Bhadrawahi Bible
2 शमूएल 23
दाऊदेरी आखरी गल्लां
दाऊदेरी आखरी गल्लां इना आन:
“यिशैरे मट्ठे दाऊदेरू ज़ोनू इन आहे, तैस मैन्हेरी गल्लां आन ज़ै उच्चे पुड़ खड़ो कियो जेव,
ते याकूबेरे परमेशरेरो अभिषिक्त,
ते इस्राएलेरो मिट्ठी आवाज़ी सेइं भजन ज़ोनेबालोए:
यहोवारे आत्मा मीं मां भोइतां ज़ोवं,
ते तैसेरू वचन मेरे ऐशी मां एवरूए।1
इस्राएलेरे परमेशरे ज़ोवरूए,
इस्राएलेरी चट्टानां मीं सेइं गल्लां कियोरिन,
कि मैन्हन मां हुकूमत केरनेबालो अक धर्मी भोल्हो,
ज़ै परमेशरेरो डर मन्तो हुकूमत केरेलो,
तै ज़ेन्च़रे झ़ेझ़री लौ भोल्हो ज़ैखन दिहाड़ो निसते,
एरी झ़ेझ़ ज़ैस मां बिदलार न भोए,
ज़ेन्च़रे झ़ेड़रे बाद साफ लौअरे वजाई सेइं नीलो-नीलो घास लगते।
कुन मेरो घरानो परमेशरेरी नज़री मां एरहो नईं?
तैनी त मीं सेइं हमेशारे लेई अक एरहो करार कियोरोए,
ज़ै सैरी गल्लन मां ठीक भोव ते अटल भी आहे।
किजोकि चाहे तै तैस बांदो न केरे,
फिरी भी मेरी पूरी मुक्ति ते पूरी उमीदां केरो विषय तैए आहे।
पन बुरे लोक सब कंटन बाले झ़ैल्लां
केरे ज़ेरेन ज़ैना हथ्थे सेइं न ट्लेइयोन;
पन ज़ै मैन्हु तैन ट्लानो चाए तैस कां लोंहेरो हथियार
ते भालो लोड़ते।
एल्हेरेलेइ तैना एपनी ठारी पुड़ अग्गी सेइं फुकतां भस्म किये गल्हे।”
दाऊदेरे बहादरां केरां नंव्वां
दाऊदेरे बहादरां केरां नंव्वां इना आन: तहकमोनेरो रानेबालो योशेब्यश्शेबेत, ज़ै प्रधान्न मां खास थियो; ते तैस जो एस्नी अदीनो भी ज़ोते थिये; ज़ैनी एक्की जंगी मां 800 सिपाही मारोरे थिये।
तैसेरे बाद अहोही दोदैरू मट्ठू एलीआजर थियूं। तै तैस वक्ते दाऊदे सेइं साथी ट्लेइ बहादरन मरां अक थियो, ज़ैखन कि तैनेईं जंगरे लेई अकोट्ठे भोवरे पलिश्तन जो ललकार दित्ती, ते इस्राएली मड़द च़ेलि जेवरे थिये। तै कमर केस्तां पलिश्तन तांतगर मारतो राव ज़ांतगर तैसेरो हथ थेकी न जेव, ते तैसेरी तलवार हथ्थे सेइं खेत्ती जेई; ते तैस दिहाड़े यहोवाए बड़ी ज़ींत कराई; ते ज़ैना सिपाही तैस पत्ती च़ले तैना सिर्फ मारोरे पलिश्ती सिपाही केरि चीज़ां लुटनेरे लेई तैस पत्ती च़ले।
तैसेरां बाद आगै नंव्वेरू अक हरारी एरू अक मट्ठू शम्मा थियूं। पलिश्तेईं अकोट्ठे भोइतां एक्की ठैरी टोली बनाई, ज़ैड़ी मस्सरां केरू अक ऊडार थियूं; ते इस्राएली सिपाही तैन करां डेरतां नश्शे। तैखन तैनी उडारे मां खड़े भोइतां तैन ऊडार बच़ाव, ते पलिश्ती मारे; ते यहोवाए बड़ी ज़ींत दुवाई।
