Bhadrawahi Bible
2 राज़े 10
येहू अहाबेरे 70 मट्ठन, पोट्लड़ां मारते
अहाबेरां 70 मट्ठां ते पोट्लड़ां, सामरिया नगरे मां रहतां थियां। येहूए सामरिया नगरे मां तैन बुज़ुर्गन कां, ते ज़ैना यिज्रेलेरे हाकिम थिये, ते ज़ैना अहाबेरे मट्ठन पालने बाले थिये, तैन कां चिट्ठी लिखतां भेज़ी, “तुश्शे मालिकेरां मट्ठां, पोट्लड़ां त तुसन कां रहतन, ते तुश्शे रथ, ते घोड़े भी आन, ते तुश्शू अक क़िले बालू नगर, ते हथियार भी आन; त ई चिट्ठी मैलते, अपने मालिकेरे मट्ठन-पोट्लड़न मरां ज़ैन सेभन करां रोड़ू ते काबल भोए, तैस तैलतां, तैसेरे बाजी केरे तखते पुड़ बिशाला, ते अपने मालिकेरे घरानेरे लेई लड़ा।” पन तैना हाकिम पेढ़तां बड़े डेरि जे, ते एक्‍की होरि सेइं ज़ोने लगे, “तैसेरे सामने दूई राज़े योराम ते अहज्याह भी टिकी न सके, फिरी अस येहूएरे सामने कोड़ि टिकी बटमेले?” तैखन ज़ै राज़ेरे-घरानेरे कम्मे पुड़ अधिकारी थियो, ते ज़ै नगरेरो अधिकारी थियो, तैनेईं ते बुज़ुर्गेईं ते मट्ठन पालने बालेईं येहू कां ई समाद भेज़ो, “अस तेरे दास अहम, ज़ैन किछ तू असन सेइं ज़ोस, तैन अस केरमेले; अस तैन मरां कोन्ची राज़ो न बनामेले, ज़ैन किछ तीं ठीक लग्गे तैन केर।” तैखन येहूए होरी चिट्ठी लिखतां तैस कां भेज़ी, “अगर तुस मेरे पासेरे आथ ते मेरी शुना, त अपने राज़ेरे मट्ठां-पोट्लड़ां केरि क्रोड़ी कटेइतां कालां इस्से वक्ते तगर मीं कां यिज्रेल नगरे मां हाज़र भोइयथ।” राज़ेरे खानदाने मरां 70 मैन्हु थिये, तैन केरि हेरगेश सामरिया नगरेरे अधिकारी केरते थिये। ज़ैखन तैन लोकेईं येहूएरी ई दूइयोवं चिट्ठी पढ़ी, तैनेईं तैना 70 मैन्हु ट्लेइतां मारे, ते तैन केरि क्रोड़ी टोकरन मां रेखतां यिज्रेल नगरे मां येहू कां भेज़ी। ज़ैखन एक्‍की मैन्हे तैस कां गेइतां ज़ोवं, “राजकुमारां केरि क्रोड़ी एवरिन।” तैनी ज़ोवं, “तैन फाटके मां दूई ढेर लेइतां झ़ेझ़ां तगर रखा” झ़ेझ़ां येहूए बेइर खड़े भोइतां सेभी लोकन सेइं ज़ोवं, “तुस त बेकसूर आथ, मीं अपने राज़ेरे खलाफ बगावत केरतां तै मारो, पन इना सब केनि मारे? हुनी सेमझ़ी गाथ कि ज़ैन वचन यहोवा अपने दास एलिय्याह नेबेरे ज़िरिये सेइं ज़ोवरू थियूं, तैन तैनी पूरू कियूं; ज़ैन वचन यहोवा अहाबेरे घरानेरे बारे मां ज़ोवं, तैस मरां अक गल भी पूरी भोने बगैर न राहेली।” तैखन अहाबेरे घरानेरे ज़ेत्रे लोक यिज्रेल नगरे मां रेई जे, तैना सब ते अधिकारी ते दोस्त ते याजक थिये, तैना सब येहूए मारे, इड़ी तगर कि तैनी कोई भी ज़ींतो न छ़डो। तैखन येहू यिज्रेल नगर शैरतां सामरिया