहोवा तेरो अपनो हिस्सो केरतां देते, कोन्ची बेकसूरेरो खून न बगाव गाए, ते तैसेरो दोष तीं पुड़ न लग्गे।
“पन अगर कोई कोन्ची सेइं बैर रेखतां तैसेरे मारनेरे लेई बिश्शे, ते तैस पुड़ हमलो केरतां तैस एरी बाहे कि तै मेरि गाए, ते फिरी तैन नगरन मरां कोन्ची मां नेश्शी गाए, त तैसेरे नगरेरे बुज़ुर्गन मरां कोन्ची भेज़तां तैस तैट्ठां कुजेइतां खूनेरो बदलो घिन्ने बालेरे हथ्थे मां दे, कि तै मारो गाए। तैस पुड़ तरस नईं केरनो, पन बेकसूरेरे खूनेरो दोष इस्राएले करां दूर केरनो, ज़ैस सेइं तुश्शू भलू भोए।
हद्दरो निशान
“ज़ै मुल्ख तेरो परमेशर यहोवा तीं देते, तैसेरो ज़ै हिस्सो तीं मैल्हेलो, तैस मां केन्चेरी हद ज़ै सियाने बुज़ुर्ग लोकेईं नन्द लेवरी थी तैस न पुटथ।
गवाहां केरे बारे मां नियम
“कोन्ची मैन्हेरे खलाफ कोन्ची किसमेरे अधर्मे या पापेरे बारे मां, चाहे तैसेरो पाप केरहो की न भोए, एक्की मैन्हेरी गवाही न शुनथ, पन दूई या ट्लाई गवैही ज़ोने सेइं गल पक्की साबत भोतीए। कोई झूठी गवाही देनेबालो केन्चेरे खलाफ यहोवा करां दूर गानेरी गवाही देने जो खड़ो भोए, त तैना दूईये मैन्हु, ज़ैन मां एरहो मुकदमो च़लोरो भोए, यहोवारे सामने मतलब तैन दिहाड़ां केरे याजकन ते न्याय केरनेबालां केरे सामने खड़े किये गान; तैखन न्याय केरनेबाले रोड़ेच़ारे पुछ़-गन केरन, ते अगर ई पतो लग्गे कि तै झूठी गवाही आहे, ते तैनी अपने ढ्लाएरे खलाफ झूठी गवाही दित्तोरीए त अपने ढ्लां केरो ज़ेरो भी नुकसान करानेरी योजना तैनी कियोरी भोए तेरहु तुस भी तैस सेइं केरथ; एन्च़रे सेइं अपने दरमियाने मरां एरी बुराई दूर केरथ। तैखन होरे लोक शुन्तां डरेले, ते अग्रोवं जो तेरे दरमियाने मां फिरी एरू बुरू कम न केरेले। ते तू बिलकुल तरस न खेइयां; जानां केरे बदले जान, अछ़रे बदले अछ़, दंतेरे बदले दंत, हथ्थेरे बदले हथ, पव्वेरे बदले पव्वेरी सज़ाह देनी।
Source notes (1)
- Footnote बत भी तियार केरां तैड़ी गानेरे लेई केत्रू दूरे नापनू
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.