1 थिस्सलुनीकियों 3

तीमुथियुस भेज़नो

1एल्हेरेलेइ ज़ैखन असेईं जादे न बेलगी बटु त असेईं इन ठहराव कि अस एथेंस नगरे मां अकैल्‍ले रेइ गाम। 2ते असेईं तीमुथियुस ज़ै मसीहेरे खुशखबरी मां इश्शो ढ्लाए, ते परमेशरेरो सेवके, एल्हेरेलेइ तुसन कां भेज़ो, कि तै तुसन विश्वासे मां मज़बूत केरे ते तुश्शी हिम्मत बधाए। 3कि कोई इन दुखां केरे वजाई सेइं न घबराए, किजोकि तुस एप्पू रोड़े च़ारे ज़ानतथ परमेशरे फैसलो कियोरोए, कि अस सताए गानेम। 4किजोकि पेइले भी, ज़ैखन अस तुसन कां थिये, त तुसन सेइं ज़ोते थिये, कि अस सताए गानेम, ते तुस ज़ानतथ एरू भोवं भी। 5एल्हेरेलेइ ज़ैखन मीं करां होरू न बेलगोव, त तुश्शे विश्वासेरो हाल ज़ान्नेरे लेई तीमुथियुस भेज़ो, किजोकि अवं डरेरो थियो कि एरू न भोए, कि अज़माने बाले (शैताने) तुस अज़माए त न, कि इश्शी मेहनत बेकार त न भोइ।

तीमुथियुसेरे ज़िरिये खबर मैल्ही

6पन तीमुथियुसे ज़ै तुसन करां इश्शे इड़ी अव, ते तुश्शे विश्वासेरे ते प्यारेरे बारे मां खुशखबरी शुनाई। ते ई गल भी शुनाई, कि तुस सदा प्यारे सेइं असन याद केरतथ, ते असन हेरनेरी इच्छा रखतथ, ज़ेन्च़रे अस भी तुसन हेरनेरी इच्छा रखतम। 7एल्हेरेलेइ हे ढ्लाव, अपनि सारी तंगी, ते मुसीबतन मां तुश्शे विश्वासे सेइं असन शान्ति मैल्ही। 8तुश्शो प्रभु पुड़ मज़बूत विश्वासे इश्शे लेई अक नव्वें ज़िन्दगरे सांसेरो ज़ेरोए। 9ते ज़ेरो आनन्द असन तुश्शे वजाई सेइं अपने परमेशरेरे सामने, तैसेरे बदले मां अस कोस तरीके सेइं परमेशरेरू शुक्र केरम! 10अस रात दिहाड़ी बड़ी प्राथना केरते रहतम, कि तुसन सेइं दुबारां मिलम, ते तुश्शी मद्दत केरम कि तुस होरि जादे मज़बूती सेइं प्रभु यीशु पुड़ विश्वास केरथ।

11ते अस प्राथना केरतम कि इश्शो बाजी परमेशर ते इश्शो प्रभु यीशु, बत खोल्‍ले कि अस तुसन कां एज्जी बटम। 12ते प्रभु एरू केरे, कि ज़ेन्च़रे अस तुसन सेइं प्यार केरतम; तेन्च़रे तुश्शो प्यार एप्पू मांमेइं, ते सेब्भी मैन्हन सेइं बधे, ते तरक्‍की केरतो राए। 13ताके तै तुश्शे मन्न मज़बूत केरे, कि ज़ैखन इश्शो प्रभु यीशु अपने सब पवित्र लोकन सेइं साथी एज्जे, त तै इश्शे बाजी परमेशरेरे सामने तुश्शे मन्न पवित्रता मां बेइलज़ाम ठहरालो।