फिरी ट्लीहे खास प्रधान्न मरां ट्लाई मैन्हु फसल कटनेरे दिहाड़न मां दाऊदे कां अदुल्लाम नंव्वेरी कुढी मां आए, ते पलिश्ती केरो जथो रपाईम नंव्वेरे वैदी मां डेरे लेइतां थियो। तैस वक्ते दाऊद क़िले मां थियो; ते तैस वक्ते पलिश्ती केरि सेनारी अक टोली बैतलहम नगरे मां थी। एक्सां दाऊदे बड़ी ट्लिश लग्गी ते तैने ज़ोवं, “कौन मीं बैतलहम नगरेरे फाटकेरे खुहेरू पानी पियालो?” तैना ट्लाईए शूरबीर पलिश्ती केरे डेरन पुड़ ट्लुटतां पे, ते बैतलहम नगरेरे फाटकेरे खुहे मरां पानी भेरतां दाऊदे कां आनू। पन तैनी पीने करां इन्कार कियो, ते यहोवारे सामने पीनेरू बलिदान केरतां डोलू, ते इन ज़ोवं, “हे यहोवा, मीं करां एरू कम दूर राए। कुन अवं तैन मैन्हु केरो खून पीं ज़ैना अपनि जान हथ्थे पुड़ रेखतां जेवरे थिये?” एल्हेरेलेइ तैनी तैन पानी पीने करां इन्कार कियो। एन ट्लाईए बहादरेईं त इन्ने कम कियूं।
अबीशै ज़ैन सरूयाहेरू मट्ठू ते योआबेरो ढ्ला थियो, ते तै ट्लेइने मां खास थियो। तैनी अपनो भालो च़लेइतां 300 सिपाही मारे, ते तै ट्लेइने मां मुशूर भोइ जेव। कुन तै ट्लेइने मां बड़ो मुशूर न थियो? ते एस्से वजाई सेइं तै तैन केरो प्रधान बनो; पन तैना ट्लेइयां केरे दर्जो पुड़ न पुज़्ज़े।
फिरी यहोयादारू मट्ठू बनायाह थियूं, ज़ैन कबसेल नगरेरे रानेबालो अक बड्डू कम केरनेबाले बहादरेरू मट्ठू थियूं; तैनी शेरेरे ज़ेरे दूई बहादर मोआबी मैन्हु मारे। शेजाई लगनेरे मौके तैनी एक्की गत्ते मां गेइतां अक शेर मारो। फिरी एक्की बार तैनी अक ताकतबर मिस्री मैन्हु मारो। मिस्री मैन्हेरे हथ्थे मां त भालो थियो; पन बनायाह अक सोटी घिन्तां तैस कां जेव, ते मिस्री मैन्हेरे हथ्थे मरां भालो थुसोड़तां तैस्से भाले सेइं तै मारो। एरां-एरां कम्मां केरतां यहोयादारू मट्ठू बनायाह तैन ट्लाईए बहादरन मां मुशूर भोइ जेव। तै 30 मां इज़्ज़तदार त थियो, पन तैन ट्लेइयां केरे दर्जो तगर न पुज़्ज़ो। तै दाऊदे अपने अंगरक्षकां केरो प्रधान बनाव।
फिरी 30 मां योआबेरो ढ्ला असाहेल; बैतलहम नगरेरे दोदोएरू मट्ठू एल्हनान, हेरोदी शम्मा, ते एलीका, पेलेती हेलेस, तकोई इक्केशेरू मट्ठू ईरा, अनातोती अबीएजेर, हूशाई मबुन्ने, अहोही सल्मोन, नतोपाही महरै, अक होरो नतोपाही बानाहरू मट्ठू हेलेब, बिन्यामीनी केरे गिबा नगरेरे रीबैरू मट्ठू इत्तै, पिरातोनी, बनायाह, गाशेरे नालन कां रानेबालो हिद्दै, अराबारो अबीअल्बोन, बहूरीमी अज्मावेत, शालबोनी एल्यहबा, याशेनेरे खानदाने मरां योनातान, हरारी शम्मा, हरारी शारारू मट्ठू अहीआम,
माका मुल्खेरे अहसबैरू मट्ठू एलीपेलेत, गीलोरे रानेबाले अहीतोपेलेरू मट्ठू एलीआम, कर्मेली, हेस्रो अराबी पारै सोबा नातानेरू मट्ठू यिगाल, गादी बानी, अम्मोनी सेलेक, बेरोती नहरै ज़ैन सरूयाहेरू मट्ठू योआबेरे हथियार च़लानेबालू थियूं, येतेरी ईरा, ते गारेब, ते हित्ती ऊरिय्याह थियो: सारे मिलतां 37 ताकतबर मैन्हु थिये।
Source notes (1)
- Cross-reference 2 पत. 1:21.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.