Bhadrawahi Bible
2 कुरिन्थियों 2
मीं अपने मने मां इन थापेरू थियूं, कि फिरी तुसन कां एइतां तुसन दुख न देईं। किजोकि अगर अवं तुसन दुखी केरि, त मीं आनन्द देनेबालो कौन भोल्हो, सिर्फ तैए ज़ै मीं दुखी कियोरोए?
ते मीं ई गल तुसन एल्हेरेलेइ लिखी, कि एरू न भोए, कि मेरे एजने पुड़ ज़ैन सेइं आनन्द मैल्होरो लोड़तो थियो, अवं तैन करां दुखी भोईं; किजोकि मीं तुसन सेब्भन पुड़ इस गल्लरो भरोसोए, कि ज़ै मेरो आनन्दे, तैए तुश्शो सैरी केरो भी आहे। मीं बड़े दुख, ते मनेरे कष्टे सेइं, बड़े ऐंखरन सेइं तुसन चिट्ठी लिखोरी थी, एल्हेरेलेइ नईं, कि तुस दुखी भोथ, पन एल्हेरेलेइ कि तुस तैस बड़े प्यारे ज़ानथ, ज़ै मीं तुसन सेइं आहे।
पापी मैन्हु माफ़ी
ते अगर केन्चे दुखी कियोरोईं, त अवं नईं बल्के (तैस सेइं बड़ी सखती न केरि) किछ-किछ तुस सब दुखी कियोरेथ। एरे मैन्हेरे लेई ई सज़ाह ज़ै विश्वासी ढ्लान मरां बड़ेईं दित्ती, सुद्धी आहे। एल्हेरेलेइ इस करां इन रोड़ूए कि तैसेरो पाप माफ़ केरा; ते तैस तसल्ली देथ, एरू न भोए कि एरो मैन्हु उदैसी मां डुब्बे।
एल्हेरेलेइ अवं तुसन कां बिनती केरताईं, कि तैस अपने प्यारेरू सबूत देथ। किजोकि मीं एल्हेरेलेइ भी लिखोरू थियूं, कि तुसन पेरखी, कि तुस मेरे सब गल्लां मन्नेरे लेई तियार आथ या नईं। ज़ैस तुस माफ़ केरतथ तैस अवं भी माफ़ केरताईं, किजोकि मीं भी ज़ैन किछ माफ़ कियोरूए, अगर कियेरू भोए, त तुश्शे वजाई सेइं मसीहेरे ठैरी भोइतां कियोरूए। कि शैतानेरो असन पुड़ दावो न च़ले, किजोकि अस तैसेरी चालन करां अनज़ान नईं।
त्रोआसे मां पौलुसेरी बेदिली
ते ज़ैखन अवं मसीहेरी खुशखबरी शुनाने त्रोआस नगरे मां अव, ते प्रभुए मेरे लेई अक बत खोल्ली। त मेरे मने मां चैन न भोइ, एल्हेरेलेइ कि मेरे विश्वासी ढ्ला तीतुसे तुश्शे एट्ठां कोई खबर घिन्तां न अव; ते अवं त्रोआसेरे विश्वासी लोकन करां अलग भोइतां अवं वापस मकिदुनिया इलाके मां अव।
मसीह मां ज़ींत ते जोश
परमेशरेरू शुक्र भोए, ज़ै मसीह मां सदा असन ज़ीतरे जशने मां च़लाते, ते अपने ज्ञानेरी खुशबू इश्शे ज़िरिये हर ठैरी फैलाते। किजोकि अस परमेशरे कां मुक्ति मैल्हने बालां, ते नाश भोने बालन कां, दूईयां केरे लेई मसीहेरी खुशबू आम।
केत्रां केरे लेई त मरनेरी मुशक, ते केत्रन जो ज़िन्दगरे लेई ज़िन्दगरी खुशबू, ते इन गल्लां केरे काबल कौने? किजोकि अस तैन केरे ज़ेरे नईं, ज़ैना परमेशरेरू वचन पेइंसां केरे लेई प्रचार केरतन, पन अस मनेरी सच़्च़ैई सेइं, ते परमेशरेरे तरफां परमेशर हाज़र सेमझ़तां मसीह मां ज़ोतम।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.