Bhadrawahi Bible
1 पतरस 4
बेदलोरी ज़िन्दगी
एल्हेरेलेइ ज़ैखन मसीहे जिसमे मां भोइतां दुख झ़ैल्लो, त ज़ेन्च़रे तैसेरो सुभाव थियो तेन्च़रे तुस भी दुख झ़ैल्लनेरे लेई तियार भोथ। किजोकि अगर तुस मसीहेरे लेई दुख झ़ैल्लनो चातथ त तुसेईं पाप न केरनेरो फैसलो कियो। नितीजो ई भोल्हो, कि तै मैन्हु बाकी अपनि ज़िन्दगी मैन्हु केरे पापी खुवैइशां केरे मुताबिक इस दुनियाई मां न ज़ीले पन तै तैन्ने केरेलो ज़ैन परमेशर तैस करां करानो चाते। किजोकि बीतोरे वक्ते मां तुस गैर विश्वासी लोकां केरे ज़ेरे आनन्द केरने मां वक्त बर्बाद केरते थिये, ते तुस अपनि ज़िन्दगी एश केरने मां, बुरी खुवैइशन मां, ते तैन केरे तिहारन मां, शराब पीने मां ते नाच़े मां, ते तैन केरि मूरती केरि पूज़ाई मां ज़ैन सेइं परमेशर नफरत केरते बीताते थिये। एल्हेरेलेइ तुश्शे पुराने दोस्त हैरान भोतन, ज़ैखन तुस तैन केरे बुरी गल्लन मां ज़ैना तैन केरतन शामल न भोथ, तांए तैना तुश्शे बारे बुरू-भलू ज़ोतन। पन एक्की दिहाड़े तैनेईं ज़रूर परमेशरेरे सामने न्यायेरे लेई खड़ू भोनू पेनूए। ते परमेशर तैन मरां हर एक्की ज़ैन तैनेईं इस धेरतली पुड़ कियोरू तैसेरे बारे मां पुछ़ेलो। परमेशर ज़ींते ते मुड़दां केरो न्याय केरेलो। ईए वजाए कि मुड़दन भी मसीहेरे बारे मां खुशखबरी शुनाई। तैन केरे जिसम भी एन्च़रे मरे ज़ेन्च़रे सारे मैन्हु मरतन। पन हुनी तैना आत्माई मां परमेशरेरे सेइं साथी हमेशा ज़ीले।
परमेशरेरे भले भण्डारी
सेब्भी गल्लां केरो अन्त जल्दी भोने बालोए, एल्हेरेलेइ साफ तरीके सेइं सोचा ते अपने आपे पुड़ कैबू केरा ताके तुस प्राथना केरि सकतथ। सेब्भन करां रोड़ी गल ईए, कि एक्की होरि सेइं ईमानदैरी सेइं प्यार केरा, किजोकि अगर तुस लोकन सेइं प्यार केरेले त तुस तैन केरि पाप भी माफ़ केरनेरे लेई तियार भोल्हे। ज़ैखन लोक तुश्शे घरन मां एज्जन त बगैर कोन्ची शिकायतां तैन केरू सुवागत केरा। हर एक्की परमेशरे करां वरदान मैल्होरूए ते तैनी तैन वरदान होरि केरि मद्दत केरनेरे लेई इस्तेमाल कियोरू लोड़े। तैनेईं तैना काई किसमां केरां वरदानां इस्तेमाल कियोरां लोड़न ज़ैना परमेशरेरे अपने अनुग्रहे सेइं दित्तोरन। अगर तुसन कां प्रचार केरनेरू वरदाने त तुसेईं परमेशरेरू वचन प्रचार कियोरू लोड़े। अगर तुसन कां होरि लोकां केरि मद्दत केरनेरू वरदाने त तैस शेक्ति सेइं केरा ज़ै परमेशरे तुसन दित्तोरीए। फिरी सब किछ ज़ैन तुस केरेले तैस सेइं यीशु मसीहेरे ज़िरिये परमेशरेरी महिमा भोल्ही। सारी महिमा ते शक्ति हमेशा-हमेशा तैसेरीए। आमीन।
मसीहेरे दुखन मां शामल भोनू
ट्लारव, ज़ैना दुख तुस झ़ैल्लने लगोरेथ तैन केरे बारे मां हैरान न भोथ किजोकि तुस मसीहेरे आथ। पन इना चीज़ां इन हिरानेरे लेई भोनेरे लेगोरिन कि तुस सच़्च़े परमेशरे पुड़ विश्वास केरतथ की नईं। एल्हेरेलेइ इन न सोचा कि तुसन सेइं नव्वीं गल भोने लगोरीए। पन इसेरे बारे मां खुश भोथ, कि ज़ैना दुख मसीहे मैल्हे तुस भी तैन मां शामल भोए। एल्हेरेलेइ ज़ैखन मसीह दुबारां एज्जेलो त सेब्भी लोकन पुड़ अपनि महिमा बांदी केरेलो, त तुस बड़े खुश भोल्हे। फिरी अगर मसीहेरे नंव्वेरे लेई तुश्शी तुहीन भोतीए, त तुस धन आथ। किजोकि परमेशरेरे महिमा बालो आत्मा तुसन मां रहते। तुसन मरां कोई मैन्हु खूनी ते च़ोर, या कुकर्मी भोने, या होरि केरे कम्मन मां दखल देनेरे वजाई सेइं दुख न झ़ैल्ले। पन अगर मसीही भोने सेइं दुख झ़ैल्लथ त शरमाए न, पन इस गल्लरे लेई परमेशरेरी बडीयाई केरे किजोकि तुस विश्वासी आथ। किजोकि न्यायेरो वक्त एवरोए, ते तै इश्शो विश्वासी लोकां केरो न्याय पेइलो केरेलो, तैन डरानेबैली गल्लां केरे बारे मां सोचा ज़ैना तैन सेइं भोनिन, ज़ैना खुशखेबरी पुड़ विश्वास न केरन ज़ै परमेशरेरे तरफां एइतीए। ज़ेन्च़रे पवित्रशास्त्र ज़ोते,
“अगर धर्मी मैन्हेरे लेई मुक्ति हासिल केरनि बड़ी मुश्किले, त बुरे ते पापी मैन्हु पक्के नाश भोनेन!”
एल्हेरेलेइ ज़ैना परमेशरेरी मेर्ज़रे मुताबिक दुख झ़ैल्लतन, तैनेईं तैस पुड़ लगातार भरोसो कियोरो लोड़े ज़ैने तैना बनाए। परमेशर हमेशा तैन केरते ज़ैन केरनेरो वाधो तैनी कियोरोए ते तै लगातार तैन केरेलो ज़ैन रोड़ूए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.