Bhadrawahi Bible
2 कुरिन्थियों 4
मित्तरे भांडन मां धन
एल्हेरेलेइ अगर असन पुड़ एरी दया भोइ, कि असन ई खुशखबरी शुनानेरी सेवा मैल्ही, त अस दिलेरी न शारम। पन असेईं शरमरां छ़पोरां कम्मां शारोरन, ते न च़लैकी सेइं च़लते, ते न परमेशरेरे वचने मां मिलावट केरम। पन परमेशर इश्शो गवाहे कि अस सच़ ज़ोतम, ते हर कोई गवाही देते कि इन सच़्च़े।
पन अगर इश्शे खुशखबरी पुड़ पड़दोए, त ई नाश भोनेबालां केरे लेइए। ते तैन विश्वास न केरनेबालां केरे लेई, ज़ैन केरि अक्ल इस दुनियारे ईश्वर शैताने कानी कियोरीए, ताके मसीह ज़ै परमेशरेरू रूपे, तैसेरी महिमा खुशखेबरारी लौ तैन पुड़ न चमके।
किजोकि अस अपनो नईं, बल्के यीशु मसीहेरो प्रचार केरतम, कि तै प्रभुए; अस यीशु मसीहेरे वजाई सेइं तुश्शे सेवकम। एल्हेरेलेइ कि परमेशर तैए ज़ैनी ज़ोवं, “कि आंधरे मरां लौ चमके,” ते परमेशरे इश्शे दिलन मां लौअरी ज़ेरि समझ़ दित्ती, कि अस परमेशरेरी महिमा पिशानम ज़ै यीशु मसीह मां लेइहोई।
पन अस मित्तरे भांडां केरे ज़ेरेम ज़ैन मां धन रखेरूए, कि ई हछ्छी शक्ति इश्शे तरफां नईं, बल्के परमेशरेरे तरफां भोए। अस च़ेवरे पासना दुख त झ़ैल्लतम, पन मुश्किली मां न पेम; घबरातम, पन न उमीद न भोम। सताए त गातम, पन शारे न गाम, बिछ़ोड़ त गातम पन नाश न भोम। अस यीशु मसीहेरी मौत अपनि जानी मां हर वक्त च़लातम; कि ज़ैन किछ अस केरतम तैसेरे ज़िरिये लोक यीशुएरी ज़िन्दगी हेरेले।
किजोकि इश्शे ज़ींते सांसेइं, सदा यीशुएरे वजाई सेइं असन मौतरे खतरो भोतो थियो, कि यीशुएरी ज़िन्दगी भी इश्शे नाश भोनेबाले जानी मां बांदी भोए। अस त मौतरे खतरे मां ज़ीतम पन इसेरो नितीजो तुश्शे लेई हमेशारी ज़िन्दगीए।
ते एल्हेरेलेइ कि असन मां तैए विश्वासेरी आत्माए, “ज़ेसेरे बारे मां पवित्रशास्त्रे मां लिखेरूए, कि मीं विश्वास कियो, एल्हेरेलेइ मीं ज़ोवं।” एल्हेरेलेइ अस भी विश्वास केरतम ते ज़ोतम। किजोकि अस ज़ानतम, ज़ैने प्रभु यीशु मुड़दन मरां ज़ींतो कियो, तैए असन भी यीशु मसीह मां हिसेदार सेमझ़तां ज़ींते केरेलो, ते तुसन सेइं साथी अपने सामने हाज़र केरेलो। किजोकि सारे दुख ज़ैना असन पुड़ आन, तुश्शे लेई आन, ताके परमेशरेरो अनुग्रह जादे करां जादे लोकन मसीह कां आने, ते बड़े लोक परमेशरेरू शुक्र केरेले।
एल्हेरेलेइ अस दिलेरी न शारम; अगर इश्शी बेइरीं इन्सानयत नाश भी भोए, त फिरी भी इश्शी एंत्रीं इन्सानयत रोज़ नव्वीं भोती रहतीए। किजोकि इश्शो एक्की पलेरो थोड़ो ज़ेरो दुख बड़ी ते हमेशारी महिमा पैदा केरते, ज़ेसेरी तुलना केन्ची सेइं न केरोए। ते अस त लाहोरी चीज़न नईं पन अलैई चीज़न लहते रहतम, किजोकि लाहोरी चीज़ां थोड़े दिहाड़ां केरे लेई आन, पन अलैई चीज़ां हमेशारे लेई आन।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.