Bhadrawahi Bible
प्रेरितां केरां कम्मां 13
बरनबास ते शाऊल भेज़ने
अन्ताकिया नगरेरे कलीसियाई मां काई नबी ते उपदेशक थिये, मतलब बरनबास, शमौन ज़ैस जो नीगर भी ज़ोतन, लूकियुस कुरेनी, ते मनाहेम ज़ै मुल्खेरे च़ेवरोवं हिस्से पुड़ हाकिम थियो ज़ै हेरोदेसेरो दुद्ध ढ्ला थियो, ते शाऊल थियो। ज़ैखन तैना बरत रेखतां प्रभुएरी आराधना केरने लग्गोरो थिये, त पवित्र आत्मा तैन सेइं ज़ोवं, “ज़ैस सेवारे लेई बरनबास ते शाऊल मीं कुजेवरेन, तैसेरेलेइ तैन अलग केरा।” तैखन तैनेईं बरत रेखतां प्राथना की, ते तैन पुड़ हथ रेखतां तैना परमेशरेरे कम्मेरे लेई भेज़े।
पौलुसेरू प्रचारेरू पेइलू सफर
शाऊल ते बरनबास पवित्र आत्मारी तरफां भेज़ोरे सिलूकिया नगरे जो जे, ते तैट्ठां तैना ज़िहाज़े पुड़ च़ेढ़तां साइप्रस टैपू जो च़ले। ज़ैखन तैना सलमीसे मां पुज़्ज़े, त तैड़ी तैना यहूदी केरे प्राथना घरे मां परमेशरेरू वचन शुनाव, ते यूहन्ना मरकुस भी तैन केरि मद्दत केरनेरे लेई तैड़ी थियो। ज़ैखन तैनेईं सारे जज़ीरे ते नगरन-नगरन मां हंठु फिरू, त तैना पाफुसे नगरे मां पुज़्ज़े, त तैन केरि मुलाकात एक्की डैइंनोड़े यहूदी ते झूठे नेबी सेइं भोइ, ज़ेसेरू नवं बार-यीशु थियूं। तै तैट्ठेरे हाकिम सिरगियुस, पौलुस सेइं साथी थियो, ज़ै अक अक्लमन्द मैन्हु थियो, ते तैनी बरनबास ते शाऊल कुजाए ते परमेशरेरू वचन शुन्नू चाऊ। पन एलीमास डैइंनोड़ो (किजोकि तैसेरे नंव्वेरो मतलब डैइंनोड़ो आहे) तैन केरि खलाफत केरने लगो, तैने हाकिम यीशु पुड़ विश्वास केरने करां रोकनो चाव। तैखन शाऊल ज़ेसेरू नवं पौलुस भी आहे, पवित्र आत्माई सेइं भेरोइतां ध्याने सेइं एलीमास डैइंनोड़े पासे तकने लगो, ते तैस सेइं ज़ोवं, “हे शैतानेरे कोआ, तू हर किसमेरी पाखंडे सेइं ते च़लैकी सेइं भेरतस, ते नेकरो दुश्मन, कुन तू परमेशरेरी बत बगाड़ने करां बाज़ न एजस? हुनी प्रभु तेरे खलाफे, तू कानो भोइ गानोस, ते किछ च़िरे तगर तू दिहाड़ो न लाहेलो।” तैखने तैस आंधरू लेइहोने लगू, ते तै इरां-उरां तोपने लगो, ताके कोई तैस हथ्थेरां ट्लेइतां च़लाए। तैखन हाकिमे एन हेरतां, ते प्रभुएरी शिक्षा शुन्तां हैरान राव, ते प्रभु यीशु पुड़ विश्वास कमाव।
पिसिदियारे अन्ताकिया नगरे मां
पौलुस ते तैसेरो साथी पाफुस नगरेरां ज़िहाज़े मां पंफूलिया इलाकेरे पिरगा नगरे मां आए, ते यूहन्ना तैन शैरतां वापस यरूशलेम नगरे जो च़लो जेव। ते तैना पिरगा नगरेरां निस्तां पिसिदिया इलाकेरे अन्ताकिया नगरे मां पुज़े ज़ै गलातिया इलाके मां आए। ते आरामेरे दिहाड़े प्राथना घरे मां गेइतां बिश्शी जे। मूसेरो कानून ते नेबी केरि किताबी मां पढ़नेरे बाद तैट्ठेरे प्राथना घरेरे प्रधाने तैन ज़ोवं, “हे ढ्लाव अगर मैन्हु केरि भलैइयरे लेई तुस भी किछ ज़ोनू चातथ त ज़ोथ।” तैखन पौलुस खड़ो उठो ते हथ्थे सेइं इशारो केरो कि च़ुप रान ते ज़ोने लगो, “हे इस्राएली लोकव ते परमेशरेरो डर मन्नेबाले गैर कौमां केरे लोकव मेरी गल शुना। इन