Bhadrawahi Bible
1 थिस्सलुनीकियों 5
यीशु दुबारां एजनोए तियार भोथ
हे ढ्लाव ते बेइनव, इसेरी ज़रूरत नईं, कि वक्तन ते कालां केरे बारे ज़ेइस प्रभु यीशु वापस एज्जेलो तुसन किछ लिखू गाए। किजोकि तुस एप्पू रोड़े च़ारे ज़ानतथ, ते ज़ेन्च़रे च़ोर राती एइते, तेन्च़रे प्रभुएरू दुबारां एजनू भोल्हु। ज़ैखन लोक ज़ोले, “कि शान्तिए, ते कोई डर नईं,” त तैन पुड़ अकदम विनाश एजनोए, ज़ेन्च़रे दोज़ींती पुड़ तकलीफ; ते तैना तैस मुसीबती करां न बच़ेले। पन हे ढ्लाव ते बेइनव, तुस त (आत्मिक) आंधरे मां नईं, कि तै दिहाड़ी तुसन पुड़ च़ोरेरी ज़ेरि एज्जे। किजोकि तुस सब लौअरे बच्चे आथ, ते दीसरे बच्चे आथ, अस न रातरेम, न आंधारेरेम। एल्हेरेलेइ अस होरि केरे ज़ेरे झ़ुलोरे न रहम, पन बींझ़े रहम ते हुशार रहम। किजोकि ज़ैना झ़ुलोरे रातन, तैना राती झ़ुलतन, ते ज़ैना नशे मां रातन, तैना राती नशे मां भोतन। पन अस त दीसेरेम, विश्वास ते प्यार लेइतां कि इश्शी हिफाज़त भोए ज़ेन्च़रे झिलम सिपेहेरी हिफाज़त केरतीए, ते मुक्तरे उमीद लेइतां ज़ेन्च़रे सिपाही टोप लाते, खबरदार रहम। किजोकि परमेशरे अस सज़ाहरे ते क्रोधेरे लेई नईं, पन एल्हेरेलेइ च़ुनोरेम कि अस अपने प्रभु यीशु मसीहेरे ज़िरिये सेइं मुक्ति हासिल केरम। यीशु मसीह इश्शे लेई एल्हेरेलेइ मरो, कि अस चाए बींझ़े भोम, या झ़ुलोरे भोम, सब मिलतां तैस सेइं साथी ज़ींम। एल्हेरेलेइ एक्की होरि हिम्मत देथ, ते एक्की होरेरी तरक्की भोनेरी ज़िरियो बना, लगातार, तुस एरू केरतथ भी।
कलीसियाई शिक्षा
ते ढ्लाव, अस तुसन सेइं बिनती केरतम, कि ज़ैना तुश्शे लेई बड़ी मेहनत केरतन, ते प्रभु मां तुश्शी अगवाई केरनेबालेन, ते ज़ैना तुसन सलाह देतन, तैन केरि आदर केरा। ते ज़ैना कम्मां तैनेईं तुश्शे लेई कियां तैन केरे वजाई सेइं तैन केरि आदर ते तैन सेइं बड़ो प्यार केरा, ते एप्पू मांमेइं मेल मिलापे सेइं राथ। हे ढ्लाव ते बेइनव, अस तुसन कां मिन्नत केरतम, कि ज़ैना आलसी आन, तैन खबरदार केरा, ज़ैन केरि हिम्मत घटे तैन हिम्मत देथ, तैन केरि मद्दत केरा ज़ैना (आत्मिकता) मां कमज़ोरन, सेब्भी केरे लेई बरदाशत केरनू हिराथ। इस गल्लरू ध्यान रखा, कि कोई कोन्ची सेइं बुरैइारे बदले बुराई न केरे, पन सदा भलियाई केरनेरे लेई तियार राथ, एप्पू मांमेइं ते सेब्भन सेइं भी भलियाई केरनेरी कोशिश केरा। सदा खुशी राथ। लगातार प्राथना केरते राथ। हर हाले मां शुक्र केरा, किजोकि तुश्शे लेई मसीह यीशु मां परमेशरेरी ईए मर्ज़ीए। पवित्र आत्मारे कम्मन ज़ैना लोकां केरे ज़िन्दगी मां भोतन तैन न रोका। भविष्यिवैनी केरो इन्कार न केरा। सब गल्लां परखा, ज़ैना रोड़ी भोन तैन अपनाथ। सेब्भी किसमेरी बुरैई करां बच़ोरे राथ।
आशिर्वाद
शान्ति देनेबालो परमेशरे एप्पू तुसन पूरे तरीके सेइं पवित्र केरे; ते तुश्शी आत्मा ते प्राण ते जिसम इश्शे प्रभु यीशु मसीहेरे दुबारां एजने तगर पूरे, ते बेइलज़ाम ते सुरक्षित रान। तुश्शो कुजाने बालो वफादारे, तै एरू केरेलो।
हे ढ्लाव, इश्शे लेई प्राथना केरा।
सेब्भी विश्वासी ढ्लान मसीहेरे प्यारे सेइं नमस्कार केरा।
अवं तुसन प्रभुएरी कसम देताईं, कि ई चिट्ठी सेब्भी विश्वासी ढ्लान पेढ़तां शुनाई गाए।
इश्शे प्रभु यीशु मसीहेरो अनुग्रह तुसन पुड़ भोतो राए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.