नगरे जो जेव। ते बत्तां पुहालां केरे गब्बां बरधानेरे जगाई पुड़ पुज़ोरो थियो, कि यहूदारे राज़े अहज्याहेरे ढ्ला येहू सेइं मिले ते ज़ैखन तैनी पुछ़ू, “तुस कौन आथ?” तैखन तैनेईं जुवाब दित्तो, “अस अहज्याहेरे रिश्तेदार अहम, ते राज़ेरे मट्ठां ते ईजेबेल रैनरे बच्‍चां केरो हाल चाल पुछ़ने च़लोरेम।” तैखन येहूए अपने सिपेहिन हुक्म दित्तो, “एन्न ज़ींते ट्लाथ।” एल्हेरेलेइ तैनेईं तैना ज़ींते ट्लाए, तैना 42 मैन्हु थिये, ते उन्ना बरधानेरे बैईं कां मारे, तैनी तैन मरां कोई भी ज़ींतो न छ़डो। ज़ैखन तै तैट्ठां च़लो जेव, तैखन रेकाबेरू मट्ठू यहोनादाब सामनेरां एइतू तैस मैल्हू। तैसेरो हाल चाल पुछ़तां तैनी ज़ोवं, “मेरे मने मां त तेरे लेई किछ भी बुराई नईं, कुन तेरो मन भी एन्च़रे आहे?” यहोनादाबे ज़ोवं, “हाँ, एन्च़रे आहे।” फिरी तैनी ज़ोवं, “अगर एरू आहे, त अपनो हथ मीं दे।” तैनी अपनो हथ तैस दित्तो, ते तै एन ज़ोइतां तैस अपने रथे पुड़ च़ाढ़ने लगो, तैखन येहूए ज़ोवं, “मीं साथी च़ल ते हेर, कि अवं यहोवारे लेई केत्रो वफादार आईं।” तैखन तै तैसेरे रथे पुड़ च़ाढ़ो जेव। सामरिया नगरे मां पुज़तां तैनी यहोवारे तैस वचनेरे मुताबिक ज़ैन तैनी एलिय्याह सेइं ज़ोवरू थियूं, अहाबेरे ज़ेत्रे मैन्हु सामरिया नगरे मां बच़ोरे राए, तैना सब मारे त एन्च़रे राज़ेरे घरानेरो नाश कियो। तैखन येहूए सारे लोक अकोट्ठे केरतां ज़ोवं, “अहाबे त बाल देबतेरी थोड़ी ज़ेरि पूज़ा कियोरी थी, पन हुनी अवं येहू बाल देबतेरी पूज़ा तैस करां जादे केरेलो। एल्हेरेलेइ हुनी बाल देबतेरे सारे नबी, सारे बाल देबतेरे पूज़ा केरने ते सारे याजक लोक मीं कां कुजाथ, तैन मरां कोई भी न रेई गाए; किजोकि बाल देबतेरे लेई मीं अक बड़ू जग देनू आहे; ज़ै कोई न एज्जे तै ज़ींतो न बच़ेलो।” येहूए इन कम च़लैकी सेइं बाल देबतेरे सारे पूज़ा केरनेबाले नाश केरनेरे लेई कियूं। तैखन येहूए ज़ोवं, “बाल देबतेरी अक पवित्र महा सभारो प्रचार केरा।” ते लोकेईं प्रचार कियो। येहूए सारे इस्राएल मुल्खे मां मैन्हु भेज़े; तैखन बाल देबतेरे सारे पूज़ा केरनेबाले आए, इड़ी तगर कि एरहो कोई न राव ज़ै न भोए एवरो। तैना बाल देबतेरे मन्दरे मां एत्रे आए, कि तैड़ी पव रखनेरे लेई ठार न राई। तैखन तैनी तैस मैन्हु जो हुक्म दित्तो, ज़ै याजकां केरे लिगड़ां केरे घरेरो अधिकारी थियो, “बाल देबतेरे सारे पूज़ा केरनेबालां केरे लेई याजकां केरां लिगड़ां केढतां आन।” एल्हेरेलेइ तैनी तैन केरे लेई खास लिगड़ां आनां। तैखन येहू रेकाबेरे मट्ठे यहोनादाब साथी नेइतां बाल देबतेरे मन्दरे मां जेव, ते बाल देबतेरे पूज़ा केरनेबालन सेइं ज़ोवं, “तोपतां हेरा, कि इड़ी तुसन सेइं साथी यहोवारो भक्त कोई त नईं, सिर्फ बाल देबतेरे पूज़ा केरनेबालेन।”
