1 पतरस 2

ज़ींतो घोड़ ते पवित्र लोक

1एल्हेरेलेइ सब किसमेरो बुरो सलूख केरनो शारा। होरन धोखो न देथ, पाखंड न केरा। ते होरन सेइं जलन न केरा। होरि केरे बारे मां बुरी गल्‍लां न ज़ोथ। 2ज़ेन्च़रे नंव्वे ज़र्मोरे बच्‍चे अपने अम्मरे खालिस दुद्धेरी इच्छा रखतन, तेन्च़रे तुस भी परमेशरेरू वचन शिखनेरे लेई इच्छा रखा ज़ैस सेइं तुस आत्मिक तरीके सेइं मज़बूत बनेले। फिरी आखरी मां परमेशर तुसन दुनियारी बुरी चीज़न करां पूरे तरीके सेइं बच़ालो। 3ज़ेन्च़रे पवित्रशास्त्र ज़ोते, “तुसेईं तजरबे सेइं ज़ानेरूए कि प्रभु भलोए।”

4-5तुस प्रभु यीशु कां एवरेथ। तै खास घोड़ेरे ज़ेरोए ज़ै घरेरे बुनियादी मां लगोरोए, पन तै ज़ींतो घोड़े। बड़े लोकेईं तै रद कियो, पन परमेशरे तै च़ुनो ते बड़ो कीमती मन्नो। ज़ेन्च़रे लोक घोड़न सेइं घर बनातन, तेन्च़रे परमेशर तुसन एक्‍की एरे झुण्डे मां शामल भोनेरी वजा बनाने लगोरोए, ज़ैस मां परमेशरेरो आत्मा रहते, ताके तुस ज़ैन यीशु मसीहे इश्शे लेई कियोरूए तैसेरे वजाई सेइं याजक बना, ज़ैना बलिदाना च़ाढ़तन, तुस भी तैन केरां ज़ेरां रोड़ां कम्मां केरथ ज़ैन सेइं परमेशर खुश भोते। 6एल्हेरेलेइ ज़ेन्च़रे परमेशर पवित्रशास्त्रे मां ज़ोते,

“तक्‍का, अवं अक मैन्हु सिय्योन नगरे मां रखने लगोरोईं।

ज़ै कूनेरो खास ते च़ुनोरो घोड़े,

तै अक कीमती घोड़ेरो ज़ेरोए ज़ै कूनेरो घोड़े।

ते ज़ै तैस पुड़ विश्वास केरेलो तै कोन्ची भी तरीके सेइं शरमिन्दो न भोल्हो।”

7तुस ज़ैना यीशु मसीह पुड़ विश्वास केरतथ ई घोड़ तुश्शे लेई बड़ो कीमतीए। पन पवित्रशास्त्र तैन लोकां केरे बारे मां ज़ोते ज़ैना विश्वास न केरन,

“ज़ै घोड़ राज़ मिस्त्रेईं इस्तेमाल केरनो न चाव,

तैए घरेरे कूनेरो खास घोड़ भोव,”

8ते पवित्रशास्त्र फिरी ज़ोते,

“ई घोड़ लोकां केरे बिछ़ड़नेरी वजा भोल्हो।

ई अक चट्टाने ज़ै तैन बिछ़ोड़ेली।”

तैना एन्च़रे बिछ़ड़तन किजोकि तैना परमेशरेरे सन्देश मन्ने करां इन्कार केरतन। तैन सेइं इन भोनेरे लेई परमेशर इन थापेरू थियूं। 9पन तुस तैन केरे ज़ेरे नईं किजोकि तुस परमेशरेरे च़ुनोरे लोक आथ, परमेशर ज़ै राज़ोए, तुस तैसेरे याजक आथ, तुस एरे लोक आथ ज़ैनेईं अपनो आप परमेशरे सौंफोरोए, ते परमेशरेरे अपने लोक आथ। तैने तुस आंधरे मरां बड़े लौई मां कुजेवरेथ, ताके तुस परमेशरेरे महान कम्मां केरे बारे मां एलान केरथ। 10तुश्शे बारे मां होशे नेबे ज़ैन ज़ोवरू तैन सच़्च़े,

“तुस पेइले परमेशरेरे लोक न थिये पन हुनी तुस परमेशरेरे लोक आथ।

तुस पुड़ पेइले परमेशरेरी दयाई न थिये ज़ानते पन हुनी ज़ानतथ,

किजोकि तैने तुसन पुड़ अपनि दया हिरेवरीए।”

