Bhadrawahi Bible
1 शमूएल 11
अम्मोनी लोकन पुड़ शाऊलेरी ज़ींत
लगभग एक्की महीनेरां बाद अम्मोनी नाहाश राज़े चढ़ाई केरतां गिलाद प्रदेशेरे याबेश नगरेरे खलाफ डेरे लाए; ते याबेशेरे सैरी लोकेईं नाहाशे सेइं ज़ोवं, “असन सेइं लड़ाई न केरनेरो करार केर, ते अस तेरे अधीन रहमेले।” अम्मोनी लोकां केरे नाहाश राज़े तैन सेइं ज़ोवं, “अवं तुसन सेइं करार इस शर्ती पुड़ केरेलो, कि अवं तुश्शी सेभी केरि देइनी अछ़ केढी कि इस सेइं सारे इस्राएलेरी बदनामी भोए।” याबेश नगरेरे बुज़ुर्ग लोकेईं तैस सेइं ज़ोवं, “असन सत दिहाड़ां केरो मौको दे तांतगर अस सारे इस्राएल मुल्खे मां दूत भेज़मेले। ते अगर असन कोई बच़ानेबालो न मैल्हो, त अस तीं कां एजमेले।” दूतेइं शाऊलेरे गिबा नगरे मां एइतां लोकन ई सन्देश शुनाव, ते सारे लोक चिन्डां मैरी-मैरी लेरां देने लगे।
शाऊल दांतन पत्ती-पत्ती उडारे मरां च़ेलि एवरो थियो; ते शाऊले पुछ़ू, “लोकन कुन भोवं कि तैना लेरां देने लगोरेन?” तैनेईं याबेशेरे लोकां केरो सन्देश तैस शुनाव। ई सन्देश शुन्ते शाऊले पुड़ परमेशरेरो आत्मा अकदम अव, ते तैस बड़ी सरक अई। ते तैनी अपने दूई दांत नेइतां तैन केरे टुक्ड़े-टुक्ड़े कट्टे, ते एन ज़ोइतां दूतां केरे ज़िरिये सारे इस्राएल मुल्खे मां समाद भेज़ो, “ज़ै कोई एइतां शाऊल ते शमूएले पत्ती न एज्जेलो तैसेरे दांतन सेइं एरू कियूं गालू।” तैखन यहोवारो डर लोकन मां एरहो पेव कि तैना अक मन भोइतां च़ले आए। ज़ैखन तैनी तैना बेजेक नगरे मां गने, ते इस्राएली मैन्हु 300000, ते यहूदी मैन्हु 30000 भोए। ते तैनेईं तैन दूतन सेइं ज़ैना एवरे थिये ज़ोवं, “तुस गिलादे मां याबेशेरे लोकन सेइं इन ज़ोथ, कालां दुपहर भोनेरे मौके तगर तुसन छुटकारो मैल्हेलो।” तैखन दूतेइं गेइतां याबेशेरे लोकन बिस्तार दित्तो, ते तैना खुशी भोए। तैखन याबेशेरे लोकेईं नाहाश राज़े सेइं ज़ोवं, “कालां अस तुसन कां एजमेले, ते ज़ैन किछ तुसन रोड़ू लग्गे तैन्ने असन सेइं केरथ।” दूइयोवं दिहाड़े शाऊले सेना केरे ट्लाई जथे बनाए; ते तैनेईं राती आखरी पहरे डेरन मां गेइतां अम्मोनी सिपाही मारे; ते दुपहरन तगर एरे मारते राए कि ज़ैना बेंच़ी जे तैना इड़ी तगर तितर-बितर भोए कि दूई मैन्हु भी एक्की साथी कोन्च न राए।
लड़ाई खतम भोनेरां बाद इस्राएली लोक शमूएले सेइं ज़ोने लगे, “ज़ैन मैन्हेइं ज़ोवरू थियूं, ‘कुन शाऊल असन पुड़ राज़ केरेलो?’ तैन्न आनां कि असां तैन मैरी छ़डम।” पन शाऊले ज़ोवं, “अज़्ज़ेरे दिहाड़े कोई मारो न गालो; किजोकि अज़ यहोवाए इस्राएली लोकन दुश्मन्न करां छुटकारो दित्तोरोए।”
तैखन शमूएले इस्राएली लोकन सेइं ज़ोवं, “एज्जा, अस गिलगाल नगरे जो च़लम, ते तैड़ी राज़ फिरी मज़बूत केरम।” एल्हेरेलेइ सारे लोक गिलगाल नगरे जो च़ले, ते तैड़ी तैनेईं गिलगाल नगरे मां यहोवारे सामने शाऊल राज़ो बनाव; ते तैड़ी तैनेईं यहोवा जो मेलबलि च़ाढ़ी; ते तैट्ठी शाऊल ते सारे इस्राएली लोकेईं बड़ी खुशी सेइं जशन मनाव।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.