Bhadrawahi Bible
2 राज़े 22
कानूनेरे किताबरू मैल्हनू
ज़ैखन योशिय्याह यहूदा प्रदेशे पुड़ राज़ केरने लगो, तैखन तैसेरी उमर 8 साल थी, ते तैनी यरूशलेम नगरे मां 31 साल राज़ कियूं। ते तैसेरी अम्मरू नवं यदीदा थियूं ज़ै बोस्कत नगरेरी रानेबाले अदायाहेरी कुई थी। तैनी यहोवारे नज़री मां भलू कियूं ते ज़ैस बत्ती पुड़ तैसेरो पूर्वज दाऊद च़लतो राव ठीक तैस पुड़ तै भी च़लतो राव, ते तैस करां तै न देइने पासे मुड़ो ते बांए पासे मुड़ो। अपने हुकूमतरे अठारोवं साले मां योशिय्याह राज़े असल्याहेरू मट्ठू शापान मंत्री ज़ेसेरे दादेरू नवं मशुल्लाम थियूं, यहोवारे भवने मां इन ज़ोइतां भेज़ू, “हिल्किय्याह महायाजके कां गेइतां ज़ो, कि ज़ै चाँदी यहोवारे भवने मां आनोरीए, ते ज़ैना याजक संत्री भवनेरे दारे पुड़ भोतन तैनेईं लोकन करां अकोट्ठी कियोरीए, तैस ज़ोड़तां, तैन कम केरनेबालां केरे हवाले केर, ज़ैना यहोवारे भवने पुड़ प्रधान आन; फिरी तै तैन यहोवारे भवने मां कम केरनेबाले कारीगिरन दे, एल्हेरेलेइ कि तैस मां ज़ैन किछ ट्लुटोरू भोए तैसेरी तैना मरम्मत केरन। मतलब ट्लखानन, मिस्त्रन ते घोड़ तराशने बाले दे, ते भवनेरी मरम्मतरे लेई लकड़ी ते तराशोरे घोड़ घिन्नेरे लेई लान।” पन ज़ैन मैन्हु केरे हथ्थे मां तै चाँदी सौंफी जेई, तैन करां हिसाब न घिन्नो, किजोकि तैना सच़्च़ैई सेइं कम केरते थिये।
हिल्किय्याह महायाजके शापान मेंत्री सेइं ज़ोवं, “मीं यहोवारे भवने मां कानूनेरी किताब मैल्होरीए,” तैखन हिल्किय्याहे शापाने तै किताब दित्ती, ते तै तैस पढ़ने लगो।
तैखन शापान मेंत्री राज़े कां वापस गेइतां ई बिस्तार दित्तो, “ज़ै चाँदी भवने मां मीं मैल्होरीए, तै तेरे मज़दूरन थेलन मां छ़ेडतां, तैन सौंफी दित्तोरिए ज़ैना यहोवारे भवने मां कम केरनेबाले थिये।” फिरी शापान मेंत्री राज़े जो इन भी ज़ोई छ़डू, “हिल्किय्याह याजके तैस अक किताब दित्तोरिए।” तैखन शापान तैस राज़े पेढ़तां शुनाने लगो।
कानूनेरी तैस किताबरी गल्लां शुन्तां राज़े उदास भोइतां अपना लिगड़ां छ़िंदां। फिरी तैनी हिल्किय्याह याजक, शापानेरू मट्ठू अहीकाम, मीकायाहेरू मट्ठू अकबोर, शापान मंत्री ते असायाह नंव्वेरे अपने एक्की अधिकैरी जो हुक्म दित्तो, “ई किताब ज़ै मैल्होरीए, तैसारी गल्लां केरे बारे मां तुसेईं गेइतां मेरे ते लोकां केरे ते सारे यहूदी लोकां केरे बारे मां यहोवा पुछ़ा, किजोकि यहोवारी बड़ी जलजलाहट असन पुड़ एस वजाई सेइं भड़कोरीए, कि इश्शे दादे-पड़दादेईं इस किताबरी गल्लां न मेन्नी कि ज़ैन किछ इश्शे लेई लिखेरूए, तैसेरे मुताबिक केरेथे।”
हिल्किय्याह याजक ते अहीकाम, अकबोर, शापान ते असायाहे हुल्दा नबिया कां गेइतां तैस सेइं गल्लां की, तै तैस शल्लूमेरी कौन्श थी ज़ै तिकवारू मट्ठू ते हर्हसेरू पोट्लड़ू ते लिगड़ां केरो रखवालो थियो, (ते तै कौन्श यरूशलेमेरे नंव्वे मोहल्ले मां रहती थी)। तैनी तैन सेइं ज़ोवं, “इस्राएलेरो परमेशर यहोवा इन ज़ोते, कि ज़ै मैन्हु तुसेईं मीं कां भेज़ोरोए, तैस सेइं इन ज़ोथ, ‘यहोवा इन ज़ोते, कि शुन, ज़ै किताब यहूदारे राज़े पढ़ोरीए, तैसारी सैरी गल्लां केरे मुताबिक अवं इस ठारारे ते इस मां रानेबालन पुड़ आफत छ़डने बालो आईं। तैन लोकेईं अवं छ़ेडतां होरी देबतन कां गुग्गल बालो: ते एपनी बनेवरी सैरी चीज़न सेइं मीं क्रोध भड़केवरोए, एस वजाई सेइं मेरो क्रोध तैस ठारी पुड़ भड़केलो ते फिरी च़ुप न भोल्ही। पन यहूदारो राज़ो योशिय्याह ज़ैनी तुस यहोवा करां पुछ़ने जो भेज़ोरेथ तैस सेइं तुस इन ज़ोथ, कि इस्राएलेरो परमेशर यहोवा ज़ोते, एल्हेरेलेइ कि तू तैना गल्लां शुन्तां दीन भोव, ते मेरी तैना गल्लां शुन्तां कि इस ठारी ते एसेरे रानेबाले हेरतां लोक हैरान भोल्हे, ते लानत देले, तीं यहोवारे सामने मथ्थो टेको, ते अपना लिगड़ां छ़िन्दतां मेरे सामने लेरां दित्तोरिन, एस वजाई सेइं मीं तेरी प्राथना शुनोरीए, यहोवारू इन ज़ोनूए। एल्हेरेलेइ हेर, अवं एरू केरेलो, कि तू सुखे सेइं मारेलो ते अपने दादे-पड़दादां केरे कब्रां केरे ड्लखोरां दब्बो गालो, ते ज़ै मुसीबत अवं यरूशलेम नगरे पुड़ छ़डेलो, तैस मरां तीं अपने एछ़्छ़न सेइं किछ हेरनू न पेलू।’” तैखन तैनेईं मुड़तां योशिय्याह राज़े ईए बिस्तार दित्तो।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.