Bhadrawahi Bible
2 राज़े 20
हिजकिय्याह मरने करां बच़ते
तैन दिहाड़न मां हिजकिय्याह राज़ो एत्रो बिमार भोइ जेव कि मरने बालो थियो, ते आमोसेरे मट्ठे यशायाह नेबी तैस कां गेइतां ज़ोवं, “यहोवा एन ज़ोते, कि अपने घराने ज़ै हुक्म देनोए तै दे; किजोकि तू बिमैरी करां न बच़ेलो बल्के मेरि गालो।” तैखन तैनी दिवारारे पासे तुत्तर फिरेइतां यहोवा कां प्राथना केरतां ज़ोवं, “हे यहोवा! अवं मिन्नत केरताईं, याद केर। कि अवं तेरी हज़ूरी मां सच़्च़ैई ते साफ मने सेइं च़लतो एवरोईं; अवं तैन केरतो एवरोईं ज़ैन तीं रोड़ू लगते।” ते हिजकिय्याह बेड़ि लेरां देने लगो। तैखन एरू भोवं कि यशायाह राज़े करां गेइतां अंगने मां भी न थियो पुज़ोरो त यहोवा तैस सेइं ज़ोवं, “वापस गेइतां मेरे लोकां केरे राज़े हिजकिय्याह सेइं ज़ो, कि तेरे पूर्वज दाऊदेरो परमेशर यहोवा इन ज़ोते, कि मीं तेरी प्राथना शुनी ते तेरां ऐंखरू हेरां; हेर, अवं तीं बझ़ाताईं; ट्लेईदी तू यहोवारे भवने मां गेइ बटेलो। अवं तेरी उमर 15 साल बधेइलो। ते अश्शूरेरे राज़ेरे हथ्थे मरां तीं ते एस यरूशलेम नगरे बच़ेइलो, ते अवं अपने खातर ते अपने दास दाऊदेरे खातर इस नगरेरी हिफाज़त केरेलो।” तैखन यशायाह नेबे राज़ेरे सेवकन ज़ोवं, “फैगू केरि अक टिकी ने।” ज़ैखन तैनेईं तै नेइतां फोड़न पुड़ बन्धी, तैखन राज़ो ठीक भोव।
हिजकिय्याहे ठीक भोने करां पेइलू यशायाह नेबी पुछ़ोरू थियूं, “यहोवा ज़ै मीं ठीक केरेलो ते अवं ट्लेईदी यहोवारे भवने मां गेइ सकेलो, एसेरो कुन निशान भोल्हो?” यशायाह नेबे ज़ोवं, “यहोवा अपने ज़ोनेरे मुताबिक केरेलो, एस गल्लरो यहोवारे तरफां ई निशान भोल्हो, कि धुपरी छाव दश कदम अग्रोवं च़ली गाली, या दश कदम पत्रोवं भोइ गाली।” हिजकिय्याह राज़े ज़ोवं, “छावरू दश कदम अग्रोवं बधनू त निकड़ी गल्ले, एल्हेरेलेइ एरू भोए की छाव दश कदम पत्रोवं वापस गाए।” तैखन यशायाह नेबे यहोवा कां प्राथना की, ते आहाज राज़ेरी धुपरी छाव, ज़ै दश कदम ढेली जेवरी थी, यहोवा तै दश कदम वापस की।
हिजकिय्याहेरू घमण्ड ते तैसेरी सज़ाह
तैस मौके बलदानेरू मट्ठू बरोदक-बलदान ज़ै बाबेलेरो राज़ो थियो, तैनी हिजकिय्याहेरे बिमार भोनेरी खबर शुन्तां, तैस कां चिट्ठी भेज़ी ते तोफे भेज़े। तैन केरे आन्ने बालां केरि मेनतां हिजकिय्याह तैन अपने कीमती चीज़ां केरे सब भण्डार, ते चाँदी ते सोन्नू ते खुशबूदार चीज़ां ते कीमती तेल ते अपने हथियारां केरू पूरू घर ते अपने भण्डारन मां ज़ैना-ज़ैना चीज़ां थी, तैना सब हेरेई; हिजकिय्याहेरे मेहले ते रियासती मां कोई एरी चीज़ न राई, ज़ै तैने तैन्न न हिरेवरी भोए।
तैखन यशायाह नेबे हिजकिय्याह राज़े कां गेइतां पुछ़ू, “तैना मैन्हु कुन ज़ोइतां जेवरेन? ते कोट्ठां तीं कां एवरे थिये?” हिजकिय्याहे ज़ोवं, “तैना त बड़े दूरेरां बाबेल मुल्खे मरां एवरे थिये।” फिरी तैनी पुछ़ू, “तेरे मेहले मां तीं तैन कुन-कुन हिरव?” हिजकिय्याहे ज़ोवं, “ज़ैन किछ मेरे मेहले मांए, तैन सारू तैनेईं हेरू। मेरे भण्डारन मां कोई एरी चीज़ नईं, ज़ै मीं तैन न भोए हिरेवरी।”
तैखन यशायाह हिजकिय्याह सेइं ज़ोवं, “यहोवा तीं सेइं इन ज़ोते। एरे दिहाड़े एजने बालेन, ज़ैन मां ज़ैन किछ तेरे मेहले मांए, ते ज़ैन किछ तेरे बुज़ुर्गां केरू रखेरू भोए अज़्ज़ेरे दिहाड़े तगर भण्डारन मांए तैन सब बाबेल जो निव गालू; यहोवा इन ज़ोते, कि कोई चीज़ न राहेली।1 ते ज़ैना मट्ठां तेरे खानदाने मां पैदा भोल्हां, तैन मरां भी किछ तैना गुलाम बनेइतां नेले; ते तैना खोजे बेनतां बाबेलेरे मेहले मां राले।” तैखन हिजकिय्याहे यशायाह सेइं ज़ोवं, “यहोवारू वचन ज़ैन तीं ज़ोवरूए, तैन रोड़ूए;” किजोकि तैनी सोचू, “अगर मेरे दिहाड़न मां आराम ते सच़्च़ाई बनोरी राहेली? त कुन इन रोड़ू नईं?” हिजकिय्याहेरां सारां कम्मां ते तैसेरी सारी बहादरी ते कोस तरीके तैनी अक तालाब ते नहर बनेइतां नगरे मां पानी पुज़ेई दित्तू, इन सब यहूदारे राज़ां केरे इतिहासेरी किताबी मां लिखेरूए। आखरी मां हिजकिय्याह अपने दादे-पड़दादां केरो ज़ेरो मेरि जेव ते तैन केरे ड्लखोरां दब्बो जेव ते तैसेरू मट्ठू मनश्शे तैसेरे जगाई पुड़ राज़ो बनू।
Source notes (1)
- Cross-reference 2 राज़. 24:13-17;2 इति. 36:10.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.