Bhadrawahi Bible
2 कुरिन्थियों 7
किजोकि हे ट्लारव परमेशरे वाधो कियोरो कि तै असन अपने बच्चां केरे रूपे मां कबूल केरेलो, त एज्जा, अस अपने आपे ते जिसमेरी ते आत्मारी सब गन्दगी शुद्ध केरम, ते परमेशरेरो डर मेनतां ते इज़्ज़त केरतां, ते परमेशरेरी बत्तां च़लनेरे लेई पूरे तरीके सेइं पवित्र ज़िन्दगी ज़ींम।
पौलुसेरो आनन्द
असन अपने दिल मां ठार देथ, असेईं केन्ची सेइं अन्याय नईं कियोरो, न केन्चेरू किछ बिगाड़ेरूए, ते न कोई ठग्गोरोए। अवं तुसन दोषी बनानेरे लेई इन नईं लग्गोरो ज़ोने, किजोकि मीं इन पेइलू ज़ोवरूए, कि तुस इश्शे मने मां बसोरेथ कि अस तुसन साथी मरने ज़ींनेरे लेई तियारम। अवं तुसन सेइं बड़े दिलेरी सेइं ज़ोने लगोरोईं, मीं तुसन पुड़ बड़ू घमण्डे, अवं तसल्ली सेइं भेरोई जेवरोईं; अपने सारे दुखन मां अवं आनन्दे सेइं भरपूर रहताईं।
किजोकि ज़ैखन अस त्रोआस शैरतां मकिदुनिया इलाके मां आए, तैखन भी इश्शे जानी चैन न भोइ, पन अस च़ेवरे पासना दुख झ़ैल्लते राए, बेइर लड़ैई थी, अन्तर बेड़ि-बेड़ि गल्लां थी। फिरी भी उदासन तसल्ली देनेबाले परमेशरे तीतुसेरे एजने सेइं असन तसल्ली दित्ती। ते न सिर्फ तैसेरे एजने सेइं पन तैसेरी तैस तसल्ली सेइं, ज़ै तैस तुसन करां मैलती थी; ते तैनी तुश्शी इच्छा ते तुश्शे दुख ते मीं सेइं मिलनेरे जोशेरी खबर असन शुनाई, ज़ैस सेइं होरो भी आनन्द भोव। किजोकि अगर मीं एपनी चिट्ठी सेइं तुस दुखी किये, पन तैस करां पसतेईं न, ज़ेन्च़रे पेइलो पसतातो थियो, किजोकि अवं हेरताईं तैस चिट्ठी सेइं तुसन दुख त भोव पन तै थोड़े च़िरेरे लेई थियो। हुनी अवं खुशी आईं पन एल्हेरेलेइ नईं कि तुसन दुख पुज़्ज़ो, बल्के एल्हेरेलेइ कि तैस्से दुखेरे वजाई तुसेईं पापन करां मन फिराव। किजोकि तुश्शो दुख परमेशरेरे मेर्ज़ी सेइं थियो, कि इश्शे पासेरां तुसन कोई नुकसान न पुज़्ज़े। किजोकि परमेशरेरे भेक्तरो दुख एरो पसतावो पैदा केरते ज़ैस सेइं मुक्ति मैलतीए, फिरी तैस सेइं पसतानू न पे, पन दुनियारो दुख हमेशारी मौत पैदा केरते। ते हेरा, इस्से गल्ली सेइं तुसन परमेशरेरे भेक्तरो दुख भोव, कि तुसन केत्रो जोश, उज़र, सरक, डर, इच्छा, मघन भोनू, ते सज़ाह देनेरो खियाल पैदा भोव? तुसेईं सेब्भी तरीके सेइं इन सिद्ध कियूं, कि तुस इस गल्ली मां बेकसूर आथ। फिरी मीं ज़ैन तुसन जो सेखती सेइं लिखोरू थियूं, तैन न तैसेरे वजाई सेइं लिखू, ज़ैने अन्याय कियो, ते न तैसेरे वजाई सेइं ज़ैस सेइं अन्याय भोव, पन एल्हेरेलेइ कि तुश्शी सरगरमी ज़ै इश्शे लेइए, तै परमेशरेरे सामने तुसन पुड़ बांदी भोए। एल्हेरेलेइ असन हिम्मत मैल्ही;
ते इश्शी इस हिम्मती सेइं साथी तीतुसेरे आनन्द सेइं होरो भी आनन्द भोव किजोकि तैसेरो मन तुश्शे वजाई सेइं हरो भरोए। किजोकि अगर मीं तैसेरे सामने तुश्शे बारे मां किछ घमण्ड हिराव, त छिथोव न, पन ज़ेन्च़रे असेईं तुसन सेइं सब गल्लां सच़-सच़ ज़ोवरी थी, तेन्च़रे इश्शू घमण्ड हिरानू तीतुसेरे सामने भी सच़ निस्सू। ते ज़ैखन तैस तुश्शो सेब्भी केरू हुक्मन मन्नेबाले भोनू याद एइते; किजोकि तुसेईं थरकते-थरकते तैस सेइं मुलाकात की; तैसेरो प्यार तुश्शे पासेरां होरो भी बद्धतो गाते। अवं खुशी भोताईं, किजोकि तुसन करां मीं हर गल्ली मां भरोसो भोते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.