Bhadrawahi Bible
2 कुरिन्थियों 12
पौलुसेरू दिव्य दर्शन ते कमज़ोरी
अगर घमण्ड केरनू मेरे लेई ठीक नईं, फिरी भी केरनू पेते; अवं प्रभुएरे दित्तोरे दर्शन ते प्रकाशेरे बारे मां ज़ोइलो। अवं मसीह मां च़ेवधे साल पेइले ट्लेइयोवं सुर्गे1 पुड़ नियो जेव, चाए अवं जिसमे मां थियो या जिसमे मरां बेइर, अवं न ज़ैनी सिर्फ परमेशर ज़ानते। अवं फिरी ज़ोताईं, कि ई मैन्हु सुर्गे तगर अकदम नेव जेव (फिरी, अवं न ज़ैनी कि इन जिसमे मां भोवं या अक दर्शन थियूं, सिर्फ परमेशरे ज़ानते), तैड़ी तैनी तैना गल्लां शुनी ज़ैना लफसन मां न ज़ोइयोन, एरी गल्लां ज़ैना मैन्हु ओठन सेइं न ज़ोई बटन। एरे मैन्हु पुड़ त अवं घमण्ड केरेलो, पन अपने कमज़ोरी केरे अलावा, अपने बारे मां घमण्ड न केरि। किजोकि अगर अवं घमण्ड केरनू चैईं भी त बेवकूफ न बेईं, किजोकि अवं सच़ ज़ोइलो; पन अपने आपे एस किसमेरे घमण्डे करां रोकताईं, एरू न भोए, कि ज़ेन्च़रे कोई मीं लहते, या मीं शुन्ते, मीं तैस करां भी बेद्धतां न समझ़े। पन ज़ैना अद्धभूद गल्लां परमेशरे मीं हेरेवरिन तैन केरे वजाई सेइं अवं बड़ो जादे घमण्डी न भोइ गेइ। एल्हेरेलेइ तैनी मीं अक बड़ो मुश्किल मसलो तुसन सेइं बर्ताव केरनेरे लेई दित्तोरोए (मेरी जानी मां अक कंटो)। शैतानेरे एक्की दूते मीं मडनेरो इरादो कियोरोए ते अवं घमण्ड केरने करां रोकोरोईं। इसेरे बारे मां मीं प्रभु कां ट्लाई बार बिनती की, कि मीं करां दूर भोइ गाए। ते तैने मीं सेइं ज़ोवं, “मेरो अनुग्रह तेरे लेई सुधोए; किजोकि मेरी शक्ति कमज़ोरी मां सिद्ध भोतीए।” एल्हेरेलेइ अवं एपनी कमज़ोरी पुड़ घमण्ड केरेलो, कि मसीहेरी सामर्थ मीं पुड़ एंइती राए। इस वजाई सेइं अवं मसीहेरे लेई कमज़ोरन मां, ते बेइज़तन मां, गरीबी मां, सताए गाने मां, ते मुशकलन मां खुशी आईं; किजोकि ज़ैखन अवं कमज़ोर भोताईं, तैखन अवं मसीहेरी शेक्ति सेइं ज़ोरे बालो भोताईं।
कुरिन्थियों केरे लेई पौलुसेरी फिक्र
अवं बेवकूफ त बनो, पन अवं एरू केरनेरे लेई तुसेईं अवं मजबूर कियो, तुसेईं त मेरी बडीयाई कियोरी लोड़ती थी, किजोकि अगर अवं किछ भी नईं, फिरी भी होरे प्रेरित ज़ैना महान आन अवं तैन केरो ज़ेरो रोड़ो आईं। मीं रोड़े प्रेरितेरी पिशान भी तुश्शे दरमियान हर किसमेरे सबर साथी ते निशान ते बड्डां-बड्डां कम्मां, ते चमत्कारेरां कम्मां हिरां। अक गल थी ज़ै मीं तुसन सेइं न की, ज़ै मीं होरि कलीसियान सेइं की, यानी अवं पेइंसां केरे बारे मां तुश्शे लेई बोझ न बनो। कुन इन तुसन घटिया बनाते, एरू केरने सेइं मीं तुश्शे खलाफ गलत कियोरू ई तुश्शी सोच गलते।
हेरा, अवं ट्लेइयोवं बार एजनेरे लेई तियाराईं, ते अवं तुसन करां कोई पेइंसां केरि मांग न रेखेलो। किजोकि अवं तुश्शी जेइदात नईं, बल्के तुसन चाताईं, किजोकि बच्चेइं अम्मा बाजी केरे लेई धन अकोट्ठू न लोड़े कियेरू, पन अम्मा बाजेईं बच्चां केरे लेई कियेरू लोड़े। अवं तुश्शी लेई बड़ी खुशी सेइं खर्च़ केरेलो, बल्के अवं अपनु सब किछ तुसन देइलो, अवं तुसन सेइं बड़ो प्यार केरताईं पन एरू लगते कि तुस मीं सेइं घट प्यार केरतथ। तुसन मरां किछ मनतन कि मीं तुसन पुड़ भार नईं छ़डोरो, पन किछ होरे सोचतन कि अवं च़लाक आईं ते मीं तुसन पूरे तरीके सेइं धोखो दित्तोरोए, ज़ैन कि झूठे। मीं अपने लेई तुसन करां पेइंसे नेनेरे लेई तीतुस या होरो कोई इस्तेमाल नईं कियोरो। मीं तीतुस समझ़ेइतां तैस साथी तै ढ्ला भेज़ो, त कुन तीतुसे धोखे सेइं किछ नेव? कुन अस एक्की मकसदे सेइं न च़ले? कुन इश्शां कम्मां अक्कां ज़ेरां नईं।
हे ट्लारव, तुस हेजू तगर इन समझ़तथ कि अस तुश्शे सामने अपनो बचाव लगोरेम केरने, अस त परमेशरे हाज़र सेमझ़तां मसीह मां ज़ोतम, ते सब गल्लां एल्हेरेलेइ ज़ोतम कि तुसन विश्वासे मां मज़बूत केरने लगोरेम। किजोकि मीं डरे, कि एरू न भोए, कि अवं एज्जी ते ज़ेन्च़रे अवं चाताईं, तेन्च़रे तुस न भोथ; ते मीं भी ज़ेन्च़रे तुस मीं चातथ तेरे लहथ, कि तुसन मां लड़ैई, गर्म सुभाव, सरक, खलाफत, जलन, चोगली, अभिमान ते फसाद भोन। कि एरू न भोए कि ज़ैखन अवं तुसन कां दुबारां एज्जी, त मेरो परमेशर मीं छिथाए। ते मीं दुख केरनो पे, किजोकि तुसन मरां बड़ेईं अपने पुराने पाप नईं शारोरे। ते तैस गन्दे कम्मे, ते बदमाशी, ते लुचपने सेइं, ज़ै तैनेईं कियो, मन न फिराव।
Source notes (1)
- Footnote ट्लेइयोवं सुर्गे: मतलब सेभन बा सुर्गे मां ज़ैड़ी परमेशर रहते।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.