Bhadrawahi Bible
1 शमूएल 3
शमूएले परमेशरेरू दर्शन
तैन दिहाड़न मां तैन मट्ठू शमूएल एली याजकेरे अधीन रेइतां यहोवारी सेवा केरतू थियूं। तैन दिहाड़न मां यहोवारू वचन बड़ू घट शुनोतू थियूं; ते दर्शन घट मैलतू थियूं। ते एक्की राती ज़ैखन एली अपने कमरे मां झ़ुलोरो थियो। (तैसेरी नज़र त कमज़ोर भोने लगोरी थी ते तैस लेइहोतू न थियूं) ते शमूएल यहोवारे भवने मां ज़ैड़ी परमेशरेरो सन्दूख थियो झ़ुलोरो थियो, ते परमेशरेरो दीयो हेजू तगर हिशोरो न थियो। तैखन यहोवा शमूएले जो तैसेरू नवं घिन्तां हक दित्ती; ते तैनी जुवाब दित्तो, “कुन हुक्मे!” तैखन तैनी एली कां गेइतां देवड़तां पुछ़ू, “कुन हुक्मे, तीं त मींजो हक दित्ती।” तैनी ज़ोवं, “मीं हक नईं दित्तोरी; गा फिरी झ़ुल्ल।” त तै गेइतां झ़ुल्ली जेव। तैखन यहोवा फिरी हक देइतां ज़ोवं, “हे शमूएल!” शमूएल उठतां एली कां गेइतां ज़ोने लगो, “कुन हुक्मे, तीं मींजो हक दित्ती।” तैनी ज़ोवं, “हे मेरे मट्ठां, मीं हक नईं दित्तोरी; गा फिरी झ़ुल्ल।” तैस मौके तगर शमूएल यहोवा न थियो पिशानतो, ते न यहोवारू वचन तैस पुड़ बांदू भोवरू थियूं। फिरी ट्लेइयोवं बार यहोवा शमूएले जो हक दित्ती। तैनी फिरी उठतां एली कां गेइतां ज़ोवं, “कुन हुक्मे, तीं मींजो हक दित्ती।” तैखन एली याजके समझ़ू कि एस मट्ठे जो यहोवा हक दित्तोरिए। एल्हेरेलेइ एली याजके शमूएले सेइं ज़ोवं, “गा फिरी झ़ुल्ल; ते अगर तै फिरी हक देलो, त तू ज़ोइयां, ‘हे यहोवा, ज़ो, किजोकि तेरो दास शुन्ने लगोरोए।’” तैखन शमूएल एपनी जगाई पुड़ गेइतां झ़ुल्ली जेव।
तैखन यहोवा एइतां खड़ो भोव, ते पेइलेरू ज़ेरू ज़ोवं, “शमूएल! शमूएल!” तैखन शमूएले ज़ोवं, “ज़ो, किजोकि तेरो दास शुनी राहोरोए।” यहोवा शमूएले सेइं ज़ोवं, “शुन, अवं इस्राएले मां अक एरू कम केरनेबालोईं, ज़ैस शुन्तां सारे लोक डरेले। तैखन अवं एलीएरे खलाफ तैन सब किछ पूरू केरेलो ज़ैन मीं तैसेरे घरानेरे बारे मां ज़ोवरू थियूं, तैन शुरू करां आखरी तगर पूरू केरेलो। किजोकि मीं त तैस इन ज़ोवरूए, कि अवं तैस परमेशरेरी निन्दा केरनेरे पापेरी सज़ाह ज़ैस तै ज़ानते हमेशारे लेई तैसेरे घरेरो न्याय केरेलो, किजोकि तैसेरां मट्ठां एप्पु लानती भेवरन, ते तैनी तैना न रोकां। एस वजाई सेइं मीं एली याजकेरे घरानेरे बारे मां कसम खेवरीए, कि एलीएरे घरानेरे अधर्मेरी सज़ाह न त मेलबेलि सेइं ते न अन्नबेलि सेइं माफ़ भोल्ही।”
शमूएल झ़ेझ़ां तगर झ़ुलोरो राव; तैखन तैनी यहोवारे घरेरू दार खोल्लू। ते शमूएल एली सेइं दर्शनेरी गल्लां ज़ोने करां डरो। पन एली याजके शमूएल कुजेइतां ज़ोवं, “हे मेरे मट्ठां, शमूएल।” तैनी ज़ोवं, “कुन हुक्मे।” तैखन तैनी पुछ़ू, “तै को ज़ेरि गल्ले ज़ै यहोवा तीं सेइं ज़ोवरीए? तैस मीं करां न छ़ुपा। ज़ैन किछ तैनी तीं सेइं ज़ोवरूए अगर तू तैस मरां किछ भी छ़ुपास, त परमेशर तीं सेइं सखते करां सखत बर्ताव केरे।” तैखन शमूएले तैस सैरी गल्लां ज़ोई, ते किछ भी छ़ुपेइतां न रख्खू। तैनी ज़ोवं, “तै त यहोवाए; ज़ैन किछ तैस रोड़ू लग्गे तैन्ने केरे।”
ते शमूएल बेडोतो जेव, ते यहोवा तैस सेइं साथी राव, ते परमेशरे शमूएलेरी कोई भी गल बेफल भोने न दित्ती। ते उत्तरेरे दान नगरे करां लेइतां दक्षिणेरे बेर्शेबा नगरे तगर रानेबाले सारे इस्राएली लोकन पतो लग्गो कि शमूएल यहोवारो नबी भोनेरे लेई च़ुनो जेवरोए।1 ते यहोवा शमूएले शीलो नगरे मां फिरी दर्शन दित्तू, किजोकि यहोवा एप्पु शमूएले जो शीलो नगरे मां मिलापे बाले तेम्बु मरां सन्देश दित्तोरो थियो।
Source notes (1)
- Cross-reference प्रेरित. 13:20.
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.