Bhadrawahi Bible
2 राज़े 8
एलीशा नबी शूनेम नगरेरे कौन्शरी मद्दत केरते
एक्सां ज़ैस कौन्शरू मट्ठू एलीशा ज़ींतवरू थियूं, तैस सेइं तैनी ज़ोवरू थियूं कि अपने टब्बरे समेत इट्ठां गेइतां ज़ैड़ी कोन्च तू रेई सकतिस तैड़ी रा; किजोकि यहोवारी मर्ज़ीए कि काल पे, ते काल सत साल रालो।1 परमेशरेरे नेबेरे ज़ोनेरे मुताबिक तै कौन्श पलिश्ती केरे मुल्खे मां गेइतां राने लगी। सत सालां केरे बाद तै पलिश्ती लोकां केरे मुल्खे मरां वापस अई, ते अपने घरे ते ज़मीन वापस मैल्हनेरे लेई राज़े कां बिनती केरने लगी। राज़ो तैस वक्ते परमेशरेरे नेबेरे सेवक गेहजी सेइं गल्लां केरने लगोरो थियो, ते तैनी ज़ोवं, “ज़ैना चमत्कार एलीशा कियोरेन तैन केरे बारे मां मीं ज़ो।” ज़ैखन तै राज़े इस बारे मां ज़ोने लगोरो थियो कि एलीशा नेबे अक मुड़दो ज़ींतो कियोरो थियो, तैखन ज़ैस कौन्शरू मट्ठू तैने ज़ींतू कियोरू थियूं तैए एइतां अपने घरे ते ज़मीनरे बारे मां बिनती केरने लगी। तैखन गेहजी ज़ोने लगो, “हे मेरे मालिक! हे राज़ा! ई तैए कौन्शे ते इन तैन्ने मट्ठू आए ज़ैन एलीशा ज़ींतू कियोरू थियूं।” ज़ैखन राज़े तैस कौन्शी पुछ़ू, तैखन तैसां तैस सेइं सब किछ ज़ोवं। तैखन राज़े अक अधिकारी इन ज़ोइतां भेज़ो कि ज़ैन किछ इस कौन्शरू थियूं बल्के ज़ैखन करां इस कौन्शां मुल्ख शारोरोए तैखन करां इसेरां ऊडारां केरि आमदनी हुन्ना तगर भोवरीए तै सब एस वापस देथ।
हजाएल, अरामेरी गद्दी थुसोड़ते
किछ वक्तेरां बाद एलीशा नबी दमिश्क नगरे जो जेव। ते ज़ैखन अरामेरे राज़े बेन्हददे ज़ै बिमार थियो ई खबर शुनी, “कि परमेशरेरो नबी इड़ी एवरोए,” तैखन तैनी हजाएले सेइं ज़ोवं, “तोफो नेइतां परमेशरेरे नेबी सेइं मिलने जो गा, ते तैसेरे ज़िरिये यहोवा करां इन पुछ़, ‘कुन बेन्हदद ज़ै बिमारे तै बच़ेलो कि नईं?’” तैखन हजाएल तोफेरे लेई दमिश्क नगरेरी सैरी रोड़ी-रोड़ी चीज़ां 40 ऊँटन पुड़ लादेइतां, तैस सेइं मिलने जो च़लो, ते तैसेरे सामने खड़ो भोइतां ज़ोने लगो, “तेरे मट्ठे अरामेरे राज़े बेन्हददे अवं तीं सेइं इन पुछ़ने जो भेज़ोरोईं, ‘कुन अवं ज़ै बिमार आईं अवं बच़ेलो कि नईं?’” एलीशा तैस सेइं ज़ोवं, “गेइतां ज़ो, ‘तू ज़रूर बेच़ी सकतस,’ फिरी भी यहोवा मीं पुड़ बांदू कियोरूए, कि तू पक्को मरेलो।” ते परमेशरेरो नबी तैसेरे पासे लगातार तकतो राव, इड़ी तगर कि तै शरमिन्दो भोव ते तै नबी लेरां देने लगो। तैखन हजाएले पुछ़ू, “मेरे मालिक किजो लेरां देने लगोरोस?” तैनी जुवाब दित्तो, “एल्हेरेलेइ कि मीं पतो कि तू इस्राएली लोकन पुड़ कुन-कुन ज़ुलम केरेलो; तैन केरे क़िले बाले नगर तू फुकेलो; तैन केरे जुवान तू तलवारी सेइं ज़खमी केरेलो, ते तैन केरे बच्चन मारेलो, ते तैन केरि दोज़ींती कौन्शन तू छ़िन्देलो।” हजाएले ज़ोवं, “तेरो दास ज़ै कुतरेरो ज़ेरोए, कुन तै एत्रू बड्डू कम केरे?” एलीशा ज़ोवं, “यहोवा मीं पुड़ इन बांदू कियोरूए कि तू अरामेरो राज़ो बनेलो।” तैखन तै एलीशा करां अपने मालिके कांजो जेव, ते तैसेरे मालिक बेन्हददे तैस पुछ़ू, “एलीशा तीं सेइं कुन ज़ोवं?” तैनी जुवाब दित्तो, तैनी मीं सेइं ज़ोवं, “बेन्हदद ज़रूर बच़ेलो।” पन दूइयोवं दिहाड़े तैनी रिज़ाई पैनी सेइं सेली, ते तैसेरे तुत्तरे पुड़ एन्च़रे छ़ुंहें दित्तू कि तै मेरि जेव। तैखन हजाएल तैसेरे ठैरी राज़ो बनो।
