Bhadrawahi Bible
1 कुरिन्थियों 3
कलीसियाई मां फिरके
हे ढ्लाव ते बेइनव, ज़ैखन अवं तुसन कां थियो त तुसन सेइं एन्च़रे सब गल्‍लां न केरि बटो, ज़ेन्च़रे आत्मिक लोकन सेइं; पन ज़ेन्च़रे तैन सेइं ज़ैना मसीह मां बच्‍चेन। मीं तुसन परमेशरेरे वचने मरां सिर्फ बुनियादी गल्‍लां केरि शिक्षा दित्ती ते डुग्घी सच़्च़ाई नईं। किजोकि तैस वक्ते तुस तै शिक्षा हासिल केरनेरे ते समझ़नेरे काबल न थिये, बल्के हेजू भी हासिल केरनेरे काबल नईं। किजोकि हेजू तगर भी गैर विश्वासी केरे ज़ेरे आथ। एल्हेरेलेइ कि ज़ैखन तुसन मां बैर, ते लड़ैइन, त कुन तुस गैर विश्वासी केरे ज़ेरे न भोए? तुस एरे लोकां केरि ज़ेरि ज़िन्दगी ज़ींने लगोरेथ, ज़ैन केरो रिश्तो प्रभु सेइं न भोए। एल्हेरेलेइ अक ज़ोते, “अवं पौलुसेरोईं,” ते होरो ज़ोते, “अवं अपुल्‍लोसेरो आईं,” त कुन तुस एरे लोकां केरि ज़ेरि ज़िन्दगी ज़ींने बाले न भोए, ज़ैन केरो रिश्तो प्रभु सेइं न भोए!
अपुल्‍लोस कौने? ते पौलुस कौने? सिर्फ सेवक, ज़ैन केरे ज़िरिये तुसेईं प्रभु पुड़ विश्वास कियो, असन मरां हर केन्चे कम कियूं ज़ेन्च़रे परमेशरे केरनेरे लेई दित्तू। अगर अवं तुश्शी तुलना ऊडारे सेइं केरि त मीं बीज़ बेवं, अपुल्‍लोसे सग्गू, पन परमेशरे बडावं। एल्हेरेलेइ न त लानेबालो किछे, ते न सग्गने बालो किछे, पन परमेशर ज़ै बडाने बालोए। लानेबालो ते सग्गने बालो दूईये अक आन; पन हर मैन्हु अपने-अपने मज़दूरारो फल मैलनोए। किजोकि अस परमेशरे सेइं साथी कम केरनेबाले आम, तुस एरे ऊडारां केरे ज़ेरे आथ ज़ैन केरो तलक परमेशरे सेइं आहे, ते इसेरे अलावा तुश्शी तुलना एरे घरे सेइं केरताईं ज़ैन परमेशरे बनावरूए। परमेशरे ज़ैन कम मीं केरनेरे लेई दित्तोरू थियूं, मीं तैन अक्लममेन्दी सेइं कियूं; अवं माहिर मिस्रेरो ज़ेरो आईं, मीं तुश्शे नगरे मां खुशखबरी प्रचार की ते शुरू मां तुसन यीशु पुड़ विश्वास केरनेरे लेई मद्दत की, तैट्ठां बाद ज़ैस कम्मेरी शुरुआत मीं कियोरी थी, होरे मसीही सेवा केरनेबाले तैस बुनियादी पुड़ लगातार कम केरते राए। पन असन मरां हर एक्‍की कम केरनेबाले ध्याने सेइं सोचोरू लोड़े, कि असेईं परमेशरेरू कम केन्च़रे लोड़े कियोरू। किजोकि यीशु मसीह सच़्च़ी बुनीयादे, ते होरो कोई होरि बुनीयाद न बनेइ सके, तैन इन आहे, कोई तुसन मुक्ति हासिल केरनेरे लेई नव्वीं शिक्षा न शिखैली बटे, मीं तुसन सेइं पेइलू ज़ोवरू कि परमेशर असन यीशु मसीहेरे ज़िरिये मुक्ति देते। ते अगर कोई इस मुनीयादी पुड़ सोन्नू चाँदी या कीमती घोड़ या कैड़ु या घास फूसेरो रद्दो रखते। ज़ैखन मसीह फिरी वापस एज्जेलो, त अग हर एक्‍केरे कम्मे परखेली, ते अग हर मैन्हेरे कम्मेरी कीमत हिराली। ज़ेसेरू कम तैस अग्गी सेइं न फुकोलू, तैस मज़दूरी मैल्हनी। ते अगर केन्चेरू कम फुकोलू, त तैस नुकसान भोल्हो; पन तै एप्पू बच़नोए पन फुकोते-फुकोते।
कुन तुस न ज़ानथ, कि तुस परमेशरेरू मन्दरथ, ते परमेशरेरो आत्मा तुसन मां रहते? अगर कोई तुसन नुकसान पुज़ाए, त परमेशर तैस नाश केरेलो; किजोकि परमेशरेरू मन्दर पवित्रे, ते तैन तुस आथ।
कोई अपने आपे धोखो न दे, अगर तुसन मरां कोई इस दुनियारे लोकन मां अपनो आप अक्लमन्द समझ़े, त तैस दुनियारी नज़री मां बेवकूफ बनोरू लोड़े; ताके परमेशरेरे नज़री मां सच़्च़े ज्ञानी बने। किजोकि इस दुनियारी अक्ल परमेशरे कां बेवकूफीए, ज़ेन्च़रे पवित्रशास्त्रे मां लिखेरूए;
“परमेशर ज्ञानी लोकन तैन केरे च़लैकी मां फसाते।”
ते फिरी पवित्रशास्त्र इन भी ज़ोते, “प्रभु ज्ञानी लोकां केरे खियालन ज़ानते कि बेफैइदेन।” एल्हेरेलेइ कोई मैन्हन पुड़ घमण्ड न केरे, किजोकि किछ परमेशरे तुश्शू भलेरे लेई दित्तोरूए। तैन इन आहे कुन अवं पौलुस, कुन अपुल्‍लोस, कुन कैफा, कुन दुनिया, कुन ज़ींनू, कुन मरनू, कुन ई वक्त, कुन एजनेबालो वक्त, सब किछ तुश्शूए। ते तुस मसीहेरेथ, ते मसीह परमेशरेरोए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.