मसीह ज़िमेदारी

11हे ट्लारव, तुस इस दुनियाई मां परदेशी ते मुसाफरां केरे ज़ेरेथ, अवं तुसन खबरदार केरताईं, कि तुस जिसमेरी सैरी पापी खुवैइशन करां दूर राथ, किजोकि तैना हमेशा तुश्शे आत्मारे खलाफ लेड़तिन। 12ज़ैना लोक परमेशरे पुड़ विश्वास न केरन तैना तुश्शे च़ेवरे पासन रहतन, तैना ज़ोले तुस गलत केरने लगोरेथ। तुस एरी रोड़ी ज़िन्दगी ज़ीथ कि लोक तुश्शां रोड़ां कम्मां हेरतां तैस दिहाड़े ज़ेइस यीशु मसीह दुबारां एजनो परमेशरेरी बडीयाई केरेले।

परमेशरेरे दास

13प्रभुएरे इज़्ज़तरे खातर, मैन्हु केरे ठहरावरे हर एक्‍की अधिकारेरे अधीन राथ, किजोकि ई प्रभुएरी इच्छाए, हुकूमत केरनेबालेरे अधीन एल्हेरेलेइ राथ किजोकि तै बड़ो खास अधिकारी आहे। 14ते हाकिमेरे भी अधीन भोथ, किजोकि राज़ो तैस बुरां कम्मां केरनेबालन सज़ाह देने लेई ते रोड़ां कम्मां केरनेबालां केरि तारीफ़ केरनेरे लेई इस्तेमाल केरते। 15किजोकि परमेशरेरी मर्ज़ी ईए, कि तुस रोड़ां कम्मां केरतां तैना बेवकूफ लोकन ज़ैना परमेशरे न ज़ानन, तुश्शे खलाफ दोष लाने करां रोकथ। 16हुनी तुस पापेरे गुलाम नईं किजोकि तुस इश्शे प्रभु यीशु मसीहेरे ज़िरिये आज़ाद कियोरेथ। पन अपनि ई आज़ादी बुरे कम्मां केरे लेई इस्तेमाल न केरा, पन तुस भला कम्मां केरे ज़िरिये इन हिराथ कि तुस सच़्च़े परमेशरेरे दास आथ। 17सेब्भी केरि आदर केरा, अपने विश्वासी साथी लोकन सेइं प्यार केरा, परमेशरे करां डरा, हुकूमत केरनेबालेरी इज़्ज़त केरा।

मसीह इश्शे लेई मिसाले

18हे घरन मां कम केरनेबाले सेवकव, तुस ज़ैना विश्वासी आथ अपने मालिकां केरे हुक्म मन्ना ते हमेशा तैन केरि आदर केरा। इन न सिर्फ दया केरनेबालन सेइं केरा, बल्के ज़ैना दया न केरन तैन सेइं भी। 19किजोकि अगर अस बगैर गलती केरतां दुख झ़ैल्‍लतम त अस ज़ानतम कि परमेशर सब किछ ज़ानते ते परमेशर असन सेइं खुश भोते। 20किजोकि अगर तुसेईं पाप केरतां मार खाइ त तुश्शी कोई बडीयाई नईं कि तुसेईं सज़ाही मां सबर की। पन अगर भलियाई केरतां दुख झ़ैलतथ ते सबर केरतथ त इस सेइं परमेशर खुश भोते। 21परमेशरे तुसन कुजानेरी अक वजा ई भी आहे कि तुस तैसेरेलेइ दुख झ़ैल्‍लां, मसीह भी तुश्शे लेई दुख झ़ैल्‍लतां तुसन अक मिसाल दित्ती। तुसेईं भी तेन्च़रे कियोरू लोड़े ज़ेन्च़रे मसीहे कियूं। 22पवित्रशास्त्र ज़ोते, तैने कधी पाप नईं कियोरो। तैने कधी झूठ नईं ज़ोवरू। 23ज़ैखन लोकेईं यीशु बेइज़्ज़त कियो, त तैने तैसेरे बदले मां तैना बेइज़्ज़त न किये। ज़ैखन लोकेईं तैस दुख दित्तो त तैने बदले मां तैन दुख न दित्तो, बल्के तैने परमेशरे पुड़ भरोसो कियो कि तै तैसेरी मद्दत केरे। तै ज़ानतो थियो कि परमेशर हमेशा धार्मिकताई सेइं लोकां केरो न्याय केरते। 24ज़ैखन मसीह मरो, त तैसेरे जानी पुड़ इश्शे पापां केरे लेई तैस क्रूसे पुड़ सज़ाह दित्ती। तैने एन कियूं कि अस पाप केरनो बंद केरम ते धार्मिकतारी ज़िन्दगी ज़ींनी शुरू केरम। तैसेरे ज़खम ज़ैना तैनी झ़ैल्‍ले तैन केरे वजाई सेइं अस बेज़्झ़ोए। 25तुस पेइले टेपलोरी भैड्डां केरे ज़ेरे थिये, पन हुनी तुस मसीह कां वापस एवरेथ ज़ै तुश्शे प्राणा केरो पुहाल ते रखवालोए।