Bhadrawahi Bible
2 शमूएल 4
ईशबोशेत मारो गानो
ज़ैखन शाऊलेरे मट्ठे ईशबोशेते शुनू, कि अब्नेर हेब्रोन नगरे मां मारो जेवरोए, तैखन तै बड़ो कमज़ोर भोइ जेव, ते सारे इस्राएली लोक भी घेमरोई जे। शाऊलेरे मट्ठे ईशबोशेतेरे दूई सिपाही थिये ज़ैना टोली केरे प्रधान थिये; एकेरू नवं बानाह, ते होरेरू नवं रेकाब थियूं, एना दूईये बेरोत नगरेरे रानेबाले ते बिन्यामीनी रिम्मोनेरां मट्ठां थियां, (किजोकि बेरोत भी बिन्यामीनेरे हिस्से मां गनु गातू थियूं) ते बेरोत नगरेरे लोक गित्तैम नगरे जो नश्शे, ते अज़्ज़ेरे दिहाड़े तगर तैड़ी परदेशी बेनतां रहतन।
शाऊलेरे मट्ठे योनातानेरू अक मट्ठू थियूं ज़ैन टोन्टू थियूं। ज़ैखन यिज्रेल नगरे मरां शाऊल ते योनातानेरी मौतरी खबर मैल्ही तैखन तैन पंच़ सालां केरू थियूं; तैस मौके तैसेरी देखभाल केरनेबाली कौन्श तैस छ़ुइतां नश्शी; ते तैसां जल्दी की एल्हेरेलेइ तैन बिछ़ड़तां दूईये ज़ंघन सेइं टोन्टू भोइ जेवं। तैस मट्ठेरू नवं मपीबोशेत थियूं।
एक्सां तैस बेरोत नगरेरे रिम्मोनेरू मट्ठू रेकाब ते बानाह बड़े धुप्पी मां ईशबोशेतेरे घरे मां आए ज़ैखन तैन दुपहरां केरे मौके बिछ़ाने पुड़ आराम केरि राहोरू थियूं। ते गेहुं नेनेरे बहानो केरतां घरे मां जेवं; ते तैसेरे पेटे मां बाई; तैखन रेकाब ते तैसेरो ढ्ला बानाह नेश्शी जे। ज़ैखन तैना घरे मां जेवरे थिये, ते तैन अपने कमरे मां खट्टी पुड़ झ़ुलोरू थियूं, तैखन तैनेईं तैन मारू, ते तैसेरी क्रोड़ी केट्टी छ़डी, ते तैसेरी क्रोड़ी नेइतां रातो-रात अराबारी बत्तां च़ेलि जे। तैना ईशबोशेतेरी क्रोड़ी हेब्रोन नगरे मां दाऊदे कां नेइतां ज़ोने लगे, “हेर, शाऊल ज़ै तेरो दुश्मन ते तीं मारनेरी कोशिश केरनेबालो थियो, ई क्रोड़ी तैसेरे मट्ठे ईशबोशेतेरीए; त अज़्ज़ेरे दिहाड़े यहोवा शाऊल ते तैसेरे खानदाने करां मेरे मालिक राज़ेरो बदलो नियोरोए।” दाऊदे बेरोत नगरेरे रिम्मोनेरां मट्ठन रेकाब ते तैसेरो ढ्ला बानाह ई जुवाब दित्तो, “यहोवा ज़ैनी अवं सैरी मुसीबतन करां छुटेवरोइं, तैसेरी कसमे, ज़ैखन केन्चे एन सेमझ़तां, कि मीं रोड़ी खबर आनोरीए, सिकलग नगरे मां मीं शाऊलेरे मरनेरी खबर शुनाई, तैखन मीं तैए ट्लेइतां माराव; मतलब तैस खबर शुनानेरे लेई ई बदलो मैल्हो। फिरी ज़ैखन दुष्टी मैन्हेइं अक बेकसूर मैन्हु तैसेरे घरे मां गेइतां बल्के तैसेरी खट्टी पुड़ मारो, त अवं पक्को तैसेरे खूनेरो बदलो तुसन करां घिन्नेलो, ते तुसन धेरती पुड़ेरां नष्ट केरि छ़डेलो।” तैखन दाऊदे सिपेहिन हुक्म दित्तो, ते तैनेईं तैना मैरतां तैन केरे हथ पव केटतां ते तैन केरि लाशां हेब्रोन नगरेरे तालाबे पुड़ टेंगी। तैखन ईशबोशेतेरी क्रोड़ी नेइतां हेब्रोन नगरे मां अब्नेरेरी कब्री मां देब्बी छ़डी।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.