तैखन तै मेलबलि ते होमबलि च़ाढ़नेरे लेई मन्दरे मां जेव। येहूए त 80 ज़ने बेइर तियार केरतां रखोरे थिये ते तैन सेइं ज़ोवरू थियूं, “अगर तैन मैन्हन मरां ज़ैन अवं तुश्शे हथ्थे मां देलो, कोई भी बच़ेलो त, ज़ै तैस गाने देलो तैसेरी जान, तैसेरे जानरे बदले गाली।” फिरी ज़ैखन होमबलि च़ाढ़ी, तैखन येहूए पहरदारन ते अधिकैरन सेइं ज़ोवं, “अन्तर गेइतां तैन मैरी छ़डा; कोई नेश्शी न बटे।” तैखन तैनेईं तैना तलवारी सेइं मारे ते पहरदारेईं ते अधिकैरेईं तैना बेइर शैरतां बाल देबतेरे मन्दरेरे नगरे मांजो आए। ते तैनेईं बाल देबतेरी मूरती मन्दरे मरां केढतां फुक्‍की छ़ेडी। ते बालेरे खम्भे तैनेईं ट्लोड़ी छ़डे; ते बाल देबतेरू मन्दर शौचालय बनाव; ते तैन अज़ तगर भी एन्च़रे।
एन्च़रे सेइं येहूए बाल देबतेरी पूज़ा इस्राएल मुल्खे मरां दूर की। फिरी भी नबातेरे मट्ठे यारोबाम, ज़ैनी इस्राएले करां पाप करेवरो थियो, तैसेरे पापेरे मुताबिक केरने, मतलब बेतेल ते दान नगरन मां सोन्नेरे बछ़ड़ां केरि पूज़ा की, ते तैस करां येहू अलग न राव। यहोवाए येहू सेइं ज़ोवं, “एल्हेरेलेइ कि तीं तैन कम कियूं, ज़ैन मेरी नज़री मां रोड़ूए, ते अहाबेरे घराने सेइं मेरे मेर्ज़रे मुताबिक बर्ताव कियो, तेरे पड़पोट्लड़ेरे मट्ठन तगर तेरी औलाद इस्राएलेरे तखते पुड़ बिशोरी राहेली।” पन येहूए इस्राएलेरे परमेशर यहोवारे कानूने पुड़ पूरे मने सेइं च़लनेरी एहतियात न की, बल्के यारोबाम ज़ैनी इस्राएली लोकन करां पाप कराव, तैसेरे पापेरे मुताबिक केरने करां तै अलग न भोव।
तैन दिहाड़न मां यहोवा इस्राएलेरी हद घटाने लगो, एल्हेरेलेइ हजाएले इस्राएली तैन केरे सारे प्रादेशन पुड़ हाराए: यरदन दरियाए करां पूरबेरे पासे सारो गिलाद प्रदेश ते गादी ते रूबेनी ते मनश्शेई लोकां केरो प्रदेश मतलब अरोएर नगरे करां लेइतां ज़ै अर्नोन दरियाए तगर, गिलाद ते बाशाने तगर। येहू एरां बाकी सारां कम्मां ते ज़ैन किछ तैनी कियूं, ते तैसेरी पूरी बहादरी, इन सब किछ इस्राएलेरे राज़ां केरि इतिहासेरी किताबी मां लिखेरूए। आखरकार येहू अपने दादे-पड़दादां केरो ज़ेरो मेरि जेव, ते सामरिया नगरे मां तै दब्बो जेव, ते तैसेरू मट्ठू यहोआहाज तैसेरे जगाई पुड़ राज़ो बनू। येहूए सामरिया नगरे मां इस्राएले पुड़ 28 साल राज़ कियूं।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.