इस्राएली योरामेरी हुकूमत
इस्राएल मुल्खेरे राज़े अहाबेरे मट्ठे योरामेरे राज़ केरनेरे पंच़ोंव साले मां, ज़ैखन यहूदा प्रदेशेरो राज़ो यहोशापात ज़ींतो थियो, तैखन यहोशापातेरू मट्ठू यहोराम यहूदा प्रदेशे पुड़ राज़ केरने लगू। ज़ैखन तै राज़ो बना, तैखन तैसेरी उमर 32 साल थी, ते तैनी 8 साल यरूशलेम नगरे मां राज़ कियूं। तै इस्राएलेरे राज़ा केरि ज़ेरि चाली पुड़ च़लतो राव, ज़ेन्च़रे अहाबेरो घरानो च़लतो थियो, किजोकि तैसेरी कौन्श अहाबेरी कुई थी; तै यहोवारी नज़री मां बुराई केरतो थियो। फिरी भी यहोवा यहूदा प्रदेश नाश केरनू न चाव, इन तैसेरे दास दाऊदेरी वजाई सेइं भोवं, किजोकि तैनी तैस सेइं वाधो कियोरो थियो, कि तेरे खानदानेरे लेई अवं सदा अक दीयो बैलतां रखेलो।
योरामेरे राज़ केरनेरे वक्ते मां एदोम प्रदेशेरे लोकेईं यहूदा प्रदेशे करां आज़ाद भोइतां अपनो अक राज़ो बनाव। तैखन योराम अपने सारे रथ साथी नेइतां साईर नगरे जो जेव, ते राती उठतां तैना एदोम प्रदेशेरे लोकन जो ज़ैनेईं तै घेरतां रखोरो थियो, तैट्ठां निस्तां तैन केरो घेरो ट्लोड़तां ते रथ च़लाने बालां केरे प्रधान भी मारे; ते सिपाही अपने-अपने डेरे जो नेश्शी जे। ते एदोम प्रदेशेरे लोक यहूदा प्रदेशेरे कब्ज़े मरां छुट्टी जे, ते अज़ तगर तेरहु आहे। तैस मौके लिब्ना नगरेरे लोक भी यहूदारे खलाफ भोए। योरामेरे ते तैसेरां सब कम्मां ते ज़ैन किछ तैनी कियूं, तैन यहूदा प्रदेशेरे राज़ां केरि किताबी मां लिखेरूए। आखरकार योराम अपने दादे-पड़दादां केरो ज़ेरो इस दुनियाई मरां च़लो जेव ते तै दाऊदपुरे2 मां दब्बो जेव; ते तैसेरू मट्ठू अहज्याह तैसेरे जगाई पुड़ राज़ केरने लगू।
यहूदी अहज्याहेरू राज़
अहाबेरे मट्ठे इस्राएलेरे राज़े योरामेरे हुकूमतरे बारोवं साले मां यहूदारो राज़ो यहोरामेरू मट्ठू अहज्याह राज़ केरने लगू। अहज्याह 22 सालां केरि उमरी मां राज़ो बनो, ते तैनी यरूशलेम नगरे मां सिर्फ अक्के साल राज़ कियूं। ते तैसेरी अम्मरू नवं अतल्याह थियूं, ज़ै इस्राएलेरे राज़े ओम्री एरी पोट्लड़ी थी। अहज्याह राज़े अहाबेरे घरानेरी ज़ेरि चाल च़ली, ते अहाबेरे घरानेरे ज़ेरू तैन कम केरतो थियो, ज़ैन यहोवारी नज़री मां बुरू थियूं, किजोकि तै अहाबेरे घरानेरो ज़माई थियो। तै अहाबेरे मट्ठे योरामे सेइं साथी गिलाद प्रदेशेरे रामोत नगरे मां अरामेरे राज़े हजाएले सेइं लड़ने जो जेव, ते अरामी सेना योराम ज़खमी कियो। योराम राज़ो एल्हेरेलेइ वापस जेव, कि यिज्रेल नगरे मां तैन ज़खमां केरो आलाज़ कराए, ज़ैना तैस अरामी केरे हथ्थे सेइं तैस मौके लग्गे, ज़ैखन तै हजाएले सेइं साथी लड़ने लगोरो थियो। ते अहाबेरू मट्ठू योराम त यिज्रेल नगरे मां बिमार थियूं, एस वजाई सेइं यहूदा प्रदेशेरो राज़ो यहोरामेरू मट्ठू अहज्याह तैस हेरने जो जेवं।
Source notes (2)
- Cross-reference 2 राज़. 7:18-19.
- Footnote दाऊदपुरे मतलब यरूशलेम नगर।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.