Bhadrawahi Bible
1 कुरिन्थियों 14
भविष्यिवाणी ते गैर भाषा
एक्की होरि सेइं प्यार केरनेरी कोशिश केरा। ते आत्मिक वरदानां केरि बड़ी इच्छा रखा, खास केरतां इन, कि भविष्यिवाणी केरा। किजोकि, ज़ै गैर भाषाई मां गल्लां केरते; तै मैन्हन सेइं नईं, बल्के परमेशरे सेइं गल्लां केरते; एल्हेरेलेइ कि तैसेरी कोई न समझ़े; किजोकि तै भेदेरी गल्लां पवित्र आत्मारे शेक्ति सेइं ज़ोते। पन ज़ै परमेशरेरे तरफां सन्देश शुनाते, तै विश्वासी लोकन, विश्वासे मां मज़बूत भोनेरे लेई मद्दत केरते, ते होरि विश्वासी लोकां केरि हिम्मत बद्धाते ते तसल्ली देते। ज़ै गैर भाषाई मां ज़ोते, तै अपने विश्वासे मज़बूत केरते। पन ज़ै भविष्यिवाणी केरते, तै कलीसियारे विश्वासी लोकां केरे विश्वासे मज़बूत केरते। अवं चाताईं, कि तुस गैर भाषाई मां गल्लां केरा, पन जादे इन चाताईं कि भविष्यिवाणी केरा: किजोकि अगर गैर भाषा ज़ोने बालो कलीसियारे विश्वासी लोकां केरे विश्वासे मां मज़बूत भोनेरे लेई तरजमो न केरे त भविष्यिवाणी केरनेबालो तैस करां जादे खास कम केरि राहोरोए।
एल्हेरेलेइ हे ढ्लाव ते बेइनव, अगर अवं तुसन कां एइतां गैर भाषाई मां गल्लां केरि त तुसन मीं करां कुन फैइदो भोल्हो। पन अगर अवं प्रकाश या खास ज्ञान, या परमेशरेरो सन्देश शुनेईं या शिक्षा देईं त इस सेइं तुश्शी मद्दत भोल्ही। एन्च़रे, अगर तुस बाज़ो बज़ाथ ज़ेन्च़रे बेइशोई या सारंगी, अगर तैन रोड़े च़ारे न बज़ाव गाए त ज़ैन बज़ाव लावरू गाने त तैन केन्च़रे पिशानेले बेइशोई या सारंगी मां कुन लावरू बज़ने। जंगी मां अगर नरशिंगेरी आवाज़ साफ न भोए, त फौजी जंगरे लेई तियार न भोइ सकन। एन्च़रे, ज़ैखन तुस तैना गल्लां केरथ ज़ैना होरि लोकन समझ़ न एज्जन, त ज़ैन किछ ज़ोवं गाते तैसेरी कोई कीमत नईं। दुनियाई मां बेड़ि भाषा आन, त हर भाषारो मतलबे। पन अगर अस तैस भाषाई न समझ़म ज़ै होरे ज़ोने लगोरेन, त एन एरू भोल्हु, कि ज़ेन्च़रे तैना इश्शे लेई परदेशी भोल्हे ते अस तैन केरे लेई परदेशी भोल्हे। एन्च़रे तुस भी ज़ैखन पवित्र आत्मारे वरदानां केरे लेई बड़ी इच्छा रखतथ, त तैन वरदानां केरि इच्छा रखा ज़ैन सेइं कलीसियारे विश्वासी लोक विश्वासे मां मज़बूत भोन।
एल्हेरेलेइ ज़ै गैर भाषा केरते, तै प्राथना केरे, कि ज़ैन किछ तैने ज़ोवं, तैसेरो मतलब समझ़नेरे काबल भी भोइ सके। किजोकि अगर अवं गैर भाषाई मां प्राथना केरने लगोरोईं, त मेरी आत्मा प्राथना केरतीए, पन मेरी सोचरे लेई फैइदो नईं, किजोकि इन मीं समझ़ न एज्जे। त फिरी मीं कुन कियोरू लोड़े? एरो भी वक्त भोते ज़ैखन मीं अपने आत्माई सेइं प्राथना कियोरी लोड़े, एरो वक्त भी भोते ज़ैखन मीं अपने अक्ली सेइं भी प्राथना कियोरी लोड़े। किछ वक्ते मीं अपने आत्माई सेइं गीतां ज़ोवरां लोड़न, ते होरि वक्ते मीं अक्ली सेइं भी गीत ज़ोवरां लोड़न। मन्ना कि ज़ैखन किछ आम मैन्हु तुश्शे आराधनाई मां एज्जन, ज़ैखन तुस अपने आत्माई सेइं परमेशरेरी बडीयाई केरथ। अगर तैना तुश्शी न समझ़न, त तुश्शे परमेशरेरू शुक्र केरनेरे बाद तैना केन्च़रे बुझ़ेले कि किताली, “आमीन” ज़ोनू, किजोकि तैना न समझ़न तुस कुन लगोरेथ ज़ोने। तुश्शू परमेशरेरू शुक्र केरनू रोड़ूए, पन इन होरि केरे विश्वासे मज़बूत केरनेरे लेई मद्दत न केरेलू। अवं अपने परमेशरेरू शुक्र केरताईं, कि अवं तुसन सेब्भन करां जादे गैर भाषां केरताईं। पन कलीसियाई मां गैर भाषा केरने मां दश हज़ार गल्लां केरे ज़ोनेरे केरतां इन मीं होरू भी रोड़ू लगते, कि होरन शिखालनेरे लेई अक्ली सेइं पंच़े गल्लां ज़ोईं।