इस्राएली लोकां केरे परमेशरे इश्शे दादे-पड़दादे च़ुने, ज़ैखन तैना मिस्र मुल्खे मां परदेशी भोइतां रहते थिये, तैन परमेशरे तरक्की दित्ती, ते बड़े शेक्ति सेइं तैट्ठां कढे। ते तै सुनसान ठैरी मां लगभग 40 सालन तगर तैन केरि झ़ैलतो राव, तैना बार-बार हुक्म ट्लोड़ते राए। कनान मुल्खे मां परमेशरे सत कौमां नाश केरतां तैन केरि ज़मीन अपने इस्राएली लोकन विरासती मां दित्ती। एना गल्लां पूरी भोने लगभग 450 साल लगे, तैसेरां बाद परमेशरे तैन केरे लेई शमूएल नेबेरे वक्ते तगर हाकिम रख्खे। ज़ैखन हेजू शमूएल तैन केरो हाकिम थियो त तैन लोकेईं राज़ो बनानेरे लेई दरखुवास की, ते परमेशरे बिन्यामीनेरे गोत्रे मरां कीशेरू मट्ठू शाऊल राज़ो बनावं ते तैनी 40 साल यरूशलेम नगरे मां राज़ कियूं। फिरी तैनी शाऊल हटेइतां दाऊद तैसेरी ठैरी तैन केरो राज़ो बनाव, ज़ेसेरे बारे मां तैनी गवाही दित्ती, मीं यिशैरू मट्ठू दाऊद मेरे मनेरे मुताबिक मैल्होरूए, तैस पुड़ अवं खुशी आईं, ते तैए मेरी मर्ज़ी पूरी केरेलो। परमेशरे अपने वाधेरे मुताबिक तैसेरे वंशेरे मरां पापन करां मुक्ति देनेरे लेई इस्राएले कां यीशु मसीह भेज़ो। ज़ेसेरे एजने करां पेइले यूहन्ना इस्राएलेरे सारे लोकन प्रचार कियो, कि पापन करां मन फिराथ ते बपतिस्मो नेथ।” ज़ैखन यूहन्नारू कम पूरू भोनेबालू थियूं, त तैनी ज़ोवं, “तुस मीं कुन समझ़तथ? ‘अवं मसीह नईं! बल्के हेरा, तै मेरे बाद एजनेबालोए, किजोकि अवं त एस काबल नईं कि तैसेरे बूटां केरे तसमे भी खोल्ली सेखी।’
“हे मेरे ढ्लाव, तुस ज़ैना अब्राहमेरे औलादरे लोकव, ते परमेशरेरो डर मन्नेबाले गैर कौमां केरे लोकव, इस मुक्तरो बिस्तार तुसन कां भेज़ोरोए। यरूशलेम नगरेरे रानेबाले लोकेईं ते तैन केरे प्रधानेईं यीशु मसीह न पिशानो, ते न नेबी केरि गल्लां सेमझ़ी, ज़ैना हर आरामेरे दिहाड़े पेढ़तां शुनेई गैती थी। हालांकी तैन मौतरी सज़ाहरे काबल सबूत न मैल्हू, पन फिरी भी तैनेईं पिलातुस गवर्नरे कां दरखुवास की, कि ऐह मारो गाए। ते तैनेईं सब किछ ज़ैन तैसेरे बारे मां पवित्रशास्त्रे मां लिखोरू थियूं, पूरू कियूं, त तै क्रूसे पुड़ कील देइतां मारो, ते ओसैलतां एक्की कब्री मां छ़डो। पन परमेशरे तै मुड़दन मरां भी ज़ींतो कियो। ते ज़ैना लोक गलील इलाके मरां तैस सेइं साथी यरूशलेम नगरे मां एवरे थिये, तैन चेलन काई दिहाड़न तगर यीशु लेइयोतो राव, ते हुनी तैना लोक ज़ैनेईं तै लाहोरोए गवाही देतन। असां तुसन खुशखबरी शुनातम, कि ज़ै वाधो परमेशरे इश्शे दादे-पड़दादन सेइं कियोरो थियो। कि परमेशरे यीशु मसीह मुड़दन मरां ज़ींतो केरतां तै वाधो पूरो कियो, ते भजना केरि किताबी मां परमेशर मसीहेरे बारे मां ज़ोते,
‘तू मेरू मट्ठूस ते अवं तेरो बाजी भोव।
एन सच़्च़े, कि परमेशरे तै मुड़दन मरां भी ज़ींतो कियो,
ताके तै न शड़े, परमेशरे वचने मां एन्ने बियान कियोरूए,
कि अवं तीं पवित्र ते सच़्च़ी बरकत देलो, ज़ैन केरो वाधो परमेशरे दाऊदे सेइं कियोरो थियो।’
