Bhadrawahi Bible
1 शमूएल 5
पलिश्ती लोकां केरे मुल्खे मां करारेरो सन्दूख
पलिश्ती लोकेईं परमेशरेरो सन्दूख एबेनेजेर नगरे मरां थुसोड़तां अश्दोद नगरे मां पुज़व; फिरी पलिश्ती लोकेईं परमेशरेरो सन्दूख नेइतां तैन केरे दागोन देबतेरे मन्दरे मां पुज़ेइतां दागोनेरे मूरती कां रख्खो। होरसां झ़ेझ़ां अश्दोदी लोकेईं उठतां कुन हेरू, कि दागोन देबतेरी मूरती यहोवारे सन्दूखेरे सामने दोग्गेरे भारे ज़मीनी पुड़ बिछ़ड़ोरीए। तैखन तैनेईं दागोनेरी मूरती छ़ुइतां तैसेरे जगाई पुड़ फिरी खड़ी की। फिरी होरसां झ़ेझ़ां ज़ैखन तैना खड़े उठे, तैखन कुन हेरू, कि दागोन देबतेरी मूरती यहोवारे सन्दूखेरे सामने क्रोड़रे भारे ज़मीनी पुड़ बिछ़ड़ोरीए; ते दागोनेरी क्रोड़ी ते दूईये पेखड़ी खुरनी पुड़ केटोरी मैल्ही; एन्च़रां सेइं दागोनेरे मूरतरू सिर्फ रिगल रेई जेवरूए। एस्से वजाई सेइं अज़्ज़ेरे दिहाड़े तगर भी दागोन देबतेरे पुजारी ते ज़ेत्रे दागोनेरे मन्दरे मां गातन, तैना अश्दोद नगरे मां दागोनेरी खुरनी पुड़ पव न रखन।
तैखन यहोवा अश्दोदी लोकन बड़ी सज़ाह देने लगो, ते तै अश्दोद नगर ते तैसेरे आसे-पासेरे इलाकन मां रानेबाले लोकन गिलटी केरे ज़िरिये दुखी केरने लगो। ऐह हाल हेरतां अश्दोद नगरेरे लोकेईं ज़ोवं, “इस्राएली लोकां केरे देबतेरो सन्दूख असन मां न लोड़े राहोरो; किजोकि असन ते इश्शे देबते दागोने बड़ी सज़ाह लगोरो देने।” तैखन तैनेईं पलिश्ती लोकां केरे पंच़े राज़न जो समाद भेज़ो, ते तैन पुछ़ू, “अस इस्राएली केरे देबतेरे सन्दूखे सेइं कुन केरम?” तैनेईं जुवाब दित्तो, “इस्राएली केरे देबतेरो सन्दूख घुमेइतां गत नगरे मां पुज़व गाए।” तैखन तैनेईं इस्राएली केरे परमेशरेरो सन्दूख घुमेइतां गत नगरे मां पुज़व। ज़ैखन तैना तैस घुमेइतां तैड़ी पुज़्ज़े, त एरू भोवं कि यहोवारो क्रोध तैस नगरेरे लोकां केरे खलाफ भड़को; ते तैने निकड़े करां बड्डे तैस गत नगरे मां सारे लोक गिलटन सेइं बिमार किये, तैस नगरे मां बड़ी खलबली भोइ। तैखन तैनेईं परमेशरेरो सन्दूख पलिश्ती केरे होरि एक्रोन नगरे जो भेज़ो ते ज़ेरो परमेशरेरो सन्दूख एक्रोन नगरे मां पुज़्ज़ो तेरहे तैट्ठेरे लोक एन ज़ोइतां चिन्डां मैरतां लेरां देने लगे, “इस्राएली लोकां केरे देबतेरो सन्दूख घुमेइतां असन कां एल्हेरेलेइ पुज़व जेवरो, कि अस ते इश्शे लोक मारे गाम।” तैखन तैनेईं पलिश्ती लोकां केरे पंच़े राज़े अकोट्ठे किये, ते तैन सेइं ज़ोवं, “इस्राएली लोकां केरे देबतेरो सन्दूख भेज़ो गाए, कि तै अपने जगाई पुड़ वापस गाए, ते असन ते इश्शे लोकन मैरी न सके।” तैस नगरेरे लोकन मां त मौतरे डरेरी खलबली मच़ोरी थी, ते परमेशरेरो क्रोध तैन केरे खलाफ भड़कोरो थियो। एक्रोन नगरेरे किछ लोक मरे ते ज़ैना न थिये मरोरे तैना भी गिलटेइं सेइं बिमार भोए; ते एक्रोन नगरेरे लोक अपने देबतन कां मद्दतरे लेई बिनती केरने लगे।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.