Bhadrawahi Bible
2 राज़े 12
यहूदा प्रदेशे पुड़ योआशेरू राज़
येहूएरे इस्राएले पुड़ हुकूमत केरनेरे सत्तोवं साले मां योआश यहूदा प्रदेशेरे पुड़ राज़ केरने लगो, तैनी यरूशलेम नगरे मां 40 साल राज़ कियूं। तैसेरी अम्मरू नवं सिब्या थियूं ज़ै बेर्शेबा नगरेरी रानेबाली थी। ते ज़ांतगर यहोयादा याजक योआशे शिक्षा देंतो राव, तांतगर तै तैन्ने कम केरतो राव ज़ैन यहोवारी नज़री मां रोड़ू थियूं। फिरी भी मूरती केरि उच्ची ठारां केरि वेदी न बिछ़ोड़ी; लोक तैखन भी उच्ची ठारां केरि वेदी पुड़ बलि च़ाढ़ते थिये ते गुग्गल बालते राए।
एक्सां योआशे याजकन सेइं ज़ोवं, “पवित्र कियोरी चीज़ां केरे ज़ेत्रे रुपेइये यहोवारे भवने मां पुज़ाए गान, मतलब लोक ज़ेत्रे रुपेइये देनेरे काबल भोन, ते ज़ेत्रे रुपेइये तैसेरी मेर्ज़ी सेइं यहोवारे भवने मां अन्नेरे भोन, इन सब याजक लोक अपने ज़ान पिशानोरे लोकन करां नेन ते यहोवारे भवने मां ज़ैन किछ ट्लुटोरू भोए तैस मरम्मत केरन।” फिरी भी याजकेईं भवने मां ज़ैन किछ ट्लुटोरू थियूं, तैसेरी योआश राज़ेरे हुकूमतरे तरेइयोवं साले तगर न थी कियोरी। एल्हेरेलेइ योआश राज़े यहोयादा याजक, ते होरे याजकन भी कुजेइतां पुछ़ू, “यहोवारे भवने मां ज़ैन किछ ट्लुटोरू थियूं, तैसेरी तुस मरम्मत किजो न केरथ? हुन्ना करां अपने ज़ान पिशानरे लोकन करां होरे रुपेइये न नेइयथ, ते ज़ैना तुसन मैल्हन, तैना भवनेरी मरम्मत केरनेरे लेई देने।” तैखन याजकेईं मन्नू कि न त अस लोकन करां होरे रुपेइये नेम ते न भवनेरी मरम्मत केरम।
तैखन यहोयादा याजके अक सन्दूख नेइतां, तैसेरे ढकने गत कोश्तां तै यहोवारे भवने मां एजनेबालां केरे देइने हथ्थेरे पासे वेदी कां रख्खो; ते दारेरी रखवाली केरनेबाले याजक तैस मां तैना रुपेइये छ़डने लगे ज़ैना यहोवारे भवने मां आने गाते थिये।1 ज़ैखन तैनेईं हेरू, कि सन्दूखे मां बड़े रुपेइये भेवरेन, तैखन राज़ेरे प्रधान ते याजके एइतां तैना थेलन मां बन्धे, ते यहोवारे भवने मां दित्तोरे रुपेइये गने। तैखन तैनेईं तैना तुल्लोरे रुपेइये तैन कम केरनेबालन दित्ते, ज़ैना यहोवारे भवने मां अधिकारी थिये; ते तैनेईं तैना यहोवारे भवनेरी मरम्मत केरनेबालन ट्लखानन, चनाई केरनेबाले मिस्त्रन, ते घोड़ तराशने बालन दित्ते। लकड़ी ते तराशोरे घोड़ घिन्नेरे लेई, ते ज़ैन किछ भवनेरे मरम्मत केरने मां खर्च़ भोतू थियूं, तैस मां लाए। पन ज़ैना रुपेइये लोक यहोवारे भवने मां च़ाढ़ते थिये, तैन सेइं चैंदरे तशले, चिमटे, नरशिंगे सोन्ने चैंदरे कोन्ची किसमेरी चीज़ां न बेनि। पन तैना कम केरनेबालन दित्ते जे, ते तैनेईं तैना नेइतां यहोवारे भवनेरी मरम्मत की। ते ज़ैन केरे हथ्थे मां कम केरनेबालां केरे लेई रुपेइये दित्ते गाते थिये, तैन करां हिसाब न थियो नियो गातो, किजोकि तैना ईमानदैरी सेइं कम केरते थिये। ज़ैना रुपेइये दोषबेलि ते पापबेलि देनेरे लेई दित्ते गातो थिये, तैना त यहोवारे भवने मां लाए न थिये गाते, किजोकि तैना याजकां केरे लेई थिये।
इसेरां बाद अरामेरे राज़े हजाएले गत नगरे पुड़ हमलो कियो, ते तैन सेइं लड़ाई केरतां तैस पुड़ कब्ज़ो कियो। तैखन तैनी यरूशलेम नगरे पुड़ हमलो केरनेरी योजना बनाई। तैखन यहूदा प्रदेशेरे राज़े योआशे तैना सब पवित्र चीज़ां ज़ैना तैसेरे दादे-पड़दादन यहोशापात, यहोराम ते अहज्याह नंव्वेरे यहूदा प्रदेशेरे राज़ेईं पवित्र कियोरी थी, ते एपनी पवित्र कियोरी चीज़ां भी ते ज़ेत्रू सोन्नू यहोवारे भवनेरे गुदामन मां ते राज़ेरे मेहले मां मैल्हू, तैन सब नेइतां अरामेरे राज़े हजाएले कां भेज़ू; ते तै यरूशलेम नगरे मरां च़लो जेव।
योआशेरां बाकी सारां कम्मां ज़ैना तैनी कियां, तैना यहूदारे राज़ां केरि इतिहासेरी किताबी मां लिखोरन। योआशेरे अधिकैरेईं बगावत केरतां, तैस मिल्लो एरे भवने मां ज़ै सिल्ला एरी उतरैई पुड़ थियो, मारो। मतलब शिमातेरू मट्ठू योजाबाद, ते शोमेरेरू मट्ठू यहोजाबाद, ज़ैना तैसेरे अधिकारी थिये, तैनेईं तैस एरी बाई, कि तै मेरि जेव। तैखन तै दाऊदपुरे मां दब्बो जेव ज़ैड़ी तैसेरे दादे-पड़दादे दब्बोरे थिये, ते तैसेरू मट्ठू अमस्याह तैसेरे ठैरी पुड़ राज़ो बनू।
Source notes (1)
- Cross-reference मरक. 12:41.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.