ते होरि भजने मां दाऊद ज़ोते,
‘तू अपने पवित्र मैन्हु शड़ने न देलो।’
“किजोकि दाऊद त अपने वक्ते मां परमेशरेरी मर्ज़ी पूरी केरनेरां पत्ती मेरि जेव, ते अपने दादन-पड़दादन सेइं साथी दफन भोव, ते तैसेरी जान शेड़ि जेई। पन ज़ै (यीशु मसीह) परमेशरे मुड़दन मरां ज़ींतो कियो, त तैसेरे शड़नेरी नौबत न आई।
“एल्हेरेलेइ, हे ढ्लाव, तुस समझ़ा कि यीशुएरे ज़िरिये सेइं तुसन पापां केरि मैफरी खबर शुनाई गाचे। तुस मूसा नेबेरे कानूने मुताबिक धर्मी न थिये भोने, पन ज़ै कोई यीशु पुड़ विश्वास केरे तै धर्मी भोए।
“एल्हेरेलेइ खबरदार राथ, कोस्कोई एरू न भोए कि नेबी केरि ऐह गल तुसन पुड़ सच़्च़े बीते,
‘तुस ज़ैना होरि केरि तुहीन केरतथ, हेरा, ते हैरान भोथ, ते बरबाद भोथ,
किजोकि अवं तुश्शे ज़ींते ज़ागते एरू कम केरनेबालोईं,
कि अगर कोई तुसन सेइं तैसेरे बारे मां गलबात भी केरे, त तुस कधे विश्वास न केरेले।’”
ज़ैखन पौलुस ते बरनबास प्राथना घरे मरां च़ले, त लोक तैन कां मिन्नत केरतां ज़ोने लगे, कि होरि आरामेरी दिहाड़ी भी एन्ने गल्लां केरे बारे मां ज़ोवं गाए। ज़ैखन लोक आराधनारे बाद बेइर निस्से, त बड़े लोक पौलुस ते बरनबासे पत्ती च़ले, ते तैन मां किछ यहूदी थिये, ते किछ नंव्वे यहूदी पंथ धारण कियोरे थिये, ते तैनेईं तैन सेइं गलबात केरतां तैन समझ़ाव, कि परमेशरेरे अनुग्रहे मां बनोरे राथ।
पौलुसेरे ज़िरिये गैर कौमन मां यीशु मसीहेरे प्रचारेरी शुरुआत
होरि आरामेरे दिहाड़े लगभग सारू नगर परमेशरेरू वचन शुन्नेरे लेई अकोट्ठू भोवं। ज़ैखन यहूदी लीडरेईं एत्रे हछे लोक लाहे त तैन जलन भोइ, ते पौलुसेरे खलाफ गल्लां लग्गे केरने। तैखन पौलुस ते बरनबासे दिलेर भोइतां तैन ज़ोवं, “ज़रूरी एन थियूं, कि असां पेइले तुसन परमेशरेरू वचन शुनाम, पन तुस त इन्कार केरने लगोरेथ, ते अपनो आप हमेशारी ज़िन्दगरे काबल न सेमझ़थ, त हेरा हुनी असां गैर कौमां केरे पासे गातम। किजोकि प्रभुए असन ई हुक्म दित्तोरोए,
‘मीं तू मीं तू गैर कौमां केरे लेई लौ बनोरोस,
ताके तुश्शे ज़िरिये सारे ज़मीनी पुड़ मुक्ति आनी गाए, ते तू ज़मीनरे हर पासे मुक्तरू दार भोस।’”
इन शुन्तां गैर कौमां केरे लोक बड़े खुशी भोए, ते परमेशरेरी तारीफ़ केरने लगे, ते ज़ैना परमेशरे हमेशारी ज़िन्दगरे लेई ठहरावरे थिये, तैनेईं विश्वास कियो। ते प्रभुएरू वचन सारे मुल्खे मां फैली जेवं। पन यहूदी लीडरेईं बड़े भक्त ते इज़्ज़तदार कुआन्शां ते नगरेरे काई खास मैन्हु भड़काए, तैनेईं पौलुस ते बरनबास सितेइतां तैना तैस इलाके मरां भी केढी छ़डे। तैखन पौलुस ते बरनबासे तैन केरे सामने अपने पव्वां केरि धूड़ ठुड़कतां1 इकुनियुम नगरे जो च़ले जे। ते चेले इकुनियुम नगरे मां खुशी ते पवित्र आत्माई सेइं भरपूर भोते राए।
Source notes (1)
- Footnote धूड़ ठुड़कतां: इन हिरानेरे लेई कि परमेशरे तैन लोकां केरो इन्कार कियोरोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.