Bhadrawahi Bible
2 शमूएल 6
पवित्र सन्दूख यरूशलेम नगरे मां पुज़व गानो
दाऊदे फिरी एक्की फेरे इस्राएले मरां 3000 सिपाही अकोट्ठे किये। तैखन दाऊद ते ज़ेत्रे सिपाही तैस सेइं साथी थिये, तैना सारे उठतां यहूदा प्रदेशेरे बाले नंव्वेरे ठारी जो जे, कि परमेशरेरो सन्दूख यरूशलेम नगरे मां आन्न। तैस सन्दूखे जो करूबन पुड़ बिशने बाले सेना केरे यहोवारो सन्दूख ज़ोते थिये। तैनेईं परमेशरेरो सन्दूख पहैड़ी पुड़ रानेबाले अबीनादाबेरे घरे मरां कढो ते एक्की नंव्वे दांतां केरि गेड्डी पुड़ च़ाढ़ो; ते अबीनादाबेरे उज्जा ते अह्यो नंव्वेरे दूई मट्ठां तैस च़लाने लग्गां। ते तैनेईं तै परमेशरेरे सन्दूखे समेत अबीनादाबेरे घरेरां बेइर कढो; ते अह्यो सन्दूखेरे अग्री-अग्री च़लो। दाऊद ते इस्राएली मड़द यहोवारे सामने सनोवर लेकड़रे बनोरे सब किसमेरे बाज़े ते सितार, सैन्गी, डफली, डमरू, झ़ेल्ली बज़ाते राए।
ज़ैखन तैना नाकोन नंव्वेरे खलाड़ी तगर पुज़्ज़े, तैखन दांतन ठोकर लग्गी ते उज्जा अपनो हथ परमेशरेरो सन्दूख ठमनेरे लेई अग्रोवं कियो। तैखन यहोवारो क्रोध उज्जा पुड़ भड़को; ते परमेशरे तैसेरे दोषेरे वजाई सेइं तै एस तरीके मारो, कि तै तैड़ी परमेशरेरे सन्दूखे कां मेरि जेव। पन दाऊदे बड़ी सरक अई, एल्हेरेलेइ कि यहोवा उज्जा मारोरो थियो; ते तैनी तैस ठारारू नवं पेरेसुज्जा रख्खू, ज़ैन अज़ तगरे। ते तैस दिहाड़े दाऊद यहोवा करां डेरतां ज़ोने लगो, “यहोवारो सन्दूख मीं कां केन्च़रे एज्जी सकते?” एल्हेरेलेइ दाऊदे यहोवारो सन्दूख दाऊदपुरे मां आन्नो न चाव; पन गत नगरेरे रानेबाले ओबेदेदोमेरे घरे पुज़व। यहोवारो सन्दूख गत नगरेरे रानेबाले ओबेदेदोमेरे घरे मां ट्लाई महीने राव; ते तैस दौरान यहोवा ओबेदेदोम ते तैसेरे सारे घराने बरकत दित्ती।
किछ वक्तेरां बाद लोकेईं दाऊद राज़े ई खबर दित्ती, कि यहोवा ओबेदेदोमेरे घराने पुड़, ते ज़ैन किछ तैसेरू आहे, तैस पुड़ भी परमेशरेरे सन्दूखेरे वजाई सेइं बरकत दित्तोरिए। तैखन दाऊदे गेइतां परमेशरेरो सन्दूख ओबेदेदोमेरे घरे मरां दाऊदपुरे मां खुशी सेइं पुज़व। ज़ैखन यहोवारो सन्दूख छ़ूनेबाले शा कदम अग्रोवं च़ले, तैखन दाऊदे अक दांत ते अक पालोरू बछ़ड़ू बलि कियूं। ते दाऊदे सनेरे कपड़ेरो एपोद लखे मां बेन्धतां यहोवारे सामने तने मने सेइं नच़तो राव। दाऊद ते इस्राएलेरे सारे कुलां केरे लोक यहोवारे सन्दूखे जयजयकार केरते ते नरशिंगो बज़ाते अग्रोवं च़ले।
ज़ैखन यहोवारो सन्दूख दाऊदपुरे मांजो आनोरो थियो, तैखन शाऊलेरी कुई मीकलां दैरी मरां दाऊद राज़ो यहोवारे सामने नच़तो ते छालां मारतो लाव, ते तैसां तै अपने दिले मां घटिया समझ़ो। ते लोकेईं यहोवारो सन्दूख अन्तर आनो, ते तैसेरे ठारी मां, मतलब तैस तेम्बु मां रख्खो, ज़ै दाऊदे तैसेरे लेई बनेवरो थियो; ते दाऊदे यहोवारे सामने होमबलि ते मेलबलि च़ाढ़ी। ज़ैखन दाऊदे होमबलि ते मेलबलि च़ाढ़ी, तैखन तैनी सेना केरे यहोवारे नंव्वे सेइं लोकन बरकत दित्ती। तैखन तैनी कौन्शन मड़दन सारे इस्राएली लोकन अक-अक रोट्टी, ते अक-अक टुक्ड़ो मास, ते किशमिशेरी अक-अक टिकी बेंटी दित्ती। तैखन सारे लोक अपने-अपने घरे जो च़ले जे।
तैखन दाऊद अपने घराने बरकत देनेरे लेई वापस अव ते शाऊलेरी कुई मीकल दाऊदे सेइं मिलनेरे लेई अई, ते ज़ोने लगी, “अज़ इस्राएलेरो राज़ो ज़ैखन अपनो आप अपने कम केरनेबालां केरि नौकरैनी केरे सामने एरहो नग्गो केरि राहोरो थियो, ज़ेरो कोई निकम्मो अपनो आप नग्गो केरि राहोरो थियो, तैखन कुन महान लेइहोतो थियो!”
दाऊदे मीकलां सेइं ज़ोवं, “यहोवा, ज़ैनी तेरे बाजी ते तैसेरे सारे घरानेरे बदले अवं च़ुनतां अपने इस्राएली लोकां केरो प्रधान बन्नेरे लेई च़ुनोरोईं, तैसेरे सामने अवं एरहो नच़्च़ो ते अवं यहोवारे सामने एन्च़रां सेइं नच़तो रेइलो। ते अवं एस करां भी जादे घटिया बनेलो, ते अपने नज़री मां भी घटिया भोइलो; ते ज़ैन नौकरानी केरि तीं गल की तैना भी मेरी इज़्ज़त केरेली।” एस वजाई सेइं शाऊलेरी कुई मीकल मरने तगर बेऔलाद राई।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.