Bhadrawahi Bible
2 राज़े 24
यहूदा प्रदेशे पुड़ दुश्मना केरो हमलो
योशिय्याह राज़ेरे राज़ केरनेरे दिहाड़न मां बाबेलेरे राज़े नबूकदनेस्सरे यहूदा पुड़ हमलो कियो ते यहोयाकीम ट्लाई सालन तगर तैसेरे अधीन राव; फिरी तैनी तैसेरे खलाफ बगावत की। तैखन यहोवा तैसेरे खलाफ यहूदा प्रदेश नाश केरनेरे लेई कसदी, अरामी, मोआबी, ते अम्मोनी लोकां केरि सेना भेज़ी, इन यहोवारे तैस वचनेरे मुताबिक भोवं ज़ैन तैनी अपने दास नेबी केरे ज़िरिये ज़ोवरू थियूं। इस मां कोई शक नईं यहूदा प्रदेश पुड़ यहोवारे हुक्मेरे मुताबिक भोवं, ताके तै तैन अपने सामनेरां दूर केरे। इन मनश्शे राज़ेरे सारे पापां केरि वजाई सेइं भोवं। ते बेकसूरेरे तैस खूनेरे वजाई सेइं भोवरू थियूं; किजोकि तैने यरूशलेम नगर बेकसूरां केरे खूने सेइं भरोरू थियूं, ज़ैस यहोवाए माफ़ केरनू न चाव। यहोयाकीमेरां बाकी सारां कम्मां ज़ैना तैनी कियां, तैना यहूदा प्रदेशेरे राज़ां केरि इतिहासेरे किताबी मां लिखोरन। आखरकार यहोयाकीम अपने दादे-पड़दादां केरो ज़ेरो मेरि जेव ते तैसेरू मट्ठू यहोयाकीन तैसेरे जगाई पुड़ राज़ो बनू। ते मिस्र मुल्खेरो राज़ो अपने मुल्खे मरां बेइर फिरी कधे न अव, किजोकि बाबेलेरे राज़े मिस्रेरे नाले करां लेइतां फरात दरिया तगर ज़ेत्रो मुल्ख मिस्रेरे राज़ेरो थियो, सारो अपने कब्ज़े मां कियो।1
यहोयाकीनेरू राज़
ज़ैस वक्ते यहोयाकीन राज़ो बनो, तैस वक्ते तैसेरी उमर 18 साल थी, ते ट्लाई महीने तैनी यरूशलेम नगरे मां राज़ कियूं; ते तैसेरी अम्मरू नवं नहुश्ता थियूं, तै यरूशलेम नगरे मां रानेबाले एलनातानेरी कुई थी। तैनी अपने बाजी केरि ज़ेरि यहोवारे नज़री मां बुराई की। तैसेरे राज़ केरनेरे दिहाड़न मां बाबेलेरे राज़े नबूकदनेस्सरे सेनापतिएईं यरूशलेम नगरे पुड़ हमलो केरतां नगर घेरू। ज़ैखन बाबेलेरे राज़े नबूकदनेस्सरे अधिकैरेईं नगर घेरोरू थियूं, तैखन तै एप्पु भी तैड़ी थियो। तैखन यहूदारो राज़ो यहोयाकीन अपनि अम्मा ते अधिकारी, हाकिम ते खोजे साथी नेइतां बाबेलेरे राज़े कां जे, ते बाबेलेरे राज़े अपने राज़ेरे अठोवं साले मां तै ट्लाव। तैखन तैनी यहोवारे भवने मां ते मेहले मां रखोरू पूरू धन तैट्ठां कढू ते सोन्नेरां ज़ैना भांडां इस्राएलेरे राज़े सुलैमाने बनेइतां यहोवारे भवने मां रख्खोरां थियां, तैना सब तैनी टुक्ड़े-टुक्ड़े केरि छ़डां, ज़ेन्च़रे कि यहोवा ज़ोवरू थियूं। फिरी तैनी यहूदा प्रदेशे मां पूरे यरूशलेम नगरे मतलब सब हाकिम ते सारे सिपाही ज़ैना कुल मिलेइतां 10000 थिये, ते सारे कारीगिर लोक ते लुहार कैदी बनेइतां नेइ जेव, इड़ी तगर कि आम मैन्हन मरां गरीबां केरे अलावा तैड़ी कोई न राव। तैनी यहोयाकीन बाबेले जो नेइ जेव ते तैसेरी अम्मा ते कौन्शां ते खोजे ते मुल्खेरे प्रधान लोक तैना कैदी बनेइतां यरूशलेम नगरे मरां बाबेले जो नेइ जेव। ते सारे सिपाही ज़ैना 7000 थिये, तैना कारीगिर ते लुहार ज़ैना कुल मिलेइतां 1000 थिये, ते तैना सारे बहादर ज़ैना जंग केरनेरे काबल थिये, तैना बाबेलेरे राज़े गुलाम बनेइतां बाबेले जो निये। बाबेलेरे राज़े तैसेरे जगाई पुड़ तैसेरे चाचो मत्तन्याह यहूदारो राज़ो बनाव ते तैसेरू नवं बेदलतां सिदकिय्याह रख्खू।
सिदकिय्याहरू राज़
ज़ैखन सिदकिय्याह राज़ केरने लगो, तैखन तै 21 सालां केरो थियो, ते तैनी यरूशलेम नगरे मां 11 साल राज़ कियूं; ते तैसेरी अम्मरू नवं हमूतल थियूं, ज़ै लिब्ना नगरेरे बाले यिर्मयाहेरी कुई थी। तैनी ठीक यहोयाकीमेरी बत्ती पुड़ च़ेलतां तैनी तैन कम कियूं ज़ैन यहोवारे नज़री मां बुरू थियूं। किजोकि यहोवारे क्रोधेरे वजाई सेइं यरूशलेम नगरेरी ते यहूदा प्रदेशेरी लोकां केरि हालत बुरी भोइ, कि आखरी मां तैनी तैना अपने सामनेरां दूर किये।
Source notes (1)
- Cross-reference 2 इति. 36:9-10.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.