हे ढ्लाव ते बेइनव, तुस इना गल्लां समझ़ने मां बच्चे न बना, पन बुरैई केरनेरे लेई बच्चां केरे बना, पन इस किसमेरी गल्लां समझ़नेरे लेई समझ़दार बना। कानूने मां प्रभु ज़ोते;
“अवं बखलां केरे ज़िरिये ज़ोइलो,
ज़ैना गैर भाषां केरेले, पन फिरी भी तैना मेरी न शुनेले।”
एल्हेरेलेइ असन मरां किछ गैर भाषा केरन ज़ै पवित्र आत्मारे तरफांए, इश्शे शब्द तैन लोकां केरे लेई प्रभुएरे शेक्तिरो निशाने, ज़ैना प्रभु पुड़ विश्वास न केरन। ते अगर कलीसिया एक्की ठैरी अकोट्ठी भोए, ते सब गैर भाषा केरन, त आम लोक ज़ैना ई भाषा न समझ़न या गैर विश्वासी लोक अन्तर एज्जन त कुन तैना इन न सोचेले कि तुस पागल आथ। ते अगर सब भविष्यिवाणी केरन, ते आम लोक या गैर विश्वासी लोक अन्तर एज्जन, त तैन एसास भोल्हो कि तैना पापिन, ते ज़ैन तैनेईं ज़ोवं तैसेरे वजाई सेइं अपनि बत बदलेले। ते परमेशरेरे सन्देशे सेइं तैन एसास भोल्हो कि तैनेईं बुरू कियोरू तैन केरे मनेरो भेद बांदो भोइ गाले, ते तैन एसास भोल्हो कि तैना पापी आन त कने पापन करां मन फिराले। ते तैना मथ्थो टेकतां परमेशरेरी आराधना केरेले, ते मन्नेले कि परमेशर तुसन मांए।
बरते मां अनुशासन
हे ढ्लाव ते बेइनव कुन कियोरू लोड़े? ज़ैखन तुस आराधना केरने लेई अकोट्ठे भोतथ, त किछ भजन ज़ोन, किछ उपदेश देन, ते किछ ज़ैन प्रकाशन परमेशरेरे तरफांए तैस देन, ते किछ गैर भाषाई मां गल्लां केरन ते किछ तैसेरो तरजमो केरन, तुस इन सब एल्हेरेलेइ केरा कि कलीसियारे लोकन विश्वासे मां मज़बूत भोनेरे लेई मद्दत भोए। अगर कोई गैर भाषाई मां ज़ोने लगोरोए, त दूई या ट्लाई ज़ने बैरी-बैरी सेइं ज़ोन, ते इन ज़रूरी कि अक मैन्हु तैस भाषारो मतलब ज़ोए। पन अगर तरजमो केरनेबालो न भोए, ते गैर भाषा ज़ोने बालो कलीसियाई मां च़ुप राए, ते च़ुपच़ारे अपने मने सेइं परमेशरे सेइं गल्लां केरे। नेबन मरां दूई या ट्लाई ज़ोन, इन ज़रूरीए कि हर कोई शुने, ते सोचन ते परखन कि ज़ैन किछ ज़ोवं लेवरू गाने सही आहे या नईं। पन अगर कोई ज़ै तैड़ी सभाई मां बिशोरोए, तैस परमेशरेरे तरफां सन्देश मैल्हे, त ज़ै ज़ोने लगोरोए तै च़ुप भोए, ते तैस ज़ोने दे। किजोकि तुस सब अक-अक भविष्यिवाणी केरि बटतथ, पन अक-अक भोइतां ताके सब शिखन, ते हिम्मत बद्धे। ज़ै नबी परमेशरेरो सन्देश शुनाते, तै अपने आपे वशे मां रखते। तै इस काबले कि अपने मेर्ज़ी सेइं ज़ोई बटते ते च़ुप रेइ बटते। किजोकि परमेशर गड़बड़ केरनेबालो नईं, पन शान्ति देनेबालोए; ई तै कानूने ज़ैस परमेशरेरे सैरी कलीसियारे लोक मनतन। कुआन्शां कलीसियारे सभाई मां च़ुप रान, किजोकि तैन गल्लां केरनेरो हुक्म नईं, ज़ेन्च़रे कानूने मां लिखोरू भी आहे। ते अगर तैना किछ सवाल पुछ़ने चान, त सभाई मां न पुछ़न पन घरे अपने-अपने मुन्शन पुछ़न, किजोकि कलीसियाई मां कुआन्शां केरि जादे गल्लां केरनि ठीक नईं। एरू किजो आहे तुसन मरां किछ लोक पेइले ज़ोवरे नियमन किजो न मन्नू चान? कुन तुस सोचतथ कि तुस पेइले लोक आथ ज़ैनेईं परमेशरेरू वचन दित्तू? या सिर्फ तुसन दित्तू? अगर कोई मैन्हु अपनो आप नबी समझ़े, या इन समझ़े कि मीं पवित्र आत्मारे तरफां वरदान मैल्होरूए, त इन समझ़े, कि ज़ैना गल्लां अवं तुसन लिखताईं, तैना प्रभुएरे हुक्मन। पन अगर कोई इन गल्लन न मन्ने, त तैन पुड़ विश्वास न केर।
एल्हेरेलेइ हे ढ्लाव ते बेइनव, भविष्यिवाणी केरनेरी बड़ी इच्छा रखा, ते गैर भाषाई केरनेरे लेई न ठाका। पन तैन सब किछ ज़ैन तुस कलीसियाई मां केरतथ तरीके सेइं कियूं गाए।
Bhadrawahi Bible. Copyright © Beyond Translation. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.