Bhadrawahi Bible
2 शमूएल 2
दाऊद हेब्रोन नगरे मां राज़ केरते
एसेरे बाद दाऊदे यहोवा पुछ़ू, “कुन अवं यहूदा प्रदेशेरे कोन्ची नगरे मां गेईं?” यहोवा तैस जुवाब दित्तो, “हाँ, गा।” दाऊदे फिरी पुछ़ू, “अवं कौस नगरे मां गेईं?” तैनी ज़ोवं, “हेब्रोन नगरे मां गा।” तैखन दाऊद यिज्रेली अहीनोअम, ते कर्मेली नाबालेरी विधवा ज़ेसेरू नवं अबीगैल थियूं, तैना एपनी दूईये कौन्शां साथी घिन्तां जेव। दाऊदे अपने साथी तैन केरे टब्बरन समेत तैड़ी निये; ते तैना हेब्रोन नगरेरे ड्लाव्वन मां राने लगे। ते यहूदी लोकेईं गेइतां, तैड़ी दाऊदेरू अभिषेक कियूं कि तैड़ी यहूदारे कुलेरो राज़ो बने। ज़ैखन दाऊदे ई खबर मैल्ही, कि ज़ैनेईं शाऊल दब्बो तैना गिलाद प्रदेशेरे याबेश नगरेरे लोकन। तैखन दाऊदे मैन्हु भेज़तां गिलादेरे याबेशेरे लोकन कां ई समाद भेज़ो, “यहोवारी बरकत तुसन पुड़ भोए, किजोकि तुसेईं अपने मालिक शाऊले पुड़ ई महरबानी केरतां तै दब्बो। एल्हेरेलेइ हुनी यहोवा तुसन पुड़ महरबानी केरतां सच़्च़ो बर्ताव केरे; तुसेईं इन भलू कम कियूं, एल्हेरेलेइ अवं भी तुसन सेइं भलियाई केरेलो। हुनी हिम्मत केरा, ते दिलेर बना; किजोकि तुश्शो राज़ो शाऊल मेरि जेवरोए, ते यहूदारे घराने मेरू अभिषेक केरतां अवं राज़ो बनेवरोइं।”
ईशबोशेत इस्राएलेरो राज़ो
पन नेरेरू मट्ठू अब्नेर ज़ै शाऊलेरो प्रधान सेनापति थियो, तैनी शाऊलेरू मट्ठू ईशबोशेत साथी नेइतां यरदन दरियाए पार गेइतां महनैम नगरे मां पुज़वं; ते तै गिलाद अशूरी लोकां केरे मुल्ख, यिज्रेल, एप्रैम, बिन्यामीन, बल्के सारे इस्राएली प्रादेशन पुड़ राज़ो ठहराव। शाऊलेरू मट्ठू ईशबोशेत 40 सालां केरू थियूं ज़ैखन तैन इस्राएले पुड़ राज़ केरने लगू, ते दूई सालन तगर राज़ केरतू राव। पन यहूदारे गोट्लेरे लोक दाऊदेरे हक्के मां राए। ते दाऊद हेब्रोन नगरे मां यहूदारे घराने पुड़ सड़े सत साल राज़ केरतो राव।
यहूदा ते इस्राएले मां लड़ाई
नेरेरू मट्ठू अब्नेर, ते शाऊलेरू मट्ठू ईशबोशेतेरे सेवक, महनैम नगरे मरां निस्तां गिबोन नगरे जो आए। तैखन सरूयाहेरू मट्ठू योआब, ते दाऊदेरे सेवक, हेब्रोन नगरे मरां निस्तां तैन सेइं गिबोनेरे तालाबे पुड़ मिले; ते दूईये जथे तैस तालाबे पुड़ एक्की-एक्की पासे बिश्शी जे। तैखन अब्नेरे योआबे सेइं ज़ोवं, “जुवान लोक उठतां इश्शे सामने खैढन।” योआबे ज़ोवं, “तैना खड़े भोन।” तैखन तैना खड़े उठे, ते तैन केरि गिनती की: शाऊलेरे मट्ठे ईशबोशेतेरे तरफां बिन्यामीनेरे कुले मरां 12 सिपाही, ते दाऊदेरे सेवकन मरां 12 निस्से। ते तैनेईं एक्की होरेरो दोग ट्लेइतां अपनि-अपनि तलवार तैन केरे देल्लोड़न मां डोबी; ते तैना साथी मेरि जे। एस वजाई सेइं तैस जगारू नवं हेल्कथस्सूरीम रेई जेवं, तैन गिबोन नगरे मांए।
असाहेलेरी मौत
