Bhadrawahi Bible
प्रेरितां केरां कम्मां 10
कुरनेलियुस पतरसे कुजाते
कैसरिया नगरे मां अक मैन्हु थियो, तैसेरू नवं कुरनेलियुस थियूं, ते तै अक इतालियानी फौजरो सूबेदार थियो। कुरनेलियुस त तैसेरे घरे सारे लोक परमेशरे करां डरने बाले थिये, कुरनेलियुस यहूदी लोकन बड़ू दान देतो थियो, ते परमेशरे कां लगातार प्राथना केरतो रहतो थियो। एक्की दिहाड़े कुरनेलियुस दीसां अक रोड़े च़ारे दर्शन हेरू, परमेशरेरो अक स्वर्गदूत तैस कां अव, ते ज़ोने लगो, “हे कुरनेलियुस।” तैनी तै रोड़े-च़ारे लाव ते डेरतां ज़ोवं, “हे प्रभु कुने?” तैनी तैस सेइं ज़ोवं, “तेरी प्राथना ते तेरू दान यादगैरेयर लेई परमेशरे कां पुज़ोरूए। हुनी तू मैन्हु याफा नगरे मां भेज़तां तैस मैन्हु ज़ेसेरू नवं शमौन पतरसे अपने घरे कुजा। तै शमौनेरे घरे बिशोरो थियो, ज़ै चमड़ेरू कम केरनेबालो थियो, ज़ेसेरू घर समुद्रेरे बन्ने।” ज़ैखन स्वर्गदूत एना गल्लां केरतां च़लो जेव, त कुरनेलियुस अपने दूई सेवकन ते अपने सिपेहिन मरां अक भक्त सिपाही कुजव। ते तैन सारो बिस्तार ज़ोइतां याफा नगरे जो भेज़े, कि पतरसे कुजान।
पतरसेरू दर्शन
होरसां ज़ैखन तैना भेज़ोरे लोक च़लते-च़लते नगरेरे नेड़े पुज़्ज़े। तै दुपहरां केरो वक्त थियो, तैस वक्ते पतरस बा छती पुड़ प्राथना केरने लावरो थियो। तैस ढ्लुख लग्गी ते तै किछ खानू चातो थियो, पन ज़ैखन मैन्हु रोट्टी बनाने लगे त तैस बेहोशी ज़ेरि भोइजेइ। ते तैनी हेरू कि अम्बर खुल्लूए, ते अक च़ादर लाही ज़ै च़ेवरे कून्नां टेंगोरी अम्बरेरे पासेरां उन्ढी ज़मीनरे पासे एवरी। ज़ैस मां ज़मीनरे सारे जानबर ते पेटेरे भारे च़लनेबाले जन्तू ते अम्बरेरां च़ुड़ोलू थियां। तैखन अक आवाज़ आई, “हे पतरस, उठ ते मार ते खा।” पन पतरसे जुवाब दित्तो, “नईं प्रभु, कधे नईं, किजोकि मीं अज़ तगर कोई अपवित्र ते भिट्टी चीज़ नईं खेवरी।” फिरी दूइयोवं बार तैनी आवाज़ शुनी, “ज़ैन किछ परमेशरे शुद्ध कियोरूए, तू तैस जो भिटू न ज़ो।” ट्लेइ बार ऐह आवाज़ आई, ते फिरी तै च़ादर अम्बरेरे पासे च़ली जेई।
पतरस दिले मां सोचने लग्गोरो थियो, कि एस दर्शनेरो कुन मतलब भोइ सकते, ज़ैन अज़ मीं लाव, एत्रे मां कुरनेलियुसेरे भेज़ोरे मैन्हु शमौनेरू घर तोपते-तोपते दारे मां पुज़्ज़े। तैनेईं हक देइतां पुछ़ू, “शमौन ज़ैस जो पतरस ज़ोतन इड़ी तुश्शे कांए?” हेजू पतरस दर्शनेरे बारे मां सोचने लग्गोरो थियो, त पवित्र आत्मा तैस जो ज़ोवं, “शमौन, हेर ट्लाई मैन्हु तीं पुछ़ने लगोरेन। खड़ो उठ ते बुन गा, तैन सेइं साथी गाने करां न डेरां, किजोकि तैना मीं भेज़ोरेन।” पतरस बुन अव, ते तैन मैन्हन सेइं ज़ोने लगो, “ज़ैस मैन्हु तुस तोपने लगोरेथ तै अवं आईं, ते तुस किजो एवरेथ?” तैनेईं जुवाब दित्तो, “असां कुरनेलियुस सूबेदारे ज़ै धर्मी ते परमेशरे करां डरने बालोए, ते सारे यहूदी तैसेरी तारीफ़ केरतन, एक्के पवित्र स्वर्गदूते तैस जो ज़ोवरूए, तू शमौन पतरसे अपने घरे कुजेइतां तैसेरी गल्लां शुन।” तैखन पतरसे तैना अन्तर कुजाए, ते तैन केरि खातरदारी की। होरसां पतरस तैन सेइं साथी च़लो जेव, ते याफा नगरेरे काई ढ्लान मरां किछ तैस सेइं साथी च़ले जे।
कुरनेलियुसेरे घरे मां पतरस
एग्री दिहाड़े तैना कैसरिया नगरे मां पुज़्ज़े, कुरनेलियुस अपने रिश्तेदारन ते अपने दोस्तन अकोट्ठे केरतां तैन बलगने लाव। पतरस ज़ैखन कुरनेलियुसेरे घरे पुज़्ज़ो, त कुरनेलियुसे तैसेरी बड़ी आदर खातरी सेइं इज़्ज़त की, ते क्रोड़ी पव्वन कां रेखतां तैस कां मथ्थो टेको। पन पतरसे तै खड़ो कियो ते ज़ोवं, “खड़ो भो किजोकि अवं भी त अक मैन्हु आईं।” फिरी तै कुरनेलियुसे सेइं गल्लां केरतो अन्तर जेव, तैड़ी बड़े लोक अकोट्ठे बिश्शोरे लेहितां, तैस सेइं ज़ोवं, “तुसन पत्तोए इश्शे यहूदी केरे लेई गैर कौमी सेइं मिलनू जुलनु कानूनेरे खलाफे, पन परमेशरे मीं सेइं ज़ोवरूए कि अवं केन्ची मैन्हु जो अपवित्र या भिट्टो ज़ोईं। एल्हेरेलेइ तुसेईं अवं कुजव त अवं च़ुपच़ारे च़लो अव। हुनी अवं तुसन पुछ़ताई कि तुसेईं अवं किजो कुजेवरोईं?”
कुरनेलियुसे ज़ोवं, “अवं च़ेवरे दिहाड़ना पेइले अपने घरे मां इस मौके कोई ट्लेइ बज़ेइं प्राथना लगोरो थियो केरने, त अचानक अक मैन्हु चमकतां लिगड़ां लग्गोरो मेरे तुत्तरे अगर खड़ो भोव। ते ज़ोने लगो, हे कुरनेलियुस, तेरी प्राथना परमेशरे शुनोरीए ते तेरू दान भी कबूल कियोरूए। एल्हेरेलेइ कोन्ची याफा नगरे मां भेज़तां शमौन ज़ैस जो पतरस ज़ोतन, कुजा। तै शमौनेरे कांए ज़ै चमड़ेरू कम केरनेबालो, ते समुद्रेरे बन्ने रहते। (ज़ैखन तै एज्जेलो त तै परमेशरे बारे मां ज़ोलो) तैखन मीं मैन्हु भेज़े, ते तीं बड़ू रोड़ू कियूं कि तू अव। हुनी अस परमेशरेरे सामनेम, ताके ज़ैन किछ परमेशरे ज़ोवरू तैन शुनम।”
पतरसेरी शिक्षा
तैखन पतरस ज़ोने लगो, हुनी मीं याकीन भोव, कि परमेशर केन्चेरो तरफदार नईं। बल्के हर कौमी मरां ज़ै परमेशरे करां डरते ते रोड़ां कम्मां केरते परमेशर तैस कबूल केरते। इस्राएली लोकां केरे लेई परमेशरेरे भेज़ोरे सन्देशेरे बारे मां तुसन पतोए। परमेशरे यीशु मसीहेरे ज़िरिये सेइं ज़ै सेब्भी केरो प्रभुए शैन्तरी खुशखबरी शुनाई। यूहन्नारे बपतिस्मेरो प्रचार केरने करां लेइतां गलील इलाके करां शुरू भोइतां सारे यहूदिया इलाके मां कुन-कुन भोवं, तुस भी ज़ानतथ। केन्च़रे प्रभु यीशु नासरी पवित्र आत्माई सेइं ते शक्ति सेइं अभिषेक कियूं, ते तै लोकां केरू भलू केरतो राव, तैनी सब ज़ैना शैतानेरे ज़ाले मां फसोरे थिये, तैना छुटाए, किजोकि परमेशर तैस सेइं साथी थियो। तैनी ज़ैन किछ यहूदी केरे मुल्खे मां ते यरूशलेम नगरे मां कमाव, असां तैसेरे गवाह आम, ते तैए यहूदी लीडरेईं यरूशलेमे मां क्रूसे पुड़ टंगेइतां माराव। परमेशरे तैए ट्लेइयोवं दिहाड़े फिरी ज़ींतो केरतां हिराव।
गैर कौमन पुड़ पवित्र आत्मा उतरनी
तै सैरी लोकेईं नईं बल्के गवाहैई लाव, ज़ैना परमेशरे पेइले च़ुनतां रखोरे थिये, यानी असां ज़ैनेईं तैसेरे मुड़दन मरां ज़ींते भोनेरां बाद तैस सेइं साथी रोट्टी खेवरीए। ते तैनी असन हुक्म दित्तो कि लोकन मां प्रचार केरम ते गवाही देम, कि ई तैए ज़ै परमेशरे ज़ींते ते मोअरां केरो हाकिम भोए। सारे नबी तैसेरे बारे मां गवाही देतन, कि ज़ै कोई तैस पुड़ विश्वास केरेलो त तैस तैसेरे नंव्वे सेइं पापां केरि माफ़ी मैल्हे। पतरस हेजू एन ज़ोतो थियो, त पवित्र आत्मा तैन पुड़ उतरी, ज़ैना वचन शुन्ने लगोरे थिये। ते ज़ेत्रे यहूदी विश्वासी पतरसे सेइं साथी एवरे थी, तैना सब हैरान भोए कि गैर कौमन पुड़ भी पवित्र आत्मा उतरोरीए। किजोकि तैनेईं तैना किसमे-किसमेरी भाषां केरते, ते परमेशरेरी तारीफ़ केरते शुनोरे थिये, तैखन पतरसे ज़ोवं। “ज़ेन्च़रे परमेशरे असन पवित्र आत्मा दित्तोरीए तेन्च़रे तैन भी दित्तोरीए, कुन कोई एन मैन्हन पैनेरो बपतिस्मो नेने करां रोकी सकते?” एल्हेरेलेइ पतरसे हुक्म दित्तो, कि एन लोकन यीशु मसीहेरे नंव्वे सेइं बपतिस्मो देथ, तैखन तैनेईं पतरसे कां मिन्नत की, कि किछ दिहाड़े असन कां हेजू बिश।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.