Bhadrawahi Bible
दानिय्येल 1
दानिय्येल ते तैसेरे दोस्त परमेशरेरे हुक्म मनतन
यहूदा प्रदेशेरे राज़े यहोयाकीमेरे राज़ केरनेरे ट्लेइयोवं साले मां बाबेल मुल्खेरे राज़े नबूकदनेस्सरे यरूशलेम नगरे पुड़ चढ़ाई केरतां तैस घेरो दित्तो। तैखन परमेशरे यहूदा प्रदेशेरो राज़ो यहोयाकीम परमेशरे भवनेरां काही भांडन समेत नबूकदनेस्सरे हथ्थे मां कियो; ते तैनी तैना भांडां शिनार1 मुल्खे मां अपने देबतेरे मन्दरे मां नेइतां, अपने देबतेरे भण्डारे मां रेखी दित्तां।2 तैखन नबूकदनेस्सर राज़े अपने खोजां केरे प्रधान अश्पनजे हुक्म दित्तो कि इस्राएली राज़ घरानेरे मट्ठन मरां किछ जुवानन इरां आन। तैना जुवान बगैर नुक्से, खूबसूरत ते हर किसमेरी अक्ल बुद्धी मां खूब माहिर ते ज्ञाने सेइं भेरतां ते विद्वान ते शाही मेहले मां हज़ार भोने काबल भोन; ते तैन कसदी केरे शास्त्र ते भाषारी शिक्षा दित्ती गाए। ते राज़े तैन हुक्म दित्तो कि तैसेरे रोट्टी ते पीनेरे लेई दाछ़रे रस्से मरां तैन रोज़ खाने पीनेरे लेई दित्तू गाए। एन्च़रे सेइं ट्लाई सालन तगर तैन केरू पालन पोशन भोतू राए; फिरी तैसेरां बाद तैना राज़े कां हाज़र किये गान। तैन मां किछ यहूदारे खानदाने मरां च़ुनोरे, दानिय्येल, हनन्याह, मीशाएल ते अजर्याह नंव्वेरे यहूदी थिये।
ते खोजां केरे प्रधाने तैन केरां नंव्वां बेदलतां होरां रखां; दानिय्येलेरू नवं तैनी बेलतशस्सर रख्खू, ते हनन्याहेरू नवं तैनी शद्रक रख्खू, मीशाएलेरू नवं मेशक रख्खू, ते अजर्याहेरू नवं तैनी अबेदनगो रख्खू। पन दानिय्येले अपने मने मां पक्को इरादो कियो कि अवं राज़ेरी रोट्टी खेइतां ते दाछ़रो रस पीतां अपने आपे अशुद्ध न भोने देलो। एल्हेरेलेइ तैनी खोजां केरे प्रधाने कां बिनती की, कि मीं अशुद्ध न भोने दे। परमेशरे खोजां केरे प्रधानेरे मने मां दानिय्येलेरे लेई कृपा ते दया भेरि दित्ती। ते खोजां केरे प्रधाने दानिय्येले सेइं ज़ोवं, “अवं अपने मालिक राज़े करां डरताईं, किजोकि तुसेईं कुन खानू पीनू आहे तैन्ने ठहरावरूए, कोन्च एरू न भोए कि तै तेरू तुत्तर तेरे साथी जुवानन करां ट्लकोरू ते उदास लाहे ते एस हालती मां राज़ो तुश्शी वजाई सेइं मेरी क्रोड़ी केटतां छ़डे।” तैखन ज़ै निगरान खोजां केरे प्रधाने दानिय्येल, हनन्याह, मीशाएल ते अजर्याह पुड़ हेरगेश केरनेरे लेई च़ुनोरो थियो, दानिय्येले तैस सेइं ज़ोवं, “अवं तीं कां बिनती केरताईं, असन अपने दासन दश दिहाड़न तगर परख, इश्शे खानेरे लेई शाग-सब्ज़ी ते पीनेरे लेई सिर्फ पानी दित्तू गाए। फिरी दश दिहाड़ना बाद इश्शू तुत्तर हेरां ते ज़ैना जुवान राज़ेरी ठहरावरी रोट्टी खातन तैन केरू भी तुत्तर हेरां; ते तैसेरां बाद ज़ैन तीं लेइहोलू तैसेरे मुताबिक तू असन अपने दासन सेइं सलूख केरां।” तैन केरि तै बिनती तैनी निगराने मन्ज़ूर की, ते दश दिहाड़न तगर तै तैन परखतो राव। दश दिहाड़ना बाद तैन केरू तुत्तर राज़ेरी रोट्टी खाने बालन जुवानन करां जादे रोड़ू ते सहतमन्द लेइहोने लगू। तैखन तै निगरान तैन केरे लेई ठहरावरी रोट्टी ते तैन केरे पीनेरे लेई दाछ़रो रस दूईयने बन्द केरतां, तैन शाग-सब्ज़ी देने लगो।
ते परमेशरे तैन च़ेवरे जुवानन सब शास्त्र ते हर किसमेरे विद्या मां अक्लमन्दी मां महारत दित्ती; ते दानिय्येल हर किसमेरे दर्शन ते सुपनेरो मतलबेरो ज्ञानी भोइ जेव।3 तैखन ज़ेत्रे दिहैड़ी केरे बाद नबूकदनेस्सर राज़े जुवानन अन्तर एजनेरो हुक्म दित्तोरो थियो, तेत्रे दिहाड़े बीतने पुड़ खोजां केरे प्रधाने तैना राज़े कां पेश किये। ते राज़ो तैन सेइं गलबात केरने लगो; ते दानिय्येल, हनन्याह, मीशाएल ते अजर्याहेरे बराबर तैन जुवानन मरां कोई न भोव; एल्हेरेलेइ तैना च़ेवरे राज़ेरे मेहले मां सेवा केरने लगे। ते अक्ल ते हर किसमेरी समझ़रे बारे मां ज़ैन किछ राज़ो तैन पुछ़तो थियो, तैना तैस पूरे रियासती मां ज़ेत्रे जोष्टी ते तांत्री थिये तैन सेभन करां दश दर्जे गुणा काबल निस्से। ते दानिय्येल कुस्रू राज़ेरे राज़ केरनेरे पेइले साले तगर तैड़ी राज़े कां सेवा केरतो राव।
Source notes (3)
- Footnote शिनार बाबेल मुल्खेरो होरू नवं, उत. 11:2
- Cross-reference 2 इति. 36:7.
- Cross-reference याक. 1:5,17.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.