तैस दिहाड़े बड़ी लड़ाई भोइ; ते अब्नेर ते इस्राएलेरे सिपाही दाऊदेरे सिपेहिन करां हारे। तैड़ी सरूयाहेरां ट्लाई मट्ठां थियां, योआब, अबीशै ते असाहेल। असाहेल जंगली हिरनेरो ज़ेरो तेज़ दौड़ने बालो थियो। असाहेल अब्नेरेरो पीछो केरने लगो, ते तैसेरो पीछो केरते-केरते न त देइने पासे मुड़ो न बांए पासे। अब्नेरे पत्रोवं मुड़तां पुछ़ू, “कुन तू असाहेल आस?” तैनी ज़ोवं, “हाँ अवं तैए आईं।” अब्नेरे तैस सेइं ज़ोवं, “चाहे दांए, चाहे बांए पासे मुड़, कोन्ची सिपेही सेइं लेड़तां तैसेरो हथियार थुसोड़तां ने।” पन असाहेले तैसेरो पीछो केरनो न छ़डो। अब्नेरे असाहेले सेइं फिरी ज़ोवं, “मेरो पीछो केरनो छ़ेडी दे; अवं तीं मैरतां मित्ती मां मिलानो न चैईं एन केरतां अवं तेरे ढ्ला योआबे अपनु तुत्तर केन्च़रे हरेइलो?” फिरी भी तैनी पीछो केरनो न छ़डो; तैखन अब्नेरे अपने भालेरो पेत्रियों हिस्सो तैसेरे पेटे मां एन्च़रे मारो, कि भालो वार-पार भोव; ते तै तैट्ठी बिछ़ड़तां मेरि जेव। ज़ेत्रे लोक तैस जगाई पुड़ आए ज़ैड़ी असाहेल बिछ़ड़तां मेरि जेव, तैड़ी तैना सारे खड़े रेई जे।
अब्नेर ते योआब
पन योआब ते अबीशै अब्नेरेरो पीछो केरते राए; ते दिहाड़ो डुबते-डुबते तैना अम्माह नंव्वेरे तैस पहाड़े तगर पुज़्ज़े, ज़ै गिबोनेरे जंगलेरे बत्ती मां गीह नंव्वेरे ठारारे सामने। ते बिन्यामीनी अब्नेरेरे पत्ती भोइतां अक जथो बेनि जे, ते तैना एक्की पहाड़ेरी च़ोटी पुड़ खड़े भोए। तैखन अब्नेर योआबे जो हक देइतां ज़ोने लगो, “कुन तलवार हमेशा मारती राए? कुन तू न ज़ानतस कि एसेरो नितीजो दुख देनेबालो भोल्हो? तू कैखन तगर अपने लोकन ऐह हुक्म न देलो, कि अपने ढ्लां केरो पीछो केरनो छ़ेडी देथ?” योआबे ज़ोवं, “परमेशरेरी ज़िन्दगरी कसम, कि अगर तू न ज़ोथो त, पक्के लोक झ़ेझ़ां च़ेलि जेवरे भोथे, ते अपने-अपने ढ्लां केरो पीछो न केरेथे।” तैखन योआबे नरशिंगो बज़ाव; ते सारे लोक रुकी जे, ते फिरी इस्राएली लोकां केरो पीछो न कियो, ते लड़ाई फिरी न की।
जंग खतम भोनेरां बाद अब्नेर अपने लोकन सेइं साथी तैस्से दिहाड़े रातो-रात अराबा मांमेइं भोइतां जेव; ते यरदन दरियारे पार भोइतां सारे बित्रोन मुल्खे मांमेइं भोइतां महनैम नगरे मां पुज़्ज़ो। योआब अब्नेरेरो पीछो केरनो शैरतां वापस अव; ते ज़ैखन तैनी सारे लोक अकोट्ठे किये, तैखन कुन हेरू, कि दाऊदेरे सिपेहिन मरां 19 सिपाही ते असाहेल भी नईं। पन दाऊदेरे सिपैहेईं बिन्यामीनी सिपाही ते अब्नेरेरे सिपाही एन्च़रे मारे कि तैन मरां 360 सिपाही मेरि जे। ते तैनेईं असाहेलेरी लाश नेइतां तैसेरे बाजी केरे कब्रस्ताने मां दब्बी, ज़ैन बैतलहम नगरे मां थियूं। तैखन योआब अपने सिपेहिन सेइं साथी पूरी रात च़ेलतां लौ भोने तगर हेब्रोन नगरे मां पुज़